Изьва районса Краснобор сиктысь Марина Терентьева дас гӧгӧр во нин олӧ Карелияын. «Калевала» муӧ ныв кольччис Петрозаводскса консерватория помалӧм бӧрын.
–Марина, кыдзи артмис, мый Красноборса нывка велӧдчис дирижёрӧ Петрозаводскын?
–Менам олӧмын ичӧтсянь вӧлі шылад. Дас ӧти арӧсӧн пыри велӧдчыны республикаса искусствояс гимназияын музыка юкӧнӧ. Дерт, водзвыв сёрнитім бать-мамкӧд да, эз вӧвны паныд. Гимназияын хорӧвӧй юкӧн помалӧм бӧрын муні водзӧ босьтны Коми Республикаса искусствояс колледжын «дирижёр» специальносьт. Тайӧ каднас ме эг на тырвыйӧ гӧгӧрво, кытчӧ ме «сираси» да мый виччысьӧ творческӧй туй вылын. Колледж бӧрын нырвизьсӧ бӧрйыны эз вӧв кокни. Гӧгӧрвои, мый окота велӧдчыны водзӧ, босьтны вылыс тшупӧда тӧдӧмлун. Ӧти курсын велӧдчысь ёртӧй корис тшӧтш мунны Петрозаводскӧ. Ме и муні. Регыд нин 10 во лоӧ, кыдз ме ола Карелияын. Тайӧ каднас бӧрйӧм туйвизь йылысь ньӧтчыд эг жалитлы.
–Аддзин асьтӧ удж-олӧмад?
–Аддзи. Петрозаводскса консерватория помалӧм бӧрын некымын во уджалі шылада школаын, велӧді челядьӧс сьывны хорын, нуӧді вокал да теория предметъяс. 2018 воын вуджи Карелияса йӧзкост творчество да культураын водзмӧстчӧмъяс шӧринӧ. Тані методистала, кута йитӧд регионса творчествоа котыръяскӧд. Шӧринын уджӧй помасяс да, филармонияын веськӧдла любительскӧй хорӧн, дирижируйта.
–Карелия, кыдзи и Коми – финн-йӧгра му. Эмӧсь-ӧ регионъяс костын культура йитӧдъясыс?
–Котыртны коми диаспора Карелияын эз артмы. Та могысь колӧ дугдывтӧг зільны, а некымынлаын уджалігад тайӧс вӧчны сьӧкыд. Коми руыс ӧвтыштлӧ сӧмын «Финно-угорский транзит» дырйи, кодӧс котыртӧ Россияса финн-йӧгра шӧрин, да Петрозаводскӧ сійӧ тшӧтш волӧ.
Вужвойтыр лунӧ, моз тӧлысся 9 лунӧ, тані котыртӧны «Карельская крууга» флешмоб. Вурӧдлі изьва сарапан да, мича паськӧмӧн кӧсъя пырӧдчыны сэтчӧ, но пыр на мыйкӧ торкӧ.
–Овлӧ-ӧ прӧст кадыд? Кыдзи сійӧс коллялан?
–Прӧст кад овлӧ жӧ. Отпуск дырйи радейта путешествуйтны. Ветлӧдла кыдз Карелияті, сідз и мукӧд муясті. Шуам, ветлі Кижиӧ, Рускеалаӧ, Кивач водопад да Гирвас вулкан дорӧ. Вӧвлі Екатеринбургын, Сочиын, Санкт-Петербургын, Мурманскын, Абхазияын.
Та кындзи шӧринын удж кузя командировкаӧ ветлывны колӧ да, волі Карелияса матӧ быд районӧ.
–Чужанінад бӧр оз кыскы?
–А менам гортӧй кык нин. Пыр кадсяыс – тані, Петрозаводскын. Кор окота шойччыштны да казьтыштны збыльвывса тӧвсӧ – локта Комиӧ, Красноборӧ. Но карса олӧмыс менӧ оз нин лэдз.
–Комикӧд йитчӧм куим кыв?
–Рӧдвуж, колледж, «Снегурочка» кабала.
–Марина, мед став могтӧ артмис збыльмӧдны и удж-олӧмыд вӧлі лючки!
Ирина Терентьева.
Краснобор сикт, Изьва р.