«Демография» нацпроект весьтӧ Комиын квайт сюрсысь унджык семья босьтӧма кольӧм во коймӧд кагаӧс чужтӧмысь быд тӧлысся пособие. Та могысь бюджетысь видзӧма миллиардысь унджык шайт.
Регионса удж, занятосьт да йӧзӧс соцальнӧя доръян министерствоысь юӧр серти, таво татшӧм отсӧг сеталанногсӧ вежӧмаӧсь. Сьӧмсӧ мынтӧны Социальнӧй фонд пыр кыдзи ӧтувъя (универсальнӧй) пособие, кӧні артыштӧма челядя семьялы мынтан став сьӧма кокньӧдсӧ – нывбабалы нӧбасьӧмсянь да кагалы 17 арӧс тыртӧдз.
Коймӧд да унджык кага вайӧмысь пособиесӧ мынтӧны регионын овны судзсьымӧнысь 50, 75 либӧ 100 прӧчент артыштӧмӧн. Та дырйи тӧд вылӧ босьтӧны семьялысь ӧтувъя чӧжӧссӧ.
Семьяын коймӧд кагаыс кӧ чужис тавося январь 1 лунӧ либӧ сёрӧнджык, бать-мамыслы сьӧмсӧ сетӧны кыдзи ӧтувъя пособие. А 2022 вося декабрь 31 лунӧдз коймӧд кага вайысьяслы татшӧм отсӧгсӧ позьӧ босьтны кӧсйӧм сертиныс важ ногыс.
Казьтыштам, выль ногӧн арталӧмӧн быд тӧлысся пособиесӧ шуӧма мынтыны семьялы, чӧжӧсыс кӧ регионын овны судзсьымӧн кык пӧвста сьӧмысь абу унджык. Таво Комиын верстьӧ арлыдалы овны судзсьымӧнсӧ урчитӧма 19.035 шайт, кык пӧв артыштӧмӧн лоӧ 38.070 шайт. Сідзкӧ, куим челядя гозъялы пособиеыс вичмас, тӧлысся чӧжӧсныс кӧ 190.350 шайтысь абу унджык.
А важ ног артасьӧмӧн, коймӧд да унджык кага вайӧмысь быд тӧлысь шуӧма сетны регионын челядьлы овны судзсьымӧн мында сьӧм: республика войвылын талун 20.816 да лунвылын 16.383 шайт.
Регионса удж, занятосьт да йӧзӧс соцальнӧя доръян министерствоысь юӧр серти, кольӧм во татшӧм сьӧма отсӧгсӧ сетӧмаӧсь 6.148 семьяысь 6.587 кагалы.
<> Лист боксӧ дасьтісны Николай РАЗМЫСЛОВ, Александра АРТЕЕВА да Павел Симпелев.
Снимокыс ӧтуввезйысь.