Дерт, казялінныд нин — журналлысь медводдза лист бок мичмӧдӧ выль логотип — мича, кокни, кыпыд лола. Серпасаліс сійӧс «Йӧлӧгалӧн» бур ёрт Катерина Киланянц, Воронежысь том серпасасьысь. Катериналысь уджъяс: серпасъяс да снимокъяс йӧзӧдлім некымын во сайын. И со ылі карысь ныв бара на миян лист бокъясын. Та пӧрйӧ том серпасасьысь юксис миянкӧд творчество да олӧм вылӧ видзӧдласнас.
Чужлӧма Катя неыджыд карын — Тамбовын. Сизим арӧсӧн нывка медводдзаысь мунӧма художествоа да музыкальнӧй школаясӧ, гижӧма кывбуръяс да шылад. А школа помалігӧн гӧгӧрвоӧма, мый медбура сылӧн артмӧ серпасасьны.
— Век неуна завидьтылі челядьлы, кодъяс быдмисны творчествоа ру пытшкын. Менам мам-бать абу художникъяс ни гижысьяс, но найӧ век ышӧдісны менӧ, эз жалитны сьӧм быдсикас краска-кабала вылӧ, — казьтылӧ челядьдырсӧ Катя.
Кор воӧма кад бӧрйыны велӧдчанін, ныв паныдасьлӧма уна мытшӧдкӧд. Ёна кӧсйӧма
велӧдчыны иллюстраторӧ Москваса Печать институтын, ветлывлӧма просмотръяс вылӧ, дасьтысьӧма экзаменъяс кежлӧ. А сэсся тӧдмалӧма, мый институтӧ босьтӧны сӧмын найӧс, кодъяс во джын ветлӧны сэтчӧс курсъ-яс вылӧ. Семьяын та вылӧ сьӧм эз судзсьы. Виччысьтӧмторсьыс шогӧ усьӧма, кӧсйӧмӧй пӧ чиныштіс. Да и ачыс Катя содтӧ, мый дас сизим арӧснад ёнджыка мӧвпалӧма радейтана зон йывсьыс, коді кольччӧма чужан карӧ. Та вӧсна овмӧдчӧма Воронежын: ӧти боксянь, тайӧ ыджыд кар, а мӧдсянь — Тамбовыд неылын. А татчӧс педуниверситетса графическӧй дизайн факультет лоӧма Катериналы alma maer-ӧн.
Серпасасьысьяс пӧвстын уна самоучка, налы академическӧй тӧдӧмлуныд оз и ков. Но, Катерина серти, бур вузын енбиа мортӧс кы-тшалӧны ас коддьӧмъяс, творчествоа олӧм, конкуренция, велӧдысьяс. Татшӧм аслыспӧ-лӧс руыс велӧдчигӧн нывлы абу тырмӧма, но век жӧ университетын Катя велалӧма дасьтыны проектъяс да быд удж вайӧдны помӧдз.
Диплом дорйӧм бӧрын миян героиня сьӧлӧмсяньыс босьтчӧма уджӧ, серпасалӧма неыджыд типографиялы небӧгъяс, уджалӧма гортсяньыс.
— Гортад эськӧ зэв лӧсьыд, но вочасӧн кутіс гаж бырны йӧзысь. Та вӧсна и муні офисӧ дизайнеравны. Уджаланінӧй лӧсьыд вӧлі: неыджыд, кыпыд. Матӧ во зіли сэні, а сэсся гӧгӧрвои, мый тайӧ тшупӧдыс помасис, да бара понді уджавны гортсянь, — висьталӧ Катерина. — Ме пыр мыйкӧ корся, видла вынӧс выльторйын. Кад вылӧ серпасася, коммерческӧй нырвизьӧ босьтчыла жӧ, ӧні тшӧкыдджыка куті мӧвпавны небӧгъяс дорӧ иллюстрацияяс серпасалӧм йылысь.
Ас вылӧ уджалігӧн колӧ кужӧмӧн вӧдитчыны кадӧн. Катериналы таын отсалӧ лун-вежон-тӧлысь кежлӧ могъяс пуктӧм. Та кын-дзи ныв уджалӧ кад серти: 50 минут зільӧ, 10 минут шойччӧ. Кор узян-олан, сёян режим серти, он вунӧд физкультура йылысь да бура, кыпыда коллялан прӧст кад, сэк и уджавсьӧ кокньыда. Колӧ пӧ лоны ас водзад кывкутысьӧн. Фрилансеръяс, весиг нималана йӧз, овлӧ, уджтӧг кольлӧны, тӧлысь, мӧд, коймӧд… И тайӧ повзьӧдӧ, но век жӧ фрилансын эм уна буртор: уджалан, кор дась, верман зільны мича кофейняын кӧть паркын, оз ков асывсянь рытӧдз пукавны кабинетын. А нӧшта пӧ оз ков йӧз тыра автобусын журъявны — нюмъялігтыр содтӧ Катя.
Сідз шусяна вдохновение вылӧ нывлӧн аслас видзӧдлас, сійӧ пӧ любительяслы колӧ, а мортлы, коді уджалӧ творчествоын, быть пуксьыны пызан сайӧ да вӧчны ассьыс уджсӧ бура. Овлӧны пӧ и интереснӧй корӧмъяс, и сэ-тшӧмъяс мыйысь пӧсь ни кӧдзыд. Но Катерина зільӧ пӧртны олӧмӧ заказчиклысь корӧмсӧ сідз, быттьӧ тайӧ колӧ медводз аслыс.
Медым удж эз дышӧд да вайис шуд, серпасасьысь вӧзйӧ водзмӧстчыны вывтіасьтӧг,
прӧст кадӧ — шойччыны. Коркӧ и ачыс войяс, шойччан лунъяс удж сайын коллявлӧма. А ӧні дугдӧ серпасасьны сэк, кор выныс эм на, оз видзчысь мудз. Но блокнотыс век сьӧрсьыс — локтас кӧ мӧвп, бур кӧть тешкодь, пырысь пыр пасйыштӧ, мед оз вун.
— Творчество — тайӧ ачыс олӧмыс, сійӧ, мый сьӧлӧмӧдзыд йиджӧ, и тайӧ абу сӧмын искусство. Позьӧ творческӧя пусьыны, быдтыны кагукъясӧс, машинаӧн журъявны, — юксьӧ видзӧдласнас Катерина. — Творчествоын эм радейтчӧм, асьтӧ да кадсӧ аддзӧм-кылӧм. Кад, кор тэ видзӧдан мог вылӧ, аддзан виччысьӧм петан туйяс да лоан таысь шудаӧн.
Олӧм вылӧ татшӧм видзӧдласыс сетӧ Катялы позянлун водзмӧстчыны уна-уна нырвизьын. Кор юалі, кодӧн, мися, кӧсйин уджавны нӧшта, Катя кутіс лыддьӧдлыны: суйӧрсайса кывъясысь вуджӧдчысь, велӧдысь, саридз туялысь биолог, гижысь, режиссёр, психолог, стилист, массажист, весиг пинь бурдӧдысь. Ставыс пӧ, кӧні оз ков повны дзоньвидзалун да олӧм вӧснаыд.
— Зільӧй вӧчны сэтшӧмтор, мыйысь сьӧлӧм выланыд долыд, мый радейтанныд, мый аслыныд интереснӧ, — вӧзйӧ «Йӧлӧга» лыддьысьяслы Катерина Киланянц
Мария Игушева
Снимокъясыс Катерина Киланянцлӧн гортса архивысь