Доброволечьяслы (волонтёръяслы) да социальнӧй нырвизя некоммерческӧй котыръяслы отсӧг сетӧм кузя координационнӧй сӧветлӧн чукӧртчылӧм дырйи вӧлі вӧчӧма 2022 воын «Образование» нацпроектлысь «Социальная активность» регионса уджтас збыльмӧдӧм кузя кывкӧртӧд.
Сёрнисӧ панігӧн республикаса юралысь Владимир Уйбалӧн висьталӧм серти, волонтёр уджыс талун зэв тӧдчана.
Олӧма и том, верстьӧ и челядь зільӧны отсавны пикӧ воӧмалы, судзсьытӧма олысьлы, ыджыд арлыдалы, висьысь-нёрпалысьлы. Та дырйи кадӧн оз артасьны ни дон оз босьтны. Доброволечьяс торйӧн нин водзмӧстчӧны страналы ӧнія сьӧкыд кадӧ. Военнӧй спецоперация йӧзӧдӧмсянь чукӧртӧны Донбассын олысьяслы да мобилизуйтӧмаяслы сёян-юан, шоныд паськӧм, мукӧд коланатор. Отсасьӧны и военнослужащӧйяслӧн семьяяслы. Колӧ пасйыны, воысь-во волонтёравны босьтчӧны пыр унджыкӧн. 2019 воын татшӧмыс вӧлӧма 22 сюрс морт, а таво 33 сюрс сайӧ нин. Регион тшупӧдын лӧсьӧдӧма да уджалӧ «Доброштаб Республики Коми» шӧрин. Муниципалитетъясын сідзжӧ котыртӧма 18 татшӧм шӧрин, кӧні зільӧны волонтёр командаяс.
Коми Республика окотапырысь пырӧдчӧ «Регион добрых дел» ставроссияса конкурсӧ да веськалӧ сэні медбуръяс лыдӧ. Тайӧ конкурсас вермӧмысь мӧйму вичмӧма 7,9 миллион, а таво – 9,1 миллион шайт.
Медводдзаысь на вӧлі нуӧдӧма «Мы вместе» войтыркостса премия вылӧ регионса конкурс, кытчӧ пырӧдчӧмаӧсь дас нёль да ыджыдджык арлыда волонтёръяс, некоммерческӧй котыръяс, государственнӧй да муниципальнӧй учреждениеяс, ичӧт да шӧр бизнес, гырысь компанияяс. Вӧзйӧмаӧсь донъявны 56 проект. На лыдысь дас кӧкъямысыс лоӧма вермысьӧн да призёрӧн.
Волонтёръястӧг талун оз нуӧдсьы республикаын ни ӧти тӧдчана чукӧртчылӧм-аддзысьлӧм.
Таво найӧ водзмӧстчӧмаӧсь «Формирование комфортной городской среды», «Поезд Победы» проектъяс збыльмӧдӧмын, Победа лун да Коми Республикалысь 100 вося юбилей кыпыда пасйӧмын, «Молодёжь Коми» форум да том йӧзлысь медводдза Дельфийскӧй ворсӧмъяс нуӧдӧмын. Но торйӧн нин ыджыд пай пуктӧны волонтёръяс спецоперация вылӧ мобилизуйтӧмаяслы да налӧн семьяяслы колана отсӧг сетӧмӧ, мый йылысь казьтыштіс координационнӧй сӧветлӧн чукӧртчылӧм дырйи сёрнисӧ панігӧн регионса юралысь Владимир Уйба. Сідз, Сыктывкарса лесопромышленнӧй техникумысь студентъяс вӧчӧмаӧсь военнослужащӧйяслы буржуйка-пач. Кӧрткерӧс районысь Адзорӧмса школа-интернатысь нывъяс вурӧмаӧсь Комиысь мобилизуйтӧмаяслы гачьяс. Юркарса политехническӧй техникумын велӧдчысьяс отсалӧмаӧсь вӧчны мобилизуйтӧмалӧн семьялы гортас ремонт да водзӧ вурӧны военнӧйяслы шоныд паськӧм.
Медся зіль да водзмӧстчысь волонтёръясӧс пасйӧм могысь дасьтӧма «Шаг к добровольчеству» уджтас. Таво регионса юралыссянь вичмӧма дас доброволечлы госнаграда – «За вклад в развитие добровольчества» морӧсвывса пас. А сё волонтёр-абитуриентлы вузӧ пыриганыс артыштӧмаӧсь содтӧд баллъяс. Студент-доброволечьяслӧн эм позянлун мынтысьтӧг песны вын-эбӧссӧ тренажёра залын, уявны бассейнын да волывлыны уна сикас гаж-аддзысьлӧм вылӧ.
* * *
А волонтёравны вермас быдӧн. Та могысь колӧ сӧмын шыӧдчыны добро.рф портал пыр. <>
Лист боксӧ дасьтісны Александра АРТЕЕВА да Николай РАЗМЫСЛОВ.