«Гуся» юмов висьӧм

Ставмирса дзоньвидзалун котыр (ВОЗ) да диабет кузя войтыркостса федерация 1991 воын шуӧмаӧсь ноябрь 14 лунӧ мир пасьталаын пасйыны Диабетлы паныд водзсасян лун.

Буретш тайӧ лунас 1891 воын Канадаын чужӧма Фредерик Бантинг. Тайӧ нималана врач-физиологыс туясьӧма да восьтӧма инсулин, мыйӧн мӧдӧмаӧсь бурдӧдны сідз шусяна сакара диабет. Бантинглысь зільӧмсӧ пасйӧмаӧсь Нобель премияӧн.

Талун мир пасьталаын диабетӧн нёрпалӧ 800 миллионысь унджык морт. Россияын татшӧмыс ылӧсас 6 миллион, 70 прӧчентыс – нывбаба.

Кыдзи кӧвъясьӧ тайӧ висьӧмыс? Позьӧ-ӧ сыысь мынтӧдчыны?

Та йылысь сёрни вӧлі Коми Республикаса юралысьлӧн Общественнӧй приёмнӧйын.

Комиын йӧзлысь дзоньвидзалун видзан министерствоысь главнӧй внештатнӧй специалист диабетолог, Коми Республикаса консультация да диагностика шӧринысь главнӧй врач Ирина Ипатко:

–Миян республикаын диабетнас нёрпалӧ 42 сюрс морт. Но збыльвылас ёна унджыкӧн. Ӧд кодсюрӧ оз лыддьыны диабетсӧ висьӧмӧн да оз и шыӧдчыны врач дорӧ, а сідзкӧ, найӧс абу артыштӧмаӧсь диабет регистрын.

Мортыслысь кӧ казялісны диабет, гӧгӧрвоана, сійӧ висьмис эз тӧрыт. Тайӧ пӧрӧс дырйиыс немтор ёнасӧ оз майшӧдлы. И сыӧн верман нёрпавны некымын дас во. Но ӧдйӧ кӧ вынтӧмман-мудзан, лёка узян, горшыд кӧ пыр косьмӧ, кынӧмыд сюмалӧ да тшӧкыда кыскӧ кудзасьны, колӧ шыӧдчыны врач-терапевт дорӧ.

Висьӧмыс куим сикас: сідз шусяна преддиабет, ӧтиӧд да мӧдӧд типа диабет.

Преддиабет дырйи вирад сакарыс колана мындаысь неуна унджык, но абу на тырмымӧн пуктыны диагнозсӧ.

Ӧтиӧд типанас Комиын нёрпалӧ 1.800 морт, на лыдын и 10-14 арӧса ныв-зон да весиг 1,6 арӧса кагук. Татшӧм висьысьсӧ пыр и казялан ацетон дук серти. Поджелудочнӧй железаыс ньӧти оз вӧч инсулинсӧ. И татшӧмыслы быд лун колӧ сюйны инсулин укол.

Мӧд типа дырйи вир-яяд инсулиныс озджык тырмы либӧ колана мында, но вир-яй, медводз сӧнӧр, гос да мус сійӧс оз «аддзы». Мӧд типанас вермас висьмыны 45 арӧсысь олӧмаджык морт, этша кӧ вӧрӧ да кызӧма, кӧвъясьлӧма кӧ нин кутшӧмкӧ вир висьӧм, воддза кӧленаясас кӧ кодлӧнкӧ вӧлӧма диабет, да майшасьӧ кӧ давленньӧӧн.

Сы йылысь, мый мортыслӧн вир-яяс поздысьӧма пӧрӧс, тӧдмалӧны медосмотр да диспансеризация дырйи.

Вир босьтӧны тшыг кынӧм вылӧ. Сӧнсьыд босьтӧмас сакар нормаыс литр вылӧ 7,0 миллимоль. Сёйӧм либӧ глюкоза юӧм бӧрын кык час мысти босьтӧны мӧдысь. Сэки нин литрас сакарыс мед вӧлі 7,8 миллимоль мында. Чуньысь кӧ – 5,6 миллимоль, а кык час мысти – тшӧтш 7,8. Лыдпасъясыс кӧ неуна ичӧтджыкӧсь, тіян преддиабет, а ыджыдджыкӧсь кӧ – диабет.

Олӧма да пӧрысь йӧзлӧн сакарыс вермас лоны и 9-10 миллимоль. И найӧс тайӧ ёнасӧ оз майшӧдлы, велалӧмаӧсь нин да. Паныдасьлӧны и, кодъяслӧн вирас сакарыс 30-35 миллимоль. Стационарын да реанимацияын стӧч приборъяс кодсюрӧлысь петкӧдлӧны 40 да весиг 60 миллимоль. Но та дырйи мортыс садьтӧг нин куйлӧ.

