Велалім нин «Кор? Кӧні? Мый?» ворсӧмын вермасьны тулыснас, а таво со арнас ковмис. Да и ёрта-ёртӧс монитор пыр видзӧдӧмӧн. Висьтавны оз ков, мыйла – асьныд бура тӧданныд.
Ворсанногсӧ на ковмис вежыштны: водзті вочавидзліс кисӧ медводдзаӧн лэптысь команда, ӧні жӧ ӧти минут мӧвпалӧм бӧрын быд котыр висьтавліс ассьыс вочакывсӧ. Но тайӧ вежсьӧмъяс дорас ӧдйӧ велалім, да ворсӧмсӧ найӧ эз торкны.
И сідз, октябрь 16 лунӧ вермасисны «МИ УдорасаЕС» (Удораса землячествоысь да том войтырлӧн «МИ» котырысь ныв-зон, «КодзувКотыр» (тайӧ командаас ӧтувтчылісны журналистъяс да велӧдысьяс) да «Ас йӧз» (Коми йӧзӧдчан керкаса журналистъяс). Октябрь 20 лунӧ тӧдӧмлунсӧ петкӧдлісны «Кошка-кань» («Юрган» телерадиокомпанияын зільысьяс), «Сярганъяс» (Сыктывкарса 33-ӧд номера школаын велӧдысьяс) да «СГУщёнка» (Сыктывкарса университетысь студентъяс).
Кык ворсӧм бӧрын финалӧ петісны «Ас йӧз» да «Сярганъяс». Медводдза места вӧсна найӧ венласисны октябрь 23 лунӧ. Тайӧ ворсӧмсӧ позис видзӧдны (и ӧні на позьӧ) юркарса коми культура шӧринлӧн ӧтуввезса vk.com\komi_kultura лист бокын.
Буретш Сыктывкарса коми культура шӧрин некымын во нин котыртӧ ворсӧмсӧ. Налы ёна отсасьӧны юалӧмъяссӧ дасьтысьяс. Та пӧрйӧ на лыдын вӧлӧмаӧсь Кыв, литература да история институтын уджалысьяс Евгений Цыпанов, Лидия Сурнина, Алексей Рассыхаев, вужвойтырлӧн шылада-драмаа театрысь Евгения Удалова, Национальнӧй музейысь Светлана Нестерова, Национальнӧй библиотекаысь Снежана Журавлёва да Татьяна Олифир, искусство гимназияын велӧдысь Лидия Зварич да сылӧн велӧдчысьяс: Виктор Вольгин, Светлана Ивашева, Алина Игушева, Янина Вокуева, госслужба академияысь студент Даниил Цывунин, юркарын олысьяс Наталья Шахова, Максим Канов, Елена Рассыхаева, Кулӧмдін районса шӧр библиотекаын зільысь Руслана Нехорошева, Помӧсдін сиктысь вӧвлӧм велӧдысь Юлия Рогожникова, Пожӧгысь Владимир Шомысов да Николай Игнатов, Кӧрткерӧс районса М.Н.Лебедев нима библиотекаын уджалысь Галина Изъюрова, Одыбысь Татьяна Габова, Печораса, Княжпогост да Изьва районъясса музейясын зільысьяс Ольга Капустина, Оксана Лятиева да Антонина Артеева, Санкт-Петербургысь А.И.Герцен нима университетын велӧдысь Игорь Бродский. Гежӧда казьтывлам татшӧм отсасьысьяссӧ да, сы вӧсна ставнысӧ лыддьӧдлі-пасйи. Эз став юалӧмыс веськав тавося конкурсӧ, тӧдӧмысь, найӧ юргасны локтан ворсӧмъясын.
Юалӧмъяс йылысь сёрниӧ кӧ воим, некымынӧс казьтышта. Видлӧй на вылӧ вочавидзны. Артмас кӧ тайӧс вӧчны, чукӧртӧй ассьыныд команда да тшӧтш ворсӧй.
Даниил Цывунин юалӧма, мый пӧ ӧткодьыс Висер вожса тӧдысь Тювӧ да Леонардо да Винчи костын? Командаяс та вылӧ ылӧсас вочавидзисны да содтӧд син эз нажӧвитны.
Евгения Удалова Уралса Торре-Порре-из йылысь казьтыштӧма. Манси пӧ тайӧ платосӧ шуӧны Монинг-тумпӧн – дзик жӧ комияс моз, ми сӧмын ас кывйӧн нимтам. А комисьыс рочӧдігас шыяссӧ дзугӧмаӧсь да, Торре-Порре-изйӧн и лоӧма. Кыдз нӧ пӧ эськӧ збыльысьсӧ коминас шусьӧ? Ворсысьяс эз кужны вочавидзны, «Ас йӧзлӧн» мӧвпавны кад кольӧм бӧрас нин стӧч вочакывйыс сюрис, но вӧлі сёр нин.
Лидия Сурнина вайӧдӧма журналист да критик Геннадий Беляевлысь кывъяссӧ: тайӧ гижысьыслӧн пӧ вӧлӧма дасысь унджык сайним-псевдоним (мукӧддырйиыс сӧмын дурыштӧм могысь найӧс думыштлӧма): Берестов Матвей, Эжвинцев Максим, Холдоняк Матвей, Холодняк Тихон, Дзӧля Демьян, Бывший паломник, Гӧль морт, Бур морт, Куридов, Еловая Шишка, Сидор Безземельный, Войтыров М. Коді нӧ пӧ тайӧ гижысьыс?
Конкурссӧ донъялысьяс шензьӧмаӧсь весиг, мыйла пӧ некод эз куж вочавидзны юалӧм вылас. Видлӧй тайӧс вӧчны ті, «Коми му» лыддьысьяс.
Снежана Журавлёва татшӧм юалӧм ыстӧма: «1840 вося гожӧмын Печора бокса муяс туялігӧн промышленник Василий Николаевич Латкин пасйӧма луннебӧгас: «Войколалім пыжын перевоз бокын, мынтім вот». Кодлы мынтӧмаӧсь вотсӧ Василий Латкин ёртъясыскӧд?».
Вочакывйыс зэв кокни, но воӧдчыны сыӧдз ни ӧти команда эз вермы.
Тайӧ юалӧмсӧ вылӧ донъялісны и жюриӧ пырысьяс, и ворсысьяс да сетісны Снежана Журавлёвалы медбур юалӧмысь диплом.
А медбур ворсысьӧн жюри шуис «Сярганъяс» котырысь Елена Ветошкинаӧс.
Кад воис и финалын вермысьӧс пасйыны. «Кор? Кӧні? Мый?» конкурсын ставнысӧ ордйис «Ас йӧз» команда. Тайӧ котырыслы и вичмис медыджыд призыс – пуысь вӧчӧм сюзь. Мӧдӧд во дорвыв найӧ – медся сюсьӧсь.
Павел Симпелев.
Снимокъясыс ӧтуввезйын
vk.com|komi_kultura лист бокысь.