Войвылын, а стӧчджыка кӧ – Россиялӧн Арктикаса муясын – уджалӧ уна гырысь предприятие. Сэні олысь этша лыда вужвойтыр водзын бизнеслӧн кывкутӧм йылысь кабала-документ дасьтӧны Ылі Асыввыв да Арктика сӧвмӧдан Россияса министерствоын (минвостокразвития).
Тайӧ вежонӧ баласӧ видлалісны-донъялісны Арктикаса Общественнӧй сӧветын. Сӧветсӧ, кытчӧ пырӧны Карелияысь, Комиысь, Якутияысь, Ненеч, Ямал-Ненеч да Чукотка кытшъясысь, Мурманск, Кардор обласьтъясысь, Красноярск крайысь 19 морт, вӧлі котыртӧма 2020 вося сентябрь 30 лунӧ. Миян республикаысь Россияса Арктика муясӧн лыддьыссьӧны Чилимдін район, Усинск, Инта да Воркута. Ӧтуввез пыр нуӧдӧм чукӧртчылӧм дырйи мукӧд регионсакӧд тшӧтш документ баласӧ видлалісны Коми Республикаса Общественнӧй палатаӧн веськӧдлысьӧс вежысь Анна Чуракова да Торгово-промышленнӧй палатаса президент Юрий Колмаков.
Сёрнисӧ панігӧн минвостокразвитияысь Арктика сӧвмӧдан департаментса директор Александр Павлов пасйис, кута пӧ лача, мый миян ведомстволӧн да Арктикаса Общественнӧй сӧветлӧн ӧтувъя уджыс лоас ыджыд водзӧсаӧн. Арктикаса ичӧт, шӧр да ыджыд бизнесын уджалысьяслы пӧ колӧ пасйысьны Войвывса регионъясас да кырымавны накӧд инвестицияа удж нуӧдӧм йылысь сёрнитчӧм.
А видзӧдны бизнесын зільысьяс бӧрся кутас Ылі Асыввылын да Арктикаын йӧзлысь оласногсӧ бурмӧдан агентство.
Документын бизнесменъяслы вӧзйӧны уджавны Войвылын вужвойтырлысь тӧждъяссӧ тӧд вылын кутӧмӧн, отсавны налы, видзны вӧр-васӧ. Юрий Колмаков шуис, оз пӧ вӧзйыны, а тшӧктыны колӧ тадзисӧ уджавны.
–Сӧмын кӧ вӧзъян – кодкӧ вӧчас, а кодкӧ – и оз, – пасйис сійӧ. – Компанияяс, торйӧн нин гы-рысьясыс, мед восьсӧн висьтасьӧны, ӧтдортӧны-ӧ найӧ либӧ пыдди пуктӧны вужвойтырлысь корӧмъяссӧ. Мед тшӧтш и та серти акция кутысьясыс да партнёръясыс донъяласны налысь уджсӧ.
Минвостокразвитияысь чина войтыр вочавидзисны Юрий Колмаковлы, медвойдӧр пӧ тӧдмалам вужвойтырлысь да бизнесменъяслысь видзӧдлассӧ да сэки нин пасъям документас, вӧзйыны предпринимательяслы либӧ тшӧктыны найӧс кывкутӧмӧн матыстчыны войвывсалӧн корӧмъяс дорӧ.
Сӧветӧ пырысьяс кӧсйӧны ӧтув уджавны этша лыда вужвойтырлӧн котыръясын зільысьяскӧд. Тайӧ вӧзйӧмсӧ тшӧтш ошкисны.
Документсӧ вынсьӧдасны гӧгӧрбок видлалӧм бӧрын.
Чукӧртчылігӧн сёрнитісны и Арктикаса Общественнӧй сӧветӧн веськӧдлысьясӧс бӧрйӧм йылысь. Юрнуӧдысьӧ вӧзйисны М.В.Ломоносов нима Войвывса (Арктикаса) федеральнӧй университетса ректор Елена Кудряшоваӧс да Войвылын, Сибырын, Ылі Асыввылын олысь этша лыда войтырлӧн ассоциацияса президент Григорий Ледковӧс. Анна Чураковаӧс вӧзйисны сӧветӧн юрнуӧдысьӧс вежысьӧ.
Сӧветӧн веськӧдлысьясӧс бӧръясны октябрь помын. Сэки жӧ видлаласны Арктикаса вужвойтырлысь нэмӧвӧйся оласногсӧ да уджаланногсӧ видзӧм-сӧвмӧдӧм могысь государствосянь отсӧг вичмӧдӧм кузя программа.
Снимокыс Коми ТПП-ысь.