Усинск да Чилимдiн районъясысь Айму вöсна Ыджыд тышса ветеранъяслы да олöма вермытöм йöзлы быд лун колана сёян-юан вичмöдiс «ЛУКОЙЛ-Коми» мусир перъян компания.
Коронавируса пандемия дырйи ыджыд арлыда йöзöс быд лун колана сёян-юанöн могмöдöмын сьöкыдлунъяс йылысь висьталiсны мусир перйысьяскöд аддзысьлiгöн ветеранъяслöн меставывса сöветъясöн да вермытöмъяслöн котыръясöн веськöдлысьяс. Усинск да Чилимдiн районъясын олысьяс пиысь уналы чорыда мöрччис тайö ускöттьöыс. Ыджыд арлыд, а сiдзжö омöль дзоньвидзалун понда налы сiдз нин сьöкыд ветлыны лавкаö, а öнi нöшта на и коронавирусыд вермас кокньыда кöвъясьны. Сэк жö уналы рöдвужыс оз вермыны отсасьны, бокынöсь да.
Ветеранъяслöн меставывса сöветъясöн да вермытöмъяслöн котыръясöн веськöдлысьяскöд öтвылысь вöлi кывкöрталöма, мый медводз колö могмöдны сёян-юанöн Айму вöсна Ыджыд тышса ветеранъясöс да 60 арöсысь олöмаджык вермытöм йöзöс.
250 морт вылö артыштöмöн предприятиелöн сьöм вылö ньöбöмаöсь шыдöс, макарон, консерв, тшай, печенньö.
Вöлöгасö разöдтöдз пакетъяссö резöмаöсь антисептикöн, мед некутшöм микроб-вирус сэтчö эз веськав. Та дырйи и асьныс «ЛУКОЙЛ-Комиысь» волонтёръяс вöдитчöмаöсь ныр-воманыс маскаöн, кианыс резина перчаткиöн да микроб-вирусысь видзчысян сорасöн.
Сёян-юансö ветеранъяслы гортаныс вайигöн на дорö абу пыралöмаöсь, пакетъяссö ставныслы кольöмаöсь керка-патера порог дораныс, а сэсся öдзöсаныс звöнитöм бöрын ылыстчылöмаöсь этша вылö кык метр сайö.
Кыдзи висьталiс «ЛУКОЙЛ»-лöн волонтёръяс» проектсö дасьтöм-збыльмöдöмын водзмöстчысь, «ЛУКОЙЛ-Коми» ООО-са генеральнöй директорöс йöзкöд йитöд кутöм кузя вежысь Евгения Лясковская, мусир перъян компания зiльö быд ногыс отсавны республикалы водзсасьны корнавируслы паныд тышын. Торйöн кö, «ЛУКОЙЛ» вичмöдöма 10 миллион шайт, и тайö сьöм вылас Комиын босьтчöмаöсь вурны коронавирусысь видзчысян маскаяс да костюмъяс. Найöс дон босьттöг сеталасны районъясын бурдöдчан да йöзлы отсалан мукöд социальнöй учреждениеын зiльысьяслы.
«ЛУКОЙЛ-Коми» ООО-лöн отсöгöн Усинск районса шöр больничаö шуöмаöсь вайны содтöд медоборудование да быт техника, мый торйöн нин колана пандемия дырйи. Та могысь предприятие сетöма нöшта вит миллионысь унджык шайт.
Лолавны – ИВЛ аппарат
Коми Республикаса правительствокöд сёрнитчöм серти «Монди Сыктывкарса ЛПК» вичмöдіс 130,340 миллион шайт лолавны отсалан 70 ИВЛ аппарат ньöбöм могысь.
Медицина оборудованиесö ньöбöм йылысь сёрнитчисны регионса юралысь Владимир Уйба да комбинатса генеральнöй директор Клаус Пеллер коронавируса инфекциялы паныд водзсасян уджтас збыльмöдöмкöд йитöдын.
–Ми вöчам став позянасö, медым Коми Республика вöлі дась тырвыйö водзсасьны коронавируслы паныд, – пасйис Владимир Уйба. – Та вылö талун веськöдöма став вынсö. Ассьыныс тöдчана пай тайö уджас пуктöны и миян регионса гырысь предприятиеяс. Сьöлöмсянь аттьö «Монди Сыктывкарса ЛПК» компанияöн веськöдлысьяслы да торйöн Клаус Пеллерлы миянöс гöгöрвоöмысь да республикалы зэв колана отсöгысь.
–Лолавны отсалан аппаратъяс ньöбöмыс öні медшöр могъясысь öти. Öд буретш на отсöгöн позяс мездыны кулöмысь уна нёрпалысьöс, – шуис «Монди Сыктывкарса ЛПК»-ысь генеральнöй директор Клаус Пеллер.