Сиктад медицина уджалысьыд лун кӧть вой, зэр кӧть слӧта век медводдзаӧн воӧ висьысь-нёрпалысьлы отсӧг вылӧ. Но кутшӧм кӧть сьӧкыд тайӧ нокыс, сиктса унджык медикыс шуӧны, мый налӧн профессияыс – медся бур, йӧзлы колана да тӧдчана. Тадз жӧ эскӧдӧ Изьва районысь том фельдшер Светлана Вальбазова.
Ныв чужлӧма-быдмӧма Архангельск обласьтса Шенкурск карын. Медицинаын удж йывсьыс Светлана оз кодлӧнкӧ кывъяс серти тӧд. Налӧн семьяын некымынӧн сиӧмаӧсь олӧмсӧ йӧзлы отсалӧмлы. Та вӧсна школа помалӧм бӧрас ныв мунӧма рӧдвужыслӧн кок туйӧд да пырӧма босьтны тӧдӧмлун И.П.Морозов нима Сыктывкарса медицина колледжӧ.
– Менам сэтшӧм и эм этшӧй: век окота отсавны пикӧ воӧмалы, – висьталӧ Светлана Вальбазова. – Медицина юкӧнын зільӧмыд – тайӧ жаль петана да сьӧлӧм сетан-ышӧдана профессия.
Колледжсӧ бура помалӧм бӧрын выль тӧдӧмлунӧн да йӧзлы отсавны ыджыд кӧсйӧмӧн том фельдшер шуӧма мунны сиктӧ.
Талун Светлана Вальбазовалӧн дӧзьӧр улын Изьва районса Галфедь грездысь да Кельчиюр сиктысь матӧ 700 олысьлӧн дзоньвидзалуныс.
Уджъёртъяс йывсьыс Светлана висьтасьӧ шоныда, опыта наставникъяс пӧ ёна отсасьӧны, туйдӧны-велӧдӧны да юксьӧны сям-кужӧмлуннас.
Уджавнысӧ пӧ позьӧ, оборудование-аппаратураыс эм, сӧмын оз тырмы отоскоп да синпытшса давленньӧ мерайтан прибор, а татшӧмыс быть колӧ диспансеризация дырйи верстьӧ войтырлысь дзоньвидзалунсӧ туялігӧн. А бурторйыс пӧ сыын, мый 2023 воӧдз «Модернизация первичного звена здравоохранения» уджтас серти Галфедьын кыпӧдасны ӧнія модульнӧй ФАП.
Светлана Вальбазова могмӧдӧ врачӧдз медицина отсӧгӧн: примитӧ висьысь-нёрпалысьясӧс амбулаторияын, ветлӧ на дорӧ гортӧдзыс, дӧзьӧритӧ пузчужӧм кагаясӧс, вӧчалӧ писти, сеталӧ лекарство-препарат вылӧ рецепт. Таысь кындзи фельдшер аддзысьлӧ школаын велӧдчысьяскӧд, тӧдмӧдӧ найӧс аслас уджӧн.
«Дзоньвидзалун» национальнӧй проектлӧн «Земскӧй доктор» уджтас серти Светланалы вичмӧма миллион шайт. Ныв висьталӧ, сьӧмсӧ пӧ видзи ас керка кыпӧдӧмӧ.
– Водзӧ вылӧ стӧча тӧда: кута уджавны фельдшерӧн да отсавны йӧзлы. Вочасӧн содта и кужӧмлун-сямӧс да лоа грамотааджык специалистӧн. <>
Лев СОЛОВЬЁВ.
Снимокыс минздравысь пресс-службалӧн.