«Монди Сыктывкарса ЛПК» отсӧгӧн Сыктыв районын дзоньталісны социальнӧй тӧдчанлуна стрӧйбаяс да отсалісны ас вылӧ уджалысьяслы.
Кыдз юӧртісны районса администрацияысь экономика да предпринимательство юкӧнсянь, социальнӧя да экономикаын ёртасьӧм кузя сёрнитчӧм серти 2020 воын компания вичмӧдӧма муниципалитетлы 5 миллион 258 сюрс шайт. 57 прӧчент сьӧмсӧ лои видзӧма уджалаӧнінъяс сӧвмӧдӧм да выльясӧс восьтӧм вылӧ, 43% весьтас бергӧдӧма социальнӧй юкӧнлы тӧдчана удж-нок – дзоньталӧма школа-сад да культура стрӧйбаяс.
Ичӧт бизнеслы отсалӧм да выль уджаланінъяс восьтӧм вылӧ Сыктыв районын вичмӧдӧмаӧсь матӧ 3 миллион шайт. Та весьтӧ кызвыннас выльмӧдӧмаӧсь ывла югзьӧдан тэчас.
Торйӧн кӧ, ньӧбӧмаӧсь Визинын, Заозерьеын, Поёлын, Палаззяын да Куратовын би сюръяяс сувтӧдан-вежлалан экскаватор-погрузчиклы оборудование. Та серти збыльмӧдӧмаӧсь куим проект нин.
Сідз, Заозерьеын вежӧмаӧсь би видзтан 60 лампа, 350 метр сутуга-провод, сувтӧдӧмаӧсь содтӧд нёль сюръя да электрощитокъяс. Таысь ӧтдор медавлӧмаӧсь пӧдрадӧн монтёрӧс. Уджтассӧ збыльмӧдӧм вылӧ видзӧмаӧсь 475 сюрс шайт.
Палаззяын вежӧмаӧсь би видзтан 30 лампа, 500 метр сутуга-провод, лӧсьӧдӧмаӧсь 3 электрощиток да та мында жӧ таймер. Дерт, медавлӧмаӧсь и электромонтёрӧс. Проектыс сувтӧма 216 сюрс шайт дон.
Визинын, Куратовын да Поёлын уджыс водзӧ мунӧ.
Социальнӧй юкӧнын уджтасъяс бергӧдӧм могысь вичмӧдӧмаӧсь 2 миллион 261 сюрс шайт. Визиндорса школаын 755 сюрс шайт дон тэчӧмаӧсь ПВХ-ысь 31 выль ӧшинь. Визинса 1-ӧд да 10-ӧд номера детсадъясын тшӧтш пуктӧмаӧсь пластик ӧшинь – кыкнанлаас кызь ӧтиӧн. Та вылӧ мунӧма 1,1 миллионысь унджык шайт.
Кыдзи пасйисны районса администрацияын, тайӧ детсадъяссӧ кыпӧдӧмсяньыс ӧнӧдз капитальнӧя абу на дзоньтавлӧмаӧсь. Дерт, сэсся та дыранад ӧшиньясыс сісьмӧмаӧсь.
«Рамаясыс косьмисны-потласисны, тшӧкӧтурка-краскаыс гылаліс. Мукӧд ӧшиньыс вӧлі некымын стеклӧ торйысь. Тӧвнас кага видзанінын вӧлі кӧдзыд, тӧлыс жвиньгис пырыс да. Сэк жӧ и восьтывны тӧлӧдны жыръяссӧ позянлуныс эз вӧв: кызвын ӧшиньсӧ вӧлі тупкӧма-тувъялӧма, медым челядь эз доймавны. А тайӧ – СанПиН норма торкалӧм нин», – висьталісны администрацияын.
Муниципалитетын сідзжӧ юӧртісны, мый «Монди Сыктывкарса ЛПК»-лӧн сьӧма отсӧгӧн районын збыльмӧдӧны и мукӧд уджтас.
Сідз, «Коми войтыр» ӧтмунӧмсалы вичмӧдӧма быдсикас гаж-аддзысьлӧм, тшӧтш и коми войтырлысь быдвося конференция котыртӧм-нуӧдӧм, козин да ручка-блокнот ньӧбӧм могысь сьӧм.
Сьӧма отсӧг весьтӧ нимӧдӧмаӧсь тшӧтш Куниблысь да Поёллысь тшупӧда пасъяс. Торйӧн кӧ, сиктъясас ньӧбӧмаӧсь мича баннеръяс.
«Дача РК» ООО-лы вештӧмаӧсь 300 сюрс шайт Сыктыв районса администрациялӧн удж йылысь радиороликъяс дасьтӧм-йӧзӧдӧмысь.
«Дачаыс» – сыктывсалы районын да Коми Республикаын олӧм-вылӧмӧн тӧдмӧдан, выльторъяс юӧртан дзик ӧти FM-радиостанция», – тӧдчӧдісны муниципалитетын.
Пасйисны тшӧтш, мый «Монди Сыктывкарса ЛПК» вичмӧдӧ районлы ыджыд отсӧгсӧ уна во нин.
«Ёртасьӧм йылысь сёрнитчӧмӧн тайӧ каднас унатор нин лои вӧчӧма. Сыктыв районса администрация пыдди пуктӧ да вылӧ донъялӧ «Монди Сыктывкарса ЛПК»-кӧд ёртасьӧмсӧ. Кутам лача, тайӧ йитӧдыс и водзӧ на ёнмас-крепаммас», – кывкӧрталісны муниципалитетын.
«Комиинформ» агентстволӧн юӧр серти.