«Монди Сыктывкарса ЛПК»-ын вöчöм кабала бара на шуисны экология боксянь сöстöмöн да сетісны EU Ecolabel стандарт вылö сертификат.
Комбинатын вöчöмторсö донъяліс асшöр компания. Сійö шуис нюжöдны EU Ecolabel стандарт вылö сертификатлысь кадсö 2026 воöдз.
Сылы лöсялана вузöсыс — офсет кабала (тшöтш и MAESTRO® print), офсет кыз кабала да офисын вöдитчан некымын сикас бумага: «Снегурочка», IQ ULTRA, MAESTRO® expert, IQ ALLROUND, MAESTRO® special, MAESTRO® standard, IQ ECONOMY.
Вузöс кышöд-тубрасын EU Ecolabel пасыс мир пасьталаын пыдди пук- тана.
Сійö петкöдлö-юöртö, мый кабаласö вöчöма экология боксянь сöстöм сырьёысь да сы помысь вöр-валы лёкыс лоö зэв этша.
—Талун ньöбасьысьяслы зэв тöдчана, мед вузöсыс вöлі экология боксянь сöстöм. Та вöсна Mondi котыр зільö кутчысьны вöр-ва видзан нырвизьö да пыртны уджö выль технологияяс. EU Ecolabel сертификат сетöмыс нöшта öтчыд петкöдлö, мый компанияным восьлалö колана нырвизьын, — пасйис «Монди Сыктывкарса ЛПК»-ысь генеральнöй директор Клаус Пеллер.
EU Ecolabel сертификатсö «Монди Сыктывкарса ЛПК»-лы медводдзаысь сетісны 2012 воын.
Сэксянь комбинат быд пöрйö эскöдö, мый став уджсö да вузöссö предприятиеын вöчöны Европаса вöр-ва видзан стандартъяслы лöсялана ног: вöр пöрöдöм, прöдукция вöчöм, тубралöм, транспортöн нуöм-вайöм да вöдитчöм бöрын сійöс иналöм.
«Монди Сыктывкарса ЛПК»-ын вöчöм вузöссö сідзжö пыртöма Mondi котырлöн Green Range сідз шусяна «турунвиж линейкаö» да пасйöма Россияса да Европаса вöр-ва видзан котыръяслöн уна сертификатöн.