Андрей Малаховлӧн «Песни от всей души» телепередачаын Комиысь енбиа йӧз петкӧдчылісны эз нин ӧтчыдысь. Таво февраль 22 лунӧ Айму дорйысьӧс нимӧдан передачаын вӧліны Изьваысь Владимир Орлов да Сергей Сотников.
Шмонитысь морт-праздник
Кыдзи юӧртіс Андрей Малахов, шмонитны радейтысь Владимирӧс тӧдсаясыс шуӧны «Человек-праздникӧн», йӧзсӧ гажӧдны кужӧ да. Передачаын сійӧ кыпыда ливкнитіс Михаил Евдокимовлысь нималана «Некогда жить» сьыланкыв. Студияын пукалысьяс, тшӧтш и Андрей Малахов, Таисия Повалий, Тимур Ведерников, Валерий Сёмин, уськӧдчисны йӧктыны.
Владимир висьтасис, мый сійӧ оз нин медводдзаысь гажӧд йӧзсӧ телевизор пыр. Дас во сайын петкӧдчӧма «Поле чудесын», сьылӧма комиӧн. Якубовичсянь Изьваса кодзувлы вичмӧма ноутбук. Семья йывсьыс висьтасигӧн Владимир пасйис, мый гӧтырыскӧд быдтӧны вит пи да кык ныв. И, Ен кӧ пӧ сетас, чужтасны на. ме пӧ ӧд сӧмын на 56 арӧса.
Сэсся Владимир чолӧмаліс мужичӧйясӧс Айму дорйысь лунӧн, а сідз-жӧ нималана земляксӧ, Сергей Сотниковӧс, кодлӧн уджачлуныс отсаліс ловйӧн кольны 81 мортлы.
Изьваса герой
Казьтыштам, 2010 вося сентябрь 7 лунӧ Изьваса вӧвлӧм аэропортын пуксис Удачныйсянь Москваӧ лэбан Ту-154 самолёт.
Сэки енэжас «Алроса» авиакомпаниялӧн тайӧ лайнерас кусӧма став оборудованиеыс. Пилотъяс воштӧмаӧсь туй визьсӧ, и абу нин чайтӧмаӧсь лючки пуксьыны. И со – дивӧ! Сьӧд вӧр шӧрын син уланыс усьӧма самолётлы бетона полосатуй. И пилотъяс вермӧмаӧсь пуксьыны сэтчӧ. И ставныс кольӧмаӧсь ловъяӧсь: 72 пассажир да экипажысь 9 морт.
–Ӧнӧдз йирмӧгалӧ, кор казьтыла сійӧ лунсӧ, – висьталіс Сергей Михайлович. – Ме 42 во уджалі Изьваса аэропортын. Став уджалысьыс сэки вӧлі 120 морт. А ӧні куш. Кор аэропортсӧ пӧдлалісны, ме сійӧс дӧзьӧриті, мед оз рассяв, мися, гашкӧ, коркӧ ковмас. И со эз ло весьшӧрӧ мырсьӧмӧй.
–Кыдзи тӧдмалінныд усян самолёт йывсьыс? – юаліс Андрей Малахов.
–Внучкаӧс вӧлі колльӧда, кор тӧдсаяс звӧнитісны. Изьва весьтын пӧ самолёт лэбалӧ. Ме котӧрӧн уськӧдчи аэропортӧ. Ту-154 – ыджыд самолёт, бордйыс паськыд, и пуксьыны векньыд туй вылӧ сылы абу кивыв. Но самолётыс пуксис, быттьӧ коридорӧд муніс. Нимкодь, мый и менам пай эм, лэбысьясыс ставӧн ловъяӧсь колины да.
Тайӧ лоӧмтор бӧрас, кыдзи водзӧ висьтасис Сергей Михайлович, сылы йӧзыс гижӧны мир пасьталаысь, тшӧтш и США-ысь, Германияысь, Европаысь. Гижӧны пӧ весиг найӧ, кодъяс сэки абу вӧлӧмаӧсь самолётас. Йӧзыс эскӧны, мый Россияын олӧны пӧсь сьӧлӧма йӧз.
Та йылысь пасйис и Таисия Повалий, кодлӧн гӧлӧсыс тіраліс. Тыдалӧ, сьылысьлӧн горш діныс гӧрддзасьліс.
Шуда мама-пиа
Сэсся Андрей Малахов юӧртіс, мый сэки самолётас збыльвылас кӧ вӧлӧма нӧшта ӧти морт – 82-ӧд – мам кынӧмас. Студияӧ корӧмаӧсь Новосибирскысь Людмила Голубыхӧс 14 арӧса Женя пиыскӧд.
2010 воын ань лэбӧ вӧлӧм Москваӧ, и сэки ачыс на абу тӧдӧма, мый нӧбасьӧ. И со шуда ань да сылӧн пиыс аддзысисны-кутчысьлісны Сергей Михайловичкӧд.
–Сэки ме, дерт, эг вермы аттьӧавны Сергей Михайловичӧс, ставныс жуӧны вӧлі да. Ме видза самолёт билетсӧ, и эм менам медаль, кытчӧ серпасалӧма Сергей Михайловичӧс, – петкӧдліс ань билетсӧ да медальсӧ.
Сергей Михайлович вежавидзана шуыштіс, мый сылӧн татшӧм медальыс эм жӧ. А Владимир Орлов чуймис, со ӧд пӧ, эз и ошйысьлы донаторнас.
* * *
Дерт, татшӧм висьтасьӧм-аддзысьлӧм бӧрын залын да пызан сайын пукалысьяслӧн синваыс доршасис. А артистъяс чуймисны, мыйла пӧ ӧнӧдз абу снимайтӧмаӧсь та йылысь кино, сюжетыс пӧ дась, весиг нинӧм оз ков лӧсьӧдлыны.
Театрын да киноын ворсысь Алексей Комашко да музыкант Тимур Ведерников кывкӧрталісны, ковмас пӧ Коми Республикаса юралыськӧд та йылысь сёрнитны.
<> Екатерина Макарова. Снимокъясыс ӧтуввезйысь.