«Победа» оргкомитет чукӧртчылігӧн видлалісны ветеранъяслысь олӧм бурмӧдӧм да Айму вӧсна Ыджыд тышын Вермӧмсянь 81 во пасйӧм йылысь юалӧмъяс.
–Ветеранъяс вӧсна тӧждысигӧн миянлы колӧ босьтны тӧд вылӧ налысь корӧмъяссӧ, общественнӧй котыръяслысь вӧзйӧмъяс. «Мы – наследники Великой Победы» бур вӧчан марафон дырйи чукӧрмис нин 1 миллион 200 сюрс шайт, и тайӧ сьӧмсӧ лоӧ веськӧдӧма ветеранъяслы отсӧг вылӧ, – висьталіс республикаса юралысь Ростислав Гольдштейн.
Праздник кежлӧ дасьтысьӧм йылысь юӧртіс правительствоӧн веськӧдлысьӧс вежысь Сергей Емельянов. Сылӧн кывъяс серти, медтӧдчанаыс – могмӧдны ветеранъясӧс медицина да социальнӧй отсӧгӧн.
Ӧні Комиын олӧ Айму вӧсна Ыджыд тышса 618 ветеран, тыр арлыдтӧмӧн на концлагерӧ веськавлӧм 99 морт, блокада кытшӧ босьтӧм Ленинградын 9 олысь, тылын 504
уджалысь да 15,6 сюрсысь унджык война кадся челядь. Победа лун водзын ставныслы налы сетасны сьӧма отсӧг. Унаӧн бурмӧдасны дзоньвидзалунсӧ «Максаковка» шӧринын да ветеран госпитальын.
Ыджыд Вермӧм лунӧ петкӧдласны концертъяс, спектакльяс, фильмъяс, котыртласны выставкаяс.
Салдат гуяс пӧрадокӧ вайӧдӧм могысь Комилы таво медводдзаысь на вӧлі торйӧдӧма федеральнӧй субсидия – 3 миллион шайт.
Кыдзи висьталіс Сыктывкарса мэр Максим Мартышин, праздник лунӧ полевӧй кухняын быдӧн вермас сёйны рок, а парад вылын медыджыд гӧсьтнас лоас 98 арӧса Николай
Акимович Рочев. Великӧй Отечественнӧй войнаса ветеранъяс дорӧ, кодъяс дзоньвидзалун вӧснаыс оз вермыны волыны Степан изэрдӧ, гортӧдзыс воласны юнармеечьяс, кадетъяс, войскӧвӧй часьтын, МВД-ын уджалысьяс.
«Победа» оргкомитет чукӧртчылігӧн министерствоясӧн веськӧдлысьяс юӧртісны, мый лоӧ вӧчӧма Победа лунӧ пӧрадок видзӧм могысь. <>
Павел Анохин. Снимокъясыс ӧтуввезйысь.