Ӧти бур тӧдса висьталіс, Кӧрткерӧс районса Пӧддельнӧйын пӧ енбиа нывбаба Вера Михайловна Королева и ки помысь вӧчасьӧ, и мойдъяс гижӧ. Тайӧ висьталӧмыс, дерт жӧ, ышӧдіс тӧдмасьны сыкӧд. А таӧдз корси ӧтуввезйысь сылысь лист боксӧ. Лыдди йӧзӧдӧм мойдъяссӧ. Гижӧдъясыс воисны сьӧлӧм вылӧ. Найӧ мывкыдсьӧданаӧсь-велӧданаӧсь. Газет лыддьысьясӧс тӧдмӧдам мойдъяс гижыськӧд.
Вера Михайловна чужлӧма Шойнаты сиктын Шелепановъяс семьяын. Мамыс – Раиса Павловна, Коми АССР-са заслуженнӧй велӧдысь. Михаил Модестович батьыс уджалӧма «Сторожевскӧй» совхозын инженер-электрикӧн.
Школаын велӧдчигас Вералы сьӧлӧм вылас воӧма алгебра, геометрия, француз, роч кывъяс да литература, рисование, ботаника. Дас класс помалӧм бӧрын Коми пединститутын босьтӧма начальнӧй классъяс велӧдысь уджсикас. Вера дыр абу бӧрйысьӧма, кодӧн лоны. Ӧд син водзас вӧлӧма бур пример – мамыс.
Институт помалӧм бӧрын диплома велӧдысь локтӧма уджавны Пӧддельнӧйса шӧр школаӧ. Ныв-зонпосни велӧдӧмлы сиӧма уна во. Быдмысь войтырлы сетӧма бур, зумыд тӧдӧмлун, вӧлӧма налы мӧд мам пыдди. Вера Михайловна сьӧлӧмсяньыс юксьӧма накӧд тӧдӧмлуннас, шоныдлуннас, кужанлуннас.
Гортас шаньлуннас да муслуннас меліалӧ ассьыс дона быдтасъяссӧ – кык нывсӧ да куим внук-внучкасӧ. Сылӧн бурлуныс тырмӧ ставныслы. А найӧ водзӧс сетӧны радейтӧмӧн, кодӧс дона морт кылӧ аддзысьлігъясӧн, телепон пыр варовитігӧн. И тайӧ зэв тӧдчана, колана, сьӧлӧмӧ инмана.
Прӧст кадӧ Вера Михайловна лыддьысьӧ либӧ кино видзӧдӧ. А нӧшта сылӧн эм сьӧлӧмсӧ бурмӧдан удж-нок – челядьӧс да верстьӧӧс велӧдӧ гипсысь вӧчавны мичаторъяс. Ышӧдӧ аддзыны быд турун сіысь мич. Аньлы ичӧтсяньыс сьӧлӧм вылас воӧ видзӧдавны дзоридзьяс. Казьтылӧ, кыдзи чуймӧма, кор аддзӧма катшасинысь уна дзоляник дзоридз. Томӧн на сійӧ чукӧртӧма да вӧчалӧма турунысь да увчалльысь уна пӧлӧс тэчас-композиция. Ӧтчыд тӧвбыд сулалӧм-косьмӧм турун-вижъюрысь артмӧма икебана.
Институтын велӧдчигас Вера радейтӧма дзоридзалан нюр, видз, ю-ты дорӧ петалӧмӧн гожся практика. Сылӧн олӧмын велӧдӧмыс лоӧма медшӧр могӧн. Ӧні окотапырысь котыртлӧ челядьлы да верстьӧлы мастер-классъяс. Кужысь киа морт велӧдӧ вӧчавны ботаника барельефъяс – гипсын ловъя быдмӧгъяс пас-оттиск. Татшӧм паннонас сэсся йӧзыс мичмӧдӧны керка вежӧсъяс.
Вӧр-ва, быдмӧгъяс нэмсӧ кыскӧны Вера Королеваӧс… Верстьӧӧн нин збыльмӧдӧма челядьдырся кӧсйӧмсӧ: Ленинградын карта серти корсьӧма да веськавлӧма Аптекарскӧй діын ботаническӧй садйӧ. А сёрӧнджык волӧма Крымын Никитскӧйӧ. Велӧдчысьясыскӧд тшӧкыда петавлӧмаӧсь экскурсияӧн вӧр-ваӧ. Тайӧс тӧдмалӧм бӧрын весиг эг чуймы, кор «Мый тіян медбура артмӧ вӧчны?» юалӧм вылӧ вочавидзис: «Нимкодясьны ывлаӧн».
Вера Михайловна прӧст кадас унаторйӧн ноксьӧ. Медым пӧ кыпыда уджавны, колӧ ловби. А сійӧ лоас, эм кӧ ышӧдантор. Некымын во сайын ань босьтчӧма дасьтыны лунпасъяс. Мӧйму лэдзӧма квайтӧдӧс нин. Календарас быд тӧлысь торъя лист бокын мичмӧдӧма Коми мулы да сиктлы сиӧм уна рӧма серпас-снимокӧн. Тайӧс вӧчны ышӧдӧма, дерт жӧ, дона чужанін дорӧ помтӧм пӧсь муслуныс.
Творчествоын водзмӧстчысь нывбабалӧн кольӧмвося арын збыльмӧма гуся кӧсйӧмыс – Вера Королеваӧн гижӧм мойдъясыс петісны «Гожӧм» («Лето») книга-билингвын. Петасыс кык кывъя – коми да роч. И бара жӧ мойдъясыс радейтана сюрӧсаӧсь – вӧр-ва йылысь. Мойдъясыс Вераӧс кытшалӧмаӧсь ичӧтсяньыс.
–И ӧні, кор лов вылад кокни да сьӧлӧмад шоныд, небыд нюмӧн видзӧдан гогӧрбок – и мыччысьӧны мойдъяс. Кодзувкотлӧн тэрыба котӧртӧмын, пу кор шарӧдчӧмын, посни челядь сёрниын… Мойдъясыс миянкӧд орччӧн, – висьталіс Вера Королева.
Вера Королевалысь гижӧдъяссӧ йӧзӧдлӧны республикаса «Би кинь» да «Войвыв кодзув» журналъясын. Пасъя нӧшта ӧтчыд, сылӧн мойдъясыс кокниа лыддьыссьӧны, интереснӧйӧсь, бурӧ велӧданаӧсь. Лыддян да быттьӧ веськавлан гажа пӧраӧ, челядьдырӧ. Мед жӧ шонді кодь югыд да шоныд уна на гижӧд артмас енбиа мортлӧн!
А водзын – выль могъяс да кӧсйӧмъяс олӧмӧ пӧртӧм. Вера Михайловналӧн ставыс йитчӧма творчествокӧд. Сійӧ висьталіс, кӧсъя пӧ ёнмӧдны кужанлунӧс. А нӧшта – мед йӧзыс вӧліны дзоньвидзаӧсь, шудаӧсь.
Сёрни помын миян талунъя гӧстя сиис газет лыддьысьяслы быд бурсӧ:
–Ывлаыс ӧні тӧвся мойд кодь – нимкодясьӧй, апалӧй сӧстӧм сынӧдсӧ, ислалӧй асьныд либӧ челядькӧд, ёнмӧдӧй дзоньвидзалунтӧ!
А ми ас пайысь сиам Вера Михайловналы творчествоын выль вермӧмъяс, медым ставыс лоас тыр-бур да ваяс нимкодьлун.
<> Оксана Гудырева. Снимокъясыс Вера Королёвалӧн.