Айму вӧсна Ыджыд Вермӧм лун водзын окота казьтыштны менам бать да сылӧн вокъяс йылысь, ставӧн найӧ – войнаса участникъяс.
1941-1942 воясӧ Кулӧмдін районысь Вочса сиктсӧвет улӧ пырысь Дёма грездысь менам дед Степан Ефремович Зюзев Айму дорйыны ыстіс вит пиянӧс: Фёдорӧс, Василийӧс, Антонӧс (менсьым батьӧс), Ильяӧс, Семёнӧс да нӧшта на Алексей внуксӧ. Гортас бӧрсӧ локтісны сӧмын Семён да Алексей внукыс…
Гортас колисны гӧтыръяс да ичӧт ныв-пи. Но и сюрлі жӧ сьӧкыд война кадӧ сэкся челядьлы да нывбабаяслы уджыд! Помнита, первой классын урокъяс бӧрын мунлім колхозса муяс вылӧ чукӧртны нянь шеп. Миян вӧлі девиз: «Колос к колосу – Родине сноп!».
Гырысьджык челядь идралісны картупель да капуста-сёркни. Войнадырся челядь пӧвстысь унаӧн нин абу ловъяӧсь… А со внук-внучкаыс весиг оз тӧдны асланыс пӧльяс йылысь – таысь ыджыд шог босьтлӧ.
Казьтышта, война вылын юрнысӧ пуктісны нёль вок: Фёдор, Василий, Антон да Илья. Семён да Алексей внук война вылысь воӧм бӧрын уджалісны Дёма грездса «Труд-Земля» колхозын. Семён кувсьылӧма Кулӧмдінын 1991 воын, а со Алексей внук йывсьыс рӧдвужыс ёна нинӧм висьтавны эз кужны.
Менам бать Антон Степановичлы вичмӧдӧмаӧсь ыджыд тӧдчанлуна «За отвагу» медаль, но ми сійӧс эг и аддзылӧй, гортӧдз вайлӧмаӧсь эськӧ, но посниулов кындзи некод абу вӧлӧма да, медальсӧ абу коль-лӧмаӧсь-сетӧмаӧсь, сӧмын удостоверениеыс и коли паметь вылӧ.
Со кутшӧм юӧр сюри «Паметь небӧгын» менам бать да сылӧн вокъяс йылысь.
–Антон Степанович Зюзев, чужлӧма Пӧддельнӧй сиктын 1904 воын, фронт вылӧ босьтӧмаӧсь 1942 во- ся май 5 лунӧ. Рядӧвӧй, служитлӧма 192-ӧд гвардейскӧй стрелкӧвӧй полкса 63-ӧд стрелкӧвӧй дивизияын. Пӧгибнитӧма 1944 вося март 11 лунӧ. Гуалӧмаӧсь Эстонияса Лилианбахи грездын, а сэсся выль пӧв дзебӧмаӧсь Ленинград обласьт-са Ивангородӧ братскӧй гуӧ.
–Фёдор Степанович Зюзев, чужлӧма Пӧддельнӧй сиктын 1901 воын, война вылӧ мунӧма 1941 вося декабрь 28 лунӧ. Рядӧвӧй, служитлӧма 54-ӧд армиялӧн 219-ӧд стрелкӧвӧй полкса 11-ӧд дивизияын. Пӧгибнитӧма 1942 вося февраль 4 лунӧ. Дзебӧмаӧсь Ленинград обласьтса Погостье станцияын.
–Василий Степанович Зюзев, чужлӧма Пӧддельнӧй сиктын 1902 воын, фронт вылӧ босьтӧмаӧсь 1941 вося октябрь 25 лунӧ. Ефрейтор, служитлӧма 141-ӧд стрелкӧвӧй полкса 85-ӧд дивизияын. Усьӧма 1943 вося октябрь 14 лунӧ. Дзебӧмаӧсь Ленинград обласьтса Пулково районын.
–Илья Степанович Зюзев, чужлӧма Пӧддельнӧй сиктын 1910 воын, война вылӧ мунӧма 1941 вося июль 26 лунӧ. Старшӧй лейтенант, служитлӧма 1068-ӧд стрелкӧвӧй пол-кын. Пӧгибнитӧма 1944 вося июнь 22 лунӧ. Дзебӧмаӧсь Карелияса Ягляярви районын.
Со ӧд, лыддян юӧрсӧ да, сьӧрсьӧн-бӧрсьӧн и мунӧмаӧсь вокъяс фронт вылӧ… Дедӧлӧн вит пиянысь нёльнаныс юрнысӧ пуктӧмаӧсь Рӧдина вӧсна…
Вайӧ став рӧдвужӧн, ыджыд пыдди пуктӧмӧн да сьӧлӧмсянь казьтыштам найӧс Победа лунӧ…
Лина Антоновна Логинова,
Антон Степановичлӧн ныв.
Сыктывкар.
Снимокъяс вылын: менам бать Антон Степанович Зюзев; батьлӧн вок – Илья Степанович Зюзев; батьлӧн братскӧй гу, батьлӧн документ-справка, «За отвагу» медальлӧн удостоверение.