Чужан керка стенын кузь кӧрт тувйын ӧшалӧ «Югыд туй» газетлӧн уна-уна петас, важджыкъясыслӧн лист бокъясыс шондісьыс вижӧдышталӧмаӧсь нин… А ёна жӧ ыджыдӧсь да паськыдӧсь лист бокъясыс! Буретш татшӧм медводдза казьтылӧмыс сувтӧ син водзын ӧнія «Коми му» газет йылысь…
А кутшӧм нимкодь вӧлі, кор уна во сайын «Коми муын» петіс менам медводдза гижӧд! Коми Республикаса медшӧр газетын менам статья! Гашкӧ, сёысь лыдди-листалі сэсся петассӧ. И со меным вӧзйисны босьтчыны веськӧдлыны «Коми муӧн», лоны шӧр редакто-рӧн республикаса медваж петасын! Ме, дерт, ӧнӧдз на ог эскы таӧ… Збыльысь, зэв ыджыд кывкутӧмӧн колӧ босьтчыны да нуӧдны тайӧ уджсӧ. Мӧвпыштлан да, 102 вонад мыйта нималана йӧз вӧліны тайӧ газетас шӧр редакторъясӧн: Виктор Алексеевич Савин (редколлегияас сэки тшӧтш зілис Василий Ильич Лыткин), Дмитрий Ильич Зезегов, Александр Васильевич Сажин, Геннадий Васильевич Беляев, Александр Васильевич Ульянов, Надежда Николаевна Быковская, Григорий Фёдорович Хатанзейский…
И со Елена Владимирова Плетцер ассьыс редакторалан «вӧжжисӧ» сетіс меным да шуис: 17 во нин пӧ СМИ-ын зілян да, кад нин! Дас сизим во эськӧ да, но ӧд ме дас квайтсӧ томуловлы «Йӧлӧгаын» (сэки газетын на) зіли, дас кыксӧ – главнӧй редакторӧн вӧлі. «Йӧлӧгаыд» этшаджык лист бока вӧлі, да и томуловыдкӧд кокньыдджык быттьӧ…
Кольӧм восянь лои «Коми йӧзӧдчан керкаын» веськӧдлысьӧс вежысьӧн. Чайта да, тайӧ кык кывкутана удж нуӧдӧмыс кутас ёнджыка на отсавны оз сӧмын «Коми му» видзны-нимӧдны, но и миянлысь мукӧд коми петас сӧвмӧдны.
Ыджыд лача кута «Коми му» газетса котыр вылӧ – вёрстка вӧчысьяссянь журналистъясӧдз. Ен сыкӧд, миян уджалысьяс ыджыд сямаӧсь да тӧлкаӧсь. Ёна кута виччысьны внештатнӧй гижысьяссянь юӧр-статьяяс. Эн полӧй гижны комиӧн (да кӧть и рочӧн – зіля вуджӧдам), юксьӧй миянкӧд сикт-грездса выльторлоӧмторъясӧн да тӧжд-могӧн. А сэсся, кыдз шуласны, олӧмыс петкӧдлас…
Сиа «Коми му» газет лыддьысьлы сӧмын став бурсӧ. Видзӧй, сёрнитӧй, нимӧдӧй чужан кывнытӧ да некор эн яндысьӧй сыысь. А нӧшта (ӧнія пандемияӧн) – лоӧй дзоньвидзаӧсь, видзӧй асьнытӧ да матыссатӧ!
Галина МАКАРОВА,
«Коми йӧзӧдчан керкаын» веськӧдлысьӧс вежысь да «Коми му» газетын
шӧр редакторлысь удж вӧчысь.