Кутшӧм долыд коллявны шойччан лунъястӧ вӧр керкаын! Гӧгӧр лӧнь, шы ни тӧв… Тані тэ шойччан быдлунъя тӧждысь да удж-ноксьӧмысь…
Удора районса Кӧдж сиктын олысьяслӧн «ВКонтактеын» «Кривое life» котырын тайӧ сёрникузяыс бара на ышӧдіс тӧдмӧдны «Коми му» газет лыддьысьысьясӧс сэтчӧс выльторъясӧн.
Со неважӧн Кӧдж сиктысь кык гозъя – Юлия да Алексей Остаповъяс да Виктория да Алексей Яковлевъяс – ветлӧмаӧсь вӧр керкаӧ. Видзӧдлӧй, кутшӧм мича снимокъяс налӧн артмӧма!
–Зонъяс ичӧтсянь вӧралӧны, чери кыйӧны, тшӧтш и гӧтыръяснысӧ велӧдӧны, – висьталӧ «Кривое life» котыр нуӧдысь Мария Зорина. – Керкаыс Лёша Остаповлы дедсяньыс кольӧма, сійӧ зэв бур вӧралысьӧн вӧлӧма. Кык Лёша весиг пыжъяс вӧчӧны, вӧралӧм да чери кыйсьӧм йылысь нуӧдӧны «Ютуб» каналын видеоблог.
Остаповъяслӧн керкаыс зэв важся, сулалӧма нин гражданскӧй война кадӧ, весиг пӧ сэтчӧ дзебсьывлӧмаӧсь еджыдъяс ли гӧрдъяс. Вӧр керка местасӧ да дедныслысь нимсӧ эз висьтавны, эскӧм-традиция серти пӧ оз позь. Вашка ю берег пӧлӧн вель на уна вӧр керка сулалӧ, выльясӧс кыпӧдӧны и.
А со сьӧд пывсяныд пӧ некодлӧн абу. Тӧвнас машинаӧн да буранӧн воӧдчӧны, гожӧмнас ёнджыкасӧ пыжӧн.
–Ветлӧдлӧны вӧр керкаӧ тшӧкыда, видзӧны-дӧзьӧритӧны сійӧс. Мича местаын керкаыс, неылын петӧ сӧстӧм ваа ключ. Тайӧ том йӧзыс сиктӧ кольччисны овны. Уджалӧны, сцена вылын петкӧдчӧны, челядьӧс быдтӧны, Кӧдж сикт нимӧдӧны, вӧр-вакӧд сӧглас олӧны, – кывкӧрталіс Мария Зорина.
Галина МАКАРОВА. Снимокъясыс «ВКонтактеын» «Кривое life» котырысь.