Воркутаса Б.А.Мордвинов нима драмтеатрын звукорежиссёралӧ енбиа том морт Глеб Тазиев. Творческӧй котырын сійӧс пыдди пуктӧны, ворсӧмсӧ ловзьӧдӧ шыладӧн да.
Театрын Глеб дас кыкӧд во: медводз вӧлӧма звукооператор, а сэсся нин звукорежиссёр. Пырӧдчӧ быд спектакльӧ, уджалӧ режиссёркӧд ӧтув.
Медводдза спектакльыс, кӧні Глеб зільӧма шылад вылын, «Дембельский поезд». 2021 воын дасьтӧма аранжировка «Роман между строк» спектакльлы. А кык во сайын Глеб Тазиев, кыдз композитор, гижӧма «Клочки по закоулочкам» мойдлы шылад.
Сідзжӧ сійӧ выльмӧдӧма театрлӧн 80-ӧд тшупӧда пас кежлӧ сылысь кып, кодӧс гижлӧмаӧсь 1973 воын. Ыджыд пайыс Глеблӧн и «Сильва. Дойти до премьеры» спектакль дасьтӧмын, кодӧс пасйисны «Золотая маскаӧн».
Мый сьӧлӧмлы колӧ
Талун, февраль 19 лунӧ, енбиа звукорежиссёр да композитор Глеб Тазиев чужанлунасьӧ. Чужан лун водзас и сёрнитыштім сыкӧд.
—Воркутаса школа помалӧм бӧрын, кӧть и радейтін шылад, ворсін гитараӧн, пырин велӧдчыны Ухтаса государственнӧй университетӧ. Мыйла? Медводз кӧсйин лоны мусир перйысьӧн, а сэсся нин композиторӧн?
—УГТУ ме эг помав, ӧти семестр и велӧдчи. Муні ме сэтчӧ, позьӧ шуны, ыджыд сьӧма профессияла. Чайта, ыджыд нажӧткаысь некод оз ӧткажитчы. Да медым и велӧдысьяс, и бать-мам ошкисны: со пӧ кутшӧм бура велӧдім-воспитайтім. А сэсся нин дзик пыр сэні гӧгӧрвои, мый сьӧлӧмлы век жӧ колӧ шылад. И муні сэтысь. Пыри велӧдчыны Воркутаын Коми Республикаса культура колледж филиалӧ. Такӧд тшӧтш уджалі театрын. Ӧні водзӧ велӧдча Москваса государственнӧй культура институтын театрально-режиссёрскӧй факультетын звукорежиссура кафедраын.
Ӧтувъя удж
—Глеб, кыдзи дасьтыны спектакльсӧ режиссёрлы да звукорежиссёрлы, мед эськӧ тайӧ вӧлі ӧти удж, а эз торъяв ӧта-мӧдсьыс?
—Режиссёръяс, дерт, разнӧйӧсь. И колӧ воны накӧд ӧти кывйӧ. Театрын зілигӧн менам сэтшӧмыс уна вӧлі. Ӧтияс ставсӧ ас ногыс вӧчӧны, весиг шыладсӧ вӧзйӧны, мый асьныс кӧсйӧны, а сэсся тэ нин на ног ставсӧ вӧчан. Эмӧсь режиссёръяс, кодъяс эскӧны тэныд, сетӧны вӧля аслыд корсьысьны-мӧвпавны шылад вылас. Овлӧ, мукӧддырйи шыладыс юрад воӧ спектакль дасьтігӧн: ӧтиӧс видлан, мӧдӧс, коймӧдӧс… И вермас мыйкӧ выльтор чужны. И збыльысь окота, мед эськӧ шыладыс эз «усь» спектакльсьыс, а сӧльнитчис, тӧдмавны сійӧ аслыспӧлӧс шифрсӧ. А сідз звукорежиссёр да режиссёр видлалӧны пьесасӧ, ме быть сійӧс лыддя, сