Таво сентябрь 1 лунӧ Кулӧмдін районса Помӧсдін сиктысь велӧдысь-велӧдчысьяс пырисны выль школаӧ. 40 во найӧ виччысьӧмӧн виччысисны тайӧ шуда лунсӧ. Ӧд бӧръя кадӧдз челядькӧд уджсӧ вӧлі котыртӧма ӧкмыс(!) стрӧйбаын, кодъясӧс кыпӧдлӧмаӧсь 1890, 1910, 1915, 1935, 1950, 1955, 1978, 1983 да 1995 воясын, да вӧлі зэв деливӧ ветлыны котравны сэтчӧ-татчӧ велӧдысьяслы кӧть велӧдчысьяслы.
Выль стрӧйбалӧн коланлун йылысь сёрниыс кыптыліс унаысь нин. И со 2018 воын уджыс пансис. Чайтісны 2020 воӧ помавны, но пӧдрадчикыс абу ставсӧ колана ногӧн вӧчӧма да, школа сдайтан кадыс нюжаліс содтӧд кык во.
Медбӧрти дыр виччысяна здукыс воис. Сентябрь 1 лунӧ, зэра поводдя вылӧ видзӧдтӧг, ставӧн чукӧртчисны выль школа йӧрӧ. Тані котыртлісны челядьлы кыпыд линейка, лэптісны Коми Республикалысь да Россиялысь дӧрапасъяс. Дерт жӧ, юргисны кыпъяс.
Велӧдысь-велӧдчысьясӧс Коми Республикаса юралысь нимсянь чолӧмаліс правительствоӧн веськӧдлысьӧс вежысь Лариса Карачёва. Выль стрӧйбасӧ видзӧдлісны-донъялісны да бур сиисны велӧдӧм, наука да том йӧз политика министрлысь удж вӧчысь Наталья Якимова да Кулӧмдін районса администрацияӧн веськӧдлысь Сергей Рубан.
И со, гӧрд ленточка лои вундӧма. Челядь, налы тӧдӧмлун сетысьяс, гӧсьтъяс – ставӧн гузьгысисны-пырисны выль школаӧ. И налӧн син водзын воссис… дзик быттьӧ карса школаясысь ӧти. Югыд, мича, гӧгӧрбок мичмӧдӧма-пелькӧдӧма-мавтӧма, уна сикас ӧнія выль оборудование – синмыд шензьӧ, он тӧд, кодарлань видзӧдлыны.
– Тайӧ школа воссьӧмсӧ виччысим нелямын во, – нимкодьпырысь шуис Сергей Рубан. – Вӧлі уна мытшӧд-падмӧг, но колана вын пуктӧм бӧрын ӧні ми выль стрӧйбаынӧсь, нимкодясям, радлам.
Ме серти, Помӧсдінса школаын велӧдысь-велӧдчысьяс молодечьяс, быдторйын водзмӧстчӧны, вывті унатор вӧчӧны, шедӧдӧны районын да республикаын гырысь вермӧмъяс, и чайта, водзӧ вылӧ кутасны нимавны район да республика пасьталаын.
Кыв босьтіс и Помӧсдінса школаысь директор Лариса Шомысова:
– Челядь дыр эз эскыны, мый кутасны велӧдчыны карса кодь школаын. Да и велӧдысьяс вывті радӧсь, томуловкӧд уджавнысӧ выль позянлунъяс лоисны да. Миян тані ставыс эм: компьютер-тренажёръяс, уна сикас лаборатория, торъя сёянін, актӧвӧй да кык спортзалъяс, шойччанінъяс. Кутас уджавны и сідз шусяна «Точка роста» – физика, химия, информатика да биология пыдісянь велӧдан кабинетъяс.
Да и школа йӧрас быдтор ӧні эм. Гажтӧмтчыны лоӧ некор.
А шыӧдчывны кӧ история дорӧ, Помӧсдінын медводдза школаыс воссьӧма 1861 воын. Тайӧ каднас вежсьӧма 16 директор. Лариса Шомысова коймӧд во юрнуӧдӧ. А сыӧдз комын вит во веськӧдлӧма Фрида Эммануиловна Линдт.
Помӧсдінса школалӧн эм юкӧн и орчча Скӧрӧдумын, кӧні челядь босьтӧны тӧдӧмлун ӧкмысӧд классӧдз. Помӧсдін-Скӧрӧдумысь ӧтув арталӧмӧн тані велӧдчӧ 482 ныв-зон. Уджалӧ накӧд квайтымын куим велӧдысь. Унджыкыс, дерт, вӧвлӧм быдтасъяс.
Тӧдӧмлунла котралӧны орчча Кырныша, Скӧрӧдум, Мӧдлапӧв, Сордйыв, Выльгорт, Бадьёльйыв, Вӧльдін, Діасёръя, Ягкӧдж, Пузла, Ярашъю да Великополье сикт-грездысь ныв-зон.
Помӧсдінын эм интернат, кӧні выльлунсянь субӧтаӧдз олӧны 10-11 классын велӧдчысьяс да кодъяслы гортаныс быд лун ветлынысӧ абу кивыв, ылын да. Татшӧмыс дас сизим ныв-зон.
Торйӧн колӧ пасйыны, мый Помӧсдінса школаын велӧдчысьыс уна. Эмӧсь параллеля классъяс: «а», «б», «в», кутшӧмъясын кӧ и «г» на. Первой классыс таво куим, кӧні артавсьӧ 48 зонпосни. Дас ӧти класс помалысьыс – 25. Казьтыштӧй, кутшӧм нӧшта сикт вермас ошйысьны та мында быдтаснас?
* * *
Чолӧмалам и ми помӧсдінсаӧс выль школаӧ пырӧмӧн! Выльыд тай пыр выль, да и сетас челядьлы ёна унджык позянлун босьтны зумыд тӧдӧмлун. Быд классын эм колана мында ӧнія оборудование: тайӧ и компьютер, и интерактивнӧй дӧска, и уна мукӧдтор, мый отсалас велӧдысьяслы нуӧдны интереснӧй урокъяс.
А челядь вермасны содтыны тӧдӧмлуннысӧ кӧть кутшӧм предметысь да радейтана велӧдысьыс дорын. Мед сӧмын кӧсйӧмныс вӧлі-а! <>
Надежда ПУНЕГОВА.
Снимокъясыс ӧтуввезйысь.