И мӧдарӧ, ӧти висьысьлӧн вӧлӧма – 3,3, мӧдлӧн – 2,1, а коймӧдлӧн весиг 1 миллимоль. Та выйӧдз сійӧ вермас воны сьӧкыд уджысь да дыр тшыгъялӧмысь. Паметяс на кӧ, мортыс кӧсйӧ сёйны да ёна скӧралӧ. Но сэсся садьсӧ воштӧ, сырмӧ, ньылӧмыс киссьӧ, сьӧлӧмыс муртса оз чеччышт морӧссьыс. Татшӧмыс дугдӧ лолавны, да сьӧлӧмыс сувтӧ. Тайӧ нин гипогликемическӧй кома. Та вӧсна диабетӧн нёрпалысьлы оз позь дурны быдсикас диетанас да тшыгйӧдчыны.

Диабетӧн висьысьяс пиысь кодсюрӧ ошйысьӧны, маысь ӧтдор пӧ некутшӧм юмов вӧлӧга ог сёй. Но ма – тайӧ мазіӧн вӧчӧм сӧстӧм глюкоза. И сыысь вирад содӧ жӧ сакарыс. Лавка джаджйысь талун позьӧ казявны «дзоньвидза вӧлӧга», мыйӧн пӧ смела позьӧ номсасьны диабетӧн нёрпалысьлы. Но татшӧм варенньӧ-джемсӧ, печенньӧ-кампетсӧ вӧчӧны фруктозаысь. А тайӧ – тшӧтш сакар. Дугӧдчыны колӧ и быдсикас юмов лимонад-сокысь, кытчӧ вӧчысьясыс шӧтӧмаӧсь вывті уна сакар. Бурджык горштӧ веськӧдны ваӧн.

Быд лун колӧ подӧн тэрыба вӧчны 8-10 сюрс воськов.

Физкультураысь да сёянысь ӧтдор колӧ кутны тӧд вылын и узьӧм. Воданныд кӧ 23 час войын, вир-яйыд оз шойччы, оз артмыны колана гормонъяс. А нӧшта на и мыйыськӧ майшасянныд, поланныд, скӧраланныд, вир-яяд содӧ кортизол гормон, коді тшӧтш содтӧ вирад сакарсӧ.

Вирын колана мындаысь унджык сакар йылысь тӧдмалӧм бӧрын унаӧн таысь ӧвтыштчӧны да оз бурдӧдчыны. Кодсюрӧ и полӧ уколасьны инсулинӧн. Но сытӧг мортыс оз вермы овны. Сэсся талун эм миян странаын вӧчӧм уна сикас зэв бур лекарство. А укол емыс сэтшӧм вӧсньыд, ном курччӧм ёнджыка мӧрччӧ.

Он кӧ бурдӧдчы тайӧ гуся висьӧмсьыс, вермас лоны инфаркт-инсульт либӧ дугдас уджавны вӧрк.

Сыктывкарса коймӧд номера поликлиникаысь юкӧнӧн веськӧдлысь, врач-эндокринолог  Любовь Беляева:

–Быд во диабетӧн нёрпалысьыс содӧ 7-10 прӧчент. И та йылысь оз ставӧн тӧдны. Бӧръя кадӧ пыр унджык том мортлысь казялӧны татшӧм инсулинорезистентносьтсӧ, тшӧгӧмаӧсь да.

Арлыдтӧ, дерт, он чинты. И пӧль-пӧчыд, бать-мамыд кӧ майшасьлісны диабетӧн, кӧвъясьліс кӧ нин тіянлы вир висьӧм, немтор он вӧч.

Но ми вермам чинтыштны сьӧктанымӧс. Та могысь, ӧти-кӧ, колӧ ёнджыка вӧрны, котравны, позьӧ и йӧктыны. Вежоннас этша вылӧ 150 минут песны асьтӧ физкультураӧн. Либӧ быд лун час чӧж ветлыны подӧн.

Мӧд-кӧ, колӧ тӧдны, мый сёям да уна-ӧ. Быд морт суткинас шӧркодя «ньылыштӧ» нёль сюрс килокалория. Тайӧ уна. Этша вылӧ 500 килокалория колӧ чинтыны вӧлӧгасьыд.

Диетологъяс лӧсьӧдӧмаӧсь сёянлысь аслыссяма светофор.

Турунвиж рӧмӧн пасйӧма быдсикас капуста, баклажан, ӧгуреч, коръя салат, переч, помидор, кабачок, свеклӧ, пуртӧса фасоль, редис, кушман, галанка да мукӧд град выв пуктас, тшӧтш и тшак. Тайӧ сёянас уна ва да клетчатка. Таысь он тшӧг, и позьӧ сёйны мыйта кӧсъян да кӧть кор.

Кольквиж рӧма сёян-юанӧн позьӧ номсасьны, но неуна. Тайӧ гостӧм мӧс, кук, кӧр яй, кучиктӧм чипан, гостӧм жӧ чери. Йӧв колӧ вит прӧчента пыдди ньӧбны ӧтиаӧс, нӧктӧ – кызь пыдди дас витаӧс. Сырын госыс мед вӧлі комын прӧчентысь этшаджык. Позьӧ сёйны и картупель, чорыд сорта макарон, шыдӧс, тшӧтш и рудовгӧрд рис, нянь да фрукты. Но тасьтіад вӧлӧгасӧ колӧ пуктыны оз чукйӧн, а синмыдлы коланаысь джын мындасӧ.

Гӧрд рӧмӧн пасйӧма госа да тшынӧдӧм яй, тшӧг, майонез, комын прӧчентысь госаджык чорыд сыр, еджыд рис, манка, мӧс да кослунъя вый. Тайӧ вӧлӧгасӧ колӧ идравны пызан вывсьыд.

Тасьті джынъяд мед вӧлі град выв пуктас, нёльӧд юкӧнас – чери-яй да нӧшта та мында – гарнир.

Вир-яйыд кӧ дзоньвидза, кӧть мыйта чӧсмасьӧй кампет-сакарӧн. Кӧть ведра ма панялӧй, поджелудочнӧй железаыд став сакарсӧ кытчӧ колӧ иналас. Но шпуткӧм-куритчӧмысь омӧльтчӧ сӧн-артерия, вир-яйыд озджык аддзы инсулинсӧ. Курыд зелля йиджӧ поджелудочнӧй железаӧ да торкӧ инсулин артмӧмсӧ, сэсся юмов наливка-настойкаын, шампанскӧйын уна сакар да килокалория. Сэсся и гажӧдчигад да юыштігад нӧшта на и дугдывтӧг сёйсьӧ. Таысь бара жӧ тшӧган.

Корсюрӧ, ёна кӧ нин кӧсъянныд, позьӧ чӧсмасьны юмовторйӧн. Но вывтіасьны оз позь. Вирад глюкоза «чеччалӧмыс» мӧрччӧ медводз синмад да мускад.

Сакарыс ёна омӧльтӧ сӧнтӧ, артерияястӧ да вейястӧ (нервъястӧ). Син пыдӧсад татшӧмыс зэв уна. И найӧ кӧ потӧны-киссьӧны, синмыд дугдӧ аддзыны. Ӧчки та дырйи оз отсав.

Кокыд сьӧлӧмсяньыд медылын. Но сакарӧн «сёйӧм» сӧн-артерияыд тшӧтш потласьӧ-тупкыссялӧ. Вирыс дугдӧ воны кокад, артмӧ сідз шусяна диабета стопа. Чуньыд, кок пыдӧсыд дубалӧны. И дойясыс воясӧн оз бурдны. Недыр мысти татшӧм висьысьыслысь вундӧны косьмӧм кок лапасӧ, сэсся чинтӧны пидзӧсӧдзыс, а кутшӧмкӧ кад мысти нӧшта на вылітіджык…

Дзикӧдз тайӧ висьӧмсьыс он мынтӧдчы, но сійӧс позьӧ личӧдыштны. Врач вӧзйӧ лекарство. Мукӧддырйи кык-куимӧс. И таблеткасӧ ковмас ньылавны нэм помӧдзыд. Кодсюрӧ казялӧны, мый сакарыс вирас чинӧма, да дугдӧны юны лекарствосӧ. Тадзи вӧчны оз позь. Сакарыс бара «чеччыштас».

Ӧтиӧд типа диабетӧн висьысь нэм чӧжыс вӧчӧ аслыс инсулина укол либӧ вӧдитчӧ помпаӧн. Тайӧ приборсӧ сылы ӧшӧдӧны больничаын. Помпаыс ачыс видзӧдӧ, мыйта вирас сакарыс, и, кор колӧ, содтӧ инсулинсӧ.

Татшӧм висьысьясыслы вӧзйи эськӧ гижӧдчыны «Диабет школаӧ». Татшӧмыс эм Ухтаын, Сыктывкарын да Воркутаын. Сосногорск, Мылдін, Княжпогост, Изьва, Чилимдін да Вуктыл районъясын олысьяс вермасны кывзыны-видзӧдны татшӧм урокъяссӧ «Госуслуги» портал пыр.

Татшӧм школаас велӧдам верстьӧӧс и челядьӧс лючки овны тайӧ висьӧмнас. Ми аддзысьлам и школаын велӧдысьяскӧд да велӧдчысьяскӧд, эм кӧ налӧн классын диабетӧн висьысь. Медым нёрпалысь ныв-зонмыс инсулина укол вӧчигӧн да глюкометрӧн вӧдитчигӧн эз дзебсясьны тшӧтшъяяссьыс асмогасянінын.

<> Николай Размыслов. Снимокъясыс авторлӧн.

«Гуся» юмов висьӧм

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх