Ноябрь 13 лунӧ Сыктывкарса коми войтыр чукӧртчылісны конференция вылӧ, вӧчисны вочӧжся уджлы кывкӧртӧд да индісны водзӧ кежлӧ могъяс.
Медводз делегатъяс дорӧ чолӧмалана кывъясӧн шыӧдчисны юркарса да регионса веськӧдлысьяс, а «Коми войтыр» ӧтмунӧм исполкомӧн веськӧдлысьӧс вежысь Мария Кузьбожева пасйис, вӧзйӧмъяснымӧс збыльмӧдӧмыс пӧ ас саяным, и аслыным колӧ кывкутны та вӧсна.
«Коми войтырлӧн» Сыктывкарса представительствоӧн юрнуӧдысь Алёна Нестерова лыддьӧд-ліс, бӧръя кадас кутшӧм конкурсъясӧ пырӧдчисны ӧтмунӧмын зільысьяс. Тайӧ и «Коми велӧдысь» да «Коми кагульнича», и «Кор? Кӧні? Мый?», а комиӧн кывбур-висьт лыддьысьяс костын «Юргы, кодзув!» вермасьӧм лоис нин чемпионатӧн. «Войвыв кодзув» журналын уджалысьяслӧн водзмӧстчӧмӧн пӧ ордйысьӧмсӧ медводз нуӧдісны юркарса студентъяс пӧвстын, сэсся ассьыныс енби-сямсӧ петкӧдлісны районъясысь войтыр.
–Ӧтувъя коми диктант гижны воліс кык сюрс нёльсё гӧгӧр морт, – висьталіс Алёна Нестерова. – Петавлім ми и лӧп-ёг весалан субӧтникъяс вылӧ.
Юркарса представительство сюртчӧ и Виктор Савин да Каллистрат Жаков йылысь паметь нэммӧдан уджтасӧ, дасьтысьӧ аддзысьлыны Госсӧветса депутатъяскӧд, медым накӧд ӧтув збыльмӧдны конференцияса резолюцияӧ пасйӧм шуӧмъяс.
Водзмӧстчӧмсьыс комиӧн аттьӧаліс делегатъясӧс Сыктывкарса администрацияӧн веськӧдлысь Максим Мартышин. Сьӧлӧмсянь пӧ кӧсъя комиӧн тіян дорӧ шыӧдчыны, кӧть сёрнита и омӧля. Ме пӧ радейта чери кыйны, и кор сиктъясысь ёртъяс висьталӧны сын шедӧм йылысь, медвойдӧр шензя, кутшӧм пи найӧ кыйӧмаӧсь. А сэсся гӧгӧрвоа жӧ: сыныс ӧд коминас язь. И коми кывтӧ пӧ колӧ тӧдны.
–Детсадъясын вужвойтыр кывнас ӧні тӧдмасьӧ 1.860 дзолюк. Налӧн лыдыс сизим прӧчент содӧма. Тайӧс висьтала, медым бать-мам аддзисны коми кыв тӧдчанлунсӧ. Эжваса коми культура шӧринын и верстьӧӧс велӧдӧны комиӧн сёрнитны, – водзӧ висьтасис Максим Мартышин.
Сійӧ юӧртіс, мый вужвойтырлӧн шылада-драмаа театр стрӧитӧм могысь мусӧ торйӧдасны 2027 вося гожӧмысь оз водзджык, Киров нима паркын ю дорӧ лэччанінсӧ мичмӧдасны коми серъясӧн, а Нёбдінса Витторлы сиӧм «Югыд кодзув» уджтас олӧмӧ пӧртны вичмӧдӧма 197 сюрс шайт. Тшӧтш казьтыштіс, мый карса улича нимъяс гижӧны рочӧн да комиӧн.
Миян республикаын коми да роч кывъяслӧн тӧдчанлуныс ӧткодь, но артмӧ, улича пасйӧдъясас комисӧ увтыртӧма: роч гижӧдсӧ вӧчӧма гырысь шыпасӧн, комисӧ – ичӧтӧн.
Та вылӧ индіс конференцияса делегат Надежда Быковская: оланпассӧ пӧ, дерт, абу торкӧма, сэні ӧд абу индӧма, мый ыджда шыпасӧн улича нимсӧ колӧ гижны. Сідзкӧ, бур пӧ лоас, торъя документын кӧ пасйыны, мый кыкнанас ӧтыджда шыпасъяс мед вӧліны.
Госсӧветлӧн да общественнӧй котырлӧн ӧтувъя удж йылысь сёрнитіс парламентысь социальнӧй политика комитетӧн юрнуӧдысь Анастасия Михайлова. Социальнӧй десантӧн Изьваӧ ветлігӧн пӧ миянлы вӧзйисны, мед мам капитал сьӧм вылӧ позис керкаӧдз нюжӧдны ва труба, сувтӧдны септик. И тайӧ пӧ колана вӧзйӧм, ӧд республикаын уна челядя семьяыс артавсьӧ дас кык сюрс сайӧ, и налысь олӧмсӧ лоӧ кокньӧдыштӧма.
–Петіс индӧд, мый быд во май 15 лунӧ кутам пасйыны Уна челядя семья лун, – висьталіс Анастасия Михайлова.

Каллистрат Жаковлы сиӧм уджтасӧн тӧдмӧдіс Антонида Есева. Кӧсъям пӧ сылы памятника мемориал лӧсьӧдны, а медбур местаыс сійӧс вӧчны – Давпомын, кӧні овліс коми философ.
Коми кыв туялысь Евгений Цыпанов юӧртіс, мый коми да роч небӧгъяс йӧзӧдӧм вылӧ абу вич-мӧдӧма ни ӧти шайт. «Коми небӧг лэдзанін» пӧ вузалісны асшӧр уджалысьлы, а сійӧ регыд и эновтчис книга лэдзӧмсьыс.
–Колӧ ловзьӧдны «Коми небӧг лэдзанінсӧ», – висьталіс Евгений Цыпанов. – Мукӧд финн-йӧгра республикаын татшӧмыс эм, Марий Элын весиг национальнӧй издательствоӧн шусьӧ. Небӧг лэ-дзӧмыс мед лоас национальнӧй политика юкӧнӧн.
Коми кыв велӧдысьясӧс дасьтӧм йылысь сёрнитіс Сыктывкарса университетысь преподаватель Елена Остапова. Кор пӧ ачым на велӧдчи университетас, быд курсын вӧлі кызь вит морт, а ӧні – нёль-вит-квайтӧн. И кызвыныс пӧ Изьва районсаяс. И мукӧд факультетысь студентъясӧс пӧ колӧ коми кывйӧн да культураӧн тӧдмӧдны, а то найӧ коми пыдди бӧрйӧны италия кыв велӧдны.
Дас вит во нин Комиын уджалӧ финн-йӧгра лаборатория фу-лаб да паськӧдӧ чужан кывйӧн вӧдитчан позянлунъяс. Сэні зільысь Ӧньӧ Лав корис отсавны лӧсьӧдны синтезатор да анализатор. Синтезаторыс пӧ комиӧн лыддьысьӧ, а анализаторыс – комиӧн сёрнисӧ гижӧда кывйӧ вуджӧдӧ. Но миян пӧ уна сёрнисикас, и мед компьютерыс гӧгӧрвоас быдӧнӧс, колӧ, мед унджык мортлысь сёрнитанногсӧ сійӧ тӧдіс. Мед отсавны лабораториялы, тырмымӧн пырны ӧтуввезса лист бокас да лыддьыны компьютерӧн вӧзйӧм гижӧдъяс.
Томуловлӧн тӧждъяс йылысь сёрнитіс Михаил Игнатов. Том йӧз пӧ мунӧны Комиысь, ӧд налӧн абу оланін, ичӧт удждон. Ӧти прӧчента ипотекасӧ вонас сӧмын 20 семьялы вичмӧдӧны, а му-кӧдыслы ветымын-квайтымын сюрс шайта нажӧткасьыс быд тӧлысь нелямын сюрссӧ лоӧ вештыны уджйӧзӧн босьтӧм сьӧмсьыс. Со и овмӧдчӧны пӧ том йӧзыс сэтшӧм каръясӧ, кӧні шӧркодь удждоныс ыджыдджык.
Конференция вылӧ воӧмаяс пӧся чолӧмалісны зарни гӧлӧса Лидия Логиноваӧс, кодлӧн чужан лунӧ буретш и веськаліс чукӧртчылӧмсӧ нуӧдан кадыс. Зэв пӧ нимкодь, мый чужан лун вылад видзӧдтӧг воин миян дорӧ.
<> Павел Анохин. Снимокъясыс ӧтуввезйысь.





