Россияса президент Владимир Путинлӧн индӧд серти 2023 восӧ миян странаын сиӧма велӧдысьлы да наставниклы. Сы могысь, медым нимӧдны налысь йӧзлы колана, кывкутана да тӧдчана уджсӧ.
Январь 27 лунӧ ми такӧд йитӧдын Усвавомса культура керкаын котыртлім «Виват, педагоги!» гаж. Кыпыд аддзысьлӧм вылӧ чукӧртчылісны ставӧн, кодъяслӧн уджныс йитчӧма челядьӧс да том йӧзӧс велӧдӧмкӧд – Усвавомса да Нӧвикбӧжса школаясын велӧдысьяс, воспитательяс, педагог-ветеранъяс.
Колана да пыдди пуктана уджысь аттьӧалана да чолӧмалана кывъяс налы висьталісны Усвавомса администрацияӧн веськӧдлысьӧс вежысь Ирина Валерьевна Варанкина, Коми Республикаса Госсӧветысь депутат, Усвавомса школаӧн веськӧдлысь Екатерина Валерьяновна Дьячкова, Нӧвикбӧжса школа-садйысь директор, Усвавомса администрацияӧн веськӧдлысьлы отсасьысь Людмила Сергеевна Палехова. Быдӧн на пиысь пасйис челядьӧс велӧдан уджлысь тӧдчанлунсӧ.
Дерт жӧ, «Виват, педагоги!» гажын пыдди пуктана гӧсьтъясӧн вӧліны педагог-ветеранъяс. Найӧ быдтісны-велӧдісны сиктса ныв-зонлысь эз ӧти кӧлена. Талун найӧ сэтшӧм жӧ восьса сьӧлӧмаӧсь, ыджыд эскӧмӧн видзӧдӧны аскиа лунӧ да пыр дасьӧсь отсавны томуловлы.
Уна-уна во найӧ вӧчисны ассьыныс радейтана уджсӧ. Тайӧ – Елена Васильевна Барчук, Валентина Михайловна Борисова, Галина Владимировна Дьячкова, Афанасий Алексеевич Канев, Антонина Андреевна Канева, Татьяна Владимировна Конова, Надежда Ивановна Рубцова, Роза Лазаревна Тихомирова да Надежда Геннадьевна Шахова. Ветеранъяс пиысь ӧткымынӧн водзӧ на зільӧны-уджалӧны, на лыдын – Екатерина Валерьяновна Дьячкова, Анна Зосимовна Мастыкина, Ольга Пиковна Вокуева, Нелли Николаевна Хозяинова.
Гаж дырйиыс гӧсьтъяс пиысь быдӧн вермис пырӧдчыны «Открытый микрофон» акцияӧ да сьӧлӧмсяньыс чолӧмавны-аттьӧавны классӧн веськӧдлысьсӧ, радейтана велӧдысьсӧ, школаын зільысьясӧс.
И водзӧ на юргис уна бур кыв, вӧлі тшӧтш позянлун нимкодясьны «Гармония» сьылан котырлӧн да челядьлӧн «Весёлые нотки» хорлӧн петкӧдчӧмъясӧн.
Та бӧрын велӧдысьяс пырӧдчисны тӧдӧмлун петкӧдлан «КВИЗмикс» ворсӧмӧ. Логика-эрудиция вылӧ вӧлі 7 раунд да 83 юалӧм. Ёнакодь ковмис юр жуглыны, но быдӧн сяммис стӧч вочакывъяс сетны да ставсӧ колана ногӧн вӧчны.
Велӧдысьлӧн да наставниклӧн воӧ миян сиктса школаясын да культура учреждениеясын уна на быдсикас чукӧртчылӧм да гаж лоӧ нуӧдӧма, унаысь на татшӧмсяма аддзысьлӧмсӧ котыртлам тіянлы, дона велӧдысьяс!
Нӧшта ӧтчыдысь чолӧмалам ставнытӧ, пыдди пуктана велӧдысьяс, странаын тіянлы сиӧм воӧн! Дзоньвидзалун, радейтчӧм, тыр-бур олӧм да мувывса став бурсӧ сиам! И мед удж выланыд унджык нимкодь здук вӧлі, а семьяаныд – помтӧм-дортӧм шуд.
Ыджыд аттьӧ висьталам Игорь Васильевич Паншинлы яръюгыд снимокъясысь. Тӧдчӧдам, Игорь Васильевич уджалӧ велӧдысьӧн 52 во нин. Сійӧс донъялӧма «Почётный работник общего образования Российской Федерации» пасӧн, Коми Республикалы 95 во тырӧмкӧд йитӧдын почёта медальӧн, «В память 100-летия Республики Коми» юбилея медальӧн, а сідзжӧ сійӧ – Усвавомын почёта олысь. <>
Людмила КАНЕВА.
Усинск р.
Снимокъясыс Игорь ПАНШИНЛӦН.