Март 12 лунӧ республикаса парламент аслас сессия дырйи видлаліс Россияса Оланподув дорӧ содтӧд вежсьӧмъяс йылысь «О совершенствовании регулирования отдельных вопросов организации и функционирования публичной власти» федеральнӧй оланпас бала.
Сёрнитанторъяс лыдӧ тайӧ юалӧмсӧ пыртіс Госсӧветлӧн президиум, таӧдз оланпас баласӧ видлалісны парламентлӧн куимнан комитетас.
«Единая Россия» котырӧн веськӧдлысь Сергей Усачёв юӧртіс, мый документас 65 лист бок, кӧні казьтывсьӧ Оланподувлӧн 40 статьяӧ (коймӧдсянь кӧкъямысӧдӧдз) 45 содтӧд йылысь. Нӧшта 15-ӧс выльмӧдӧмаӧсь. Россиялӧн медшӧр документас содтӧмаӧсь и вит дзик выль статья. Важ ногыс кольӧмаӧсь 1-сӧ, 2-сӧ да 9-сӧ.
Сергей Усачёв корис торйӧн донъявны содтӧдъяс, кӧні висьтавсьӧ страналӧн экономика да социальнӧй сӧвмӧм йылысь, сы лыдын мамӧс да челядьӧс дорйӧм, пенсия да пособие индексируйтӧм да с.в.
Госдума да Федерация Сӧвет оланпас баласӧ ошкӧмаӧсь март 11 лунӧ. Кыдз юӧртіс Коми Госсӧветлӧн аппаратӧн веськӧдлысьӧс первой вежысь Игорь Труфанов, миян депутатъяслы та вылӧ сетсьӧ 30 лун.
Комиын мортлысь право дорйысь вӧвлӧм уполномоченнӧй, депутат Леонид Вокуев казьтыштіс, мый РФ-са Оланподувлы 27 во нин, и содтӧд-вежсьӧмыс колӧ.
–Та дыранас миян олӧмын унатор вежсис, – висьталіс сійӧ. – Тайӧ вежсьӧмъяссӧ дасьтіс специалистъяслӧн торъя котыр, и ми эскам налы. Та йылысь ми сёрнитам нин тӧлысь. Ӧні йӧзыслы колӧ шуны бӧръя кывсӧ. Чайта, ковмас коркӧ вежлавны и Комилысь Оланподувсӧ.
Депутат-эсэр Татьяна Саладина сідзжӧ юӧртіс, мый «Справедливая Россия» партия ошкис оланпас баласӧ.
–Миян ютыр вӧзйис 40 сайӧ содтӧд, 13-сӧ, кодӧн шыӧдчисны Госдумаын «Справедливая Россия» фракцияса депутатъяс, пыртісны документ балаас, – пасйис сійӧ.
Ставлӧн висьтасьӧм бӧрын парламентын гӧлӧсуйтісны. Кыдз тыдовтчис, 23 морт ошкӧмаӧсь Оланподулӧ содтӧдъяссӧ, кыкӧн сувтӧмаӧсь паныд да ӧти падъялӧма.
Брифинг дырйи Госсӧветӧн веськӧдлысь Надежда Дорофеева пасйис, мый вежсьӧмъяс ошкӧмсӧ позьӧ шуны парламентлӧн «историческӧй миссияӧн».
–Содтӧд-вежсьӧмыс буретш ӧні и колӧ. Водзӧ вылӧ тайӧ нӧшта на сӧвмӧдас-ёнмӧдас государствонымӧс. Дерт, унджыкыс на пиысь инмӧ социальнӧй юкӧнлы, медициналы, ӧд буретш тайӧ медся ёна майшӧдлӧ йӧзсӧ. Таысь кындзи зэв тӧдчанаӧн лыддя страналӧн суверенитет йылысь вӧзйӧмсӧ, код серти оз позь торйӧдны Россиялысь некутшӧм юкӧн, – юӧртіс парламентса спикер.
Надежда Дорофеева гӧгӧрвоӧдіс, мый зэв тӧдчана, медым баласӧ ошкисны Россияса регионъясысь парламентъясысь кык коймӧд пайсьыс унджыкыс. Татӧг Оланподулӧ вежсьӧмъяс пыртны оз артмы.
Медбӧрын регионъяслысь шуӧмсӧ вынсьӧдас Федерация Сӧвет.
Казьтыштам, Оланподулӧ вежсьӧмъяссӧ Федеральнӧй Собрание дорӧ быдвося шыӧдчӧм дырйи вӧзйис пыртны Владимир Путин. Президент сэки тӧдчӧдіс, мый унджык право колӧ сетны парламентлы, чинтыны президентавны индӧм кад, гырысь чинаяслы оз позь овны мӧд странаын, Оланподувнымӧс колӧ пуктыны войтыркостса сёрнитчӧмъясысь вылӧджык да с.в.