Апрель 21 лунӧ Сыктывкарса коми культура шӧринын аддзысьлісны «Коми войтыр» ӧтмунӧмса Сыктывкар юкӧнӧ пырысьяс да юркарса администрацияысь веськӧдланінъясӧн юрнуӧдысьяс.
Нуӧдісны паныдасьлӧмсӧ администрацияса веськӧдлысьӧс вежысь Ирина Сергеева да «Коми войтыр» ӧтмунӧмса Сыктывкар юкӧнӧн веськӧдлысь Алёна Нестерова. Аддзысьлӧм могыс – видзӧдлыны, кыдзи пӧртӧны олӧмӧ 2025 вося Сыктывкарса коми войтырлӧн конференциялысь помшуӧмъяссӧ. На подулын вӧлі дасьтӧма ӧтувъя план. Юркарса управлениеясӧн кӧкъямыс веськӧдлысь висьтасисны асланыс нырвизьяс серти.
Школаӧдз велӧдан веськӧдланінса юрнуӧдысь Наталья Боровкова юӧртіс, карса челядь видзанінъясын пӧ 69 кагульнича вӧдитчӧны коми кывйӧн; комын садйын 1.513 дзолюклӧн эм позянлун тӧдмасьны коми кывйӧн. Ныв-зон петкӧдчӧны «Ӧшкамӧшка» да «Мойд куд» фестивальясын.
Велӧдан веськӧдланінса юрнуӧдысьӧс вежысь Наталья Котелина пасйис, юркарса 35 школаын пӧ коми кыв велӧдӧны 19.985 морт. Дзоньтасьӧм бӧрын карса школаяссӧ мичмӧдӧ коми сер. Ыджыд удж нуӧдӧма школьникъясӧс Сыктывкарса историяӧн да культураӧн, коми гижысь Каллистрат Жаков, коми фольклорист да литературовед Анатолий Микушев уджӧн тӧдмӧдӧм серти. Нёльсё аддзысьлӧм-чукӧртчылӧм вылӧ волӧма 25 сюрс сайӧ морт.
Культура веськӧдланінса юрнуӧдысь Анна Файзуллина шуис, планын индӧмысь пӧ унатор вӧчсьӧ. Виччысьӧны сьӧм дзоньтавны вӧвлӧм сад, кытчӧ вермасны вуджны коми землячествоясысь сьылан котыръяс.
Сёрнитісны сідзжӧ физическӧй культура да спорт, архитектура да карса стрӧитчан, туй инфраструктура да транспорт, ЖКХ, йӧзкӧд йитӧд кутан управлениеӧн веськӧдлысьяс.
«Коми войтыр» ӧтмунӧмса Сыктывкар юкӧнӧн веськӧдлысь Алёна Нестерова пасйис быдӧнӧс, коді водзмӧстчис бӧръя кадас общественнӧй олӧмын, да кутшӧм удж вӧчӧма:
–Сыктывкарса школаясын да челядь садъясын бать-мам собраниеяс дырйи сёрнитӧны коми кыв велӧдны коланлун йылысь А.В.Габова, Л.Я.Зварич, Л.Н.Камбалова, В.А.Лимерова, А.А.Михайлова, А.Н.Нестерова, А.Н.Рассыхаев, К.С.Таскаева, Д.Г.Холопова да мукӧд;
–котыртӧма да медводдзаысь нуӧдӧма «Юргы, кодзув» гораа лыддьысян чемпионат (Е.В.Остапова, Н.А.Обрезкова, А.Н.Нестерова, Л.Я.Зварич);
–котыртӧма да нуӧдӧма ӧтувъя коми диктант. Республикаса оргкомитетӧн веськӧдліс А.Н.Рассыхаев. Сыктывкарын таво диктантсӧ гижисны 2.400 гӧгӧр морт;
–зэв кыпыда мунісны профессияӧ ышӧдан «Коми велӧдысь» да вежӧр сӧвмӧдан «Кор? Кӧні? Мый?» конкурсъяс.
Позьӧ и водзӧ на содтавны мукӧд нырвизьсӧ. Уджыс мунӧ. Карса администрациякӧд эм гӧгӧрвоӧм, кыдзи вӧчны, медым олӧмсӧ бергӧдны бурланьӧ. <>
Ӧльӧш Рассыхаев. Снимокыс ӧтуввезйысь.