Кольӧм вежонӧ республикаса юралысьлӧн администрацияын нимӧдісны школаын велӧдчысьяслӧн олимпиадаясын вермысьясӧс да ӧтувъя госэкзамен 100 балл вылӧ сдайтысьясӧс.
Бур тӧдӧмлуна том войтыр зільӧны водзӧ велӧдчыны. Кольӧм воын серти таво вузӧ пырны кӧсйысьыс содӧма 41, колледж-техникумӧ окотитысьыс – 5 прӧчент. Республикаса школаясын 11 да 9 класс помалысьяс тшӧкыдджыка бӧрйӧны медицина да велӧдан, а сідзжӧ компьютерӧн вӧдитчан юкӧнъясын специальносьт.
Унаӧн вуз-техникумӧ пырӧны предприятие-организациякӧд сёрнитчӧм серти. Таво татшӧмыс 185 ныв-зон. Вуз-техникум-колледж помалӧм бӧрас налы оз нин ковмы майшасьны удж вылӧ инасьӧм понда – найӧс виччысьӧны нин предприятие-организацияас.
Велӧдчӧмын водзмӧстчысьяслы Сыктывкарса госуниверситетын да вӧр институтын, Ухтаса техническӧй университетын стипендиясӧ 15 сюрс шайтсянь кыпӧдӧмаӧсь 50 сюрсӧдз.
–Бура велӧдчысьясӧс ми зілям ёнджыка ышӧдны: вичмӧдам налы сьӧма премия, олимпиадаын вермысьясӧс корлам енбиа том войтырлӧн академияӧ, накӧд уджалӧны и наставникъяс.
Таво ӧтувъя госэкзамен медуна балл вылӧ сдайтысьяслы, а татшӧмыс миян регионын матӧ нелямын ныв-зон, сетӧма 100 сюрс шайтӧн, – висьталіс республикаса правительствоӧн веськӧдлысьӧс вежысь Наталья Якимова.
Гижӧдсӧ дасьтiс Павел Симпелев.