Дыр нин мӧвпалім дасьтыны асланым ичӧт быдтасъяслы – Сыктывкар бердса Вылыс Максаковка посёлокысь 120-ӧд номера детсадйӧ котралысьяслы – ывлавывса верандаын мыйкӧ аслыспӧлӧстор, да мед нӧшта и пӧльза лои.
Регыдӧн и чужис «Менам чужан му» уджтас. Окота лои козьнавны асланым дзолюкъяслы национальнӧй нырвизьын серпасалӧм-лӧсьӧдӧм ворсанін. Татшӧм ногӧн ми ныв-зонлы радлун козьналам и коми войтырлӧн оласногӧн да история-традицияӧн тӧдмӧдам.
Верандаӧ пыригӧн посниуловӧс вочаалӧ коми легендаса герой Пера-багатыр, сэні жӧ варгыль кока ош да тэрыб кӧр. Эгӧ вунӧдӧй и Коми Республикалысь канпас да дӧрапас серпасавны.
Веранда пытшкас нин челядьӧс нимкодьӧдӧ мича Зарань. Зонпосни окотапырысь видзӧдалӧны коми орнамента серпасъяс, пырӧдчӧны «Тӧдмав сер», «Корсь пӧвсӧ», «Кодлӧн кок туйыс?» да уна мукӧд дидактическӧй ворсӧмӧ.
А нӧшта веськыдладор стенас серпасалӧма маличаа ныв-зонмӧс, чум, войвыв кыа, сэні жӧ Коми Республикалӧн ыджыд карта, кодӧс дасьтӧма интерактивнӧй пособие моз.
Шуйгаладорас лӧсьӧдӧма коми керкалысь пельӧс, кӧні посниулов ворсігмоз тӧдмасьӧны важся коми войтырлӧн быдлунъя олӧмын вӧдитчан гортса кӧлуй-эмбурӧн.
Мича да аслыспӧлӧс веранда артмис ичӧтик музей кодьӧн. Зэв нимкодь, мый дзолюкъяслӧн лои позянлун сэні ворсны да такӧд тшӧтш тӧдмасьны чужан мулӧн историяӧн да коми войтырлӧн традицияясӧн.
Алтынай Иватовна Калинина да Елена Брониславовна Драпиковская,
Вылыс Максаковка посёлокса 120-ӧд номера детсадйысь воспитательяс.