Декабрь 1 лунӧ регионса правительствоӧн веськӧдлысьӧс вежысь Алексей Просужихлӧн юрнуӧдӧм улын «Мы вместе» республикаса штаблӧн чукӧртчылігӧн, кӧні вӧлі тшӧтш правительствоӧн веськӧдлысьӧс вежысь Лариса Карачёва, торъя военнӧй операцияын тышкасьысьяслы да налӧн семьяяслы отсасьӧм йылысь висьтасисны Усинскса, Койгорт, Удора, Чилимдін да Мылдін районъясса администрацияясын уджалысьяс.
Вежон сайын такӧд йитӧдын вӧлі кывзӧма Кӧрткерӧс, Емдін, Сыктывдін, Сыктыв, Луздор районъясса да Вуктылса власьт тэчасъясын зільысьясӧс. Кыдз тыдовтчӧ, регионса став муниципалитетас унатор вӧчсьӧ мобилизуйтӧм салдатъяслы да налӧн семьяяслы отсалӧм могысь.
Торйӧн кӧ, кар-районын олысьяс чукӧртӧны сёян-юан, вурӧны военнӧйяслы шоныд паськӧм, петкӧдлӧны благотворительнӧй концертъяс, гижӧны-мӧдӧдӧны салдатъяслы ышӧдана да бурас эскӧдана письмӧяс. Мобилизуйтӧмаяслысь да доброволечьяслысь семьяяссӧ могмӧдӧны корӧм сертиныс пескӧн, тьӧс-плакаӧн да мукӧдторйӧн, отсалӧны дасьтыны оланінысь да коммунальнӧй услугаясысь вештысьӧм кузя кокньӧд босьтӧм могысь колана документ-кабала да с.в.
«Мы вместе» республикаса штаблӧн меставывса сӧветъясын водзмӧстчӧны депутатъяс, «Единая Россия» ютырын, ставроссияса «Народнӧй фронт» ӧтмунӧмын, ветеранъяслӧн, нывбабаяслӧн да мукӧд общественнӧй котырын зільысьяс, ставӧн, кодъяслы абу веськодь, мый вӧчсьӧ талун миян странаын да мир пасьталаын. Син улӧ босьтӧма мобилизуйтӧмаяслысь челядьсӧ, школаын 5-11 классъясын велӧдчысьясӧс, пӧсь сёянӧн вердӧм.
Став муниципалитетсяньыс шыӧдчылісны юалӧмӧн, кыдзи позьӧ мӧдӧдны торъя военнӧй операцияын айму дорйысь салдатъяслы матыссаяссяньыс да рӧдвужсяньыс выльвося козинъяс. Республикаса правительствоӧн веськӧдлысьӧс вежысь Алексей Просужих пасйис, мый та кузя быть сёрнитчасны «Россияса поштакӧд», и военнослужащӧйяслы став пӧсылкасӧ мӧдӧдасны кытчӧ колӧ да ас кадӧ.
Регионса «Мы вместе» штаблӧн чукӧртчылӧм дырйи сёрнилы кывкӧртӧд вӧчигӧн Алексей Просужих тӧдчӧдіс, мый республикаса кар-районын «Мы вместе» штаблӧн став зільӧ-уджалӧ кывкутӧмӧн да бура. <>
Лист боксӧ дасьтіс Александра АРТЕЕВА. Снимокъясыс ӧтуввезйысь.