Кольӧм вежонӧ Коми Республикаса том йӧз театрын вӧлі премьера – Александр Блоклӧн «Двенадцать» поэма серти татшӧм жӧ нима спектакль.
Дасьтӧмаӧсь Санкт-Петербургысь режиссёръяс: Александриинкаысь Антон Оконешников да «На Фонтанке» том йӧз театрысь Анна Соколова, кодъяс уджалӧны «драмтеатр да мультимедиа шоукостса» постановкаяс вылын. Содтӧд на налӧн командаын Петербургысь жӧ художник-сценограф, костюм серпасалысь, видеохудожник.
Выль постановка подулын Александр Блоклӧн «Двенадцать» поэма, кодӧс классик гижӧма 1918 вося январын. Поэмаыс пырӧ школьнӧй программаӧ, но унаӧн оз радейтны лыддьыны сійӧс. И мыйӧн сійӧ лоӧ интереснӧ видзӧдны том йӧзлы?
Дас кык красногвардееч патрулируйтӧны Петроград: кӧдзыд, олӧмыс гудыр, улича вылын кватлалӧны йӧзсӧ…
Режиссёръяслӧн мӧвпыштӧм серти спектакльын ворсісны дас кык том артист. Блоклӧн поэмаын ставыс вӧчсьӧ революция кадся Петроградын улича вылын, постановкаын жӧ – Петербургса подземкаын.
Шӧр герой Петькалы (ворсіс Денис Кибалин) радейтана нылыс кӧсйӧ вӧчны козин: косавны ылі 1918 воӧ. Та могысь Катька (ворсіс Елизавета Туева) шыӧдчӧ аслыспӧлӧс гаж котыртысьяс дорӧ (сідз шусяна проводникӧс ворсіс Владимир Рочев).
Колӧ пасйыны, ӧнія персонажъяслӧн нимъясыс сэтшӧмӧсь жӧ: Катя да Петя. Том морт кӧсйысьӧ, сійӧс шынельӧдӧны, сетӧны киас винтовка. И со найӧ Блоклӧн поэмаын моз дас кыкӧн мунӧны.
Классиклысь гижӧдсӧ абу вежлалӧмаӧсь, сӧмын мыйсюрӧ содтӧмаӧсь «проводник» сёрниас. И став тайӧ шоусӧ снимайтӧны да петкӧдлӧны веськыд эфирын.
Кыдзи висьталіс Антон Оконешников, тайӧ гижӧд серти спектакльсӧ пуктылӧмаӧсь нин 2016 воын, кор сійӧ велӧдчӧма. Но найӧ пӧ абу ӧткодьӧсь.
–Поэма гижигӧн Блок кылӧма «улича шыладсӧ», сылысь ритмсӧ. Тайӧ сылӧн медся дженьыд да тӧдчана гижӧд. Мый сэтчӧ гижӧма (куим лист бок), ставыс ышӧдӧ мӧвпавны, мыйкӧ вӧчны.
Миян спектакльын шӧр геройясыс абу классиклӧн поэмаысь геройяс, а ӧнія йӧз, кодъяс быттьӧ веськалӧны сійӧ кадас. Шӧр мӧвпыс – кор мортӧс мырдӧн вежӧны, чегӧны, мыйкӧ сысянь виччысьӧны, – висьталісны режиссёръяс.
Денис Кибалинлӧн кывъяс серти, спектакльыс абу кокньыд, тані зэв уна сьӧлӧмкылӧм. Владимир Рочев жӧ ӧткодяліс сійӧс «драйвӧн», ыпъялӧмӧн.
Видзӧдысьяс жӧ пасйисны, мый весиг мӧвпыштны абу кужӧмаӧсь, кыдзи позьӧ Александр Блоклысь «Двенадцать» поэма ворсны.
–Мый сэні петкӧдлынысӧ? Театрӧ тайӧ юалӧмнас и муні. Но спектакль заводитчӧмсянь нин гӧгӧрвои – эм мый да кыдзи. Ёна сьӧлӧм вылӧ воис артистъяслӧн ворсӧмыс. Аслым восьті выль кодзув – тайӧ Денис Кибалин. Кутшӧм мастера сійӧ ворсіс! Медводз локтіс раминик, мышкыра том морт, а сэсся вежсис. Сы вӧсна мый снимайтісны камера вылӧ и петкӧдлісны чужӧм вежласьӧмсӧ, синсӧ, чайті, мый сійӧ збыльысь торксис вежӧрнас, Катькаӧс виӧмӧн думайтіс да, – юксис мӧвпъяснас Елена Васильевна.
<> Екатерина Макарова. Снимокъясыс Юлия Леготиналӧн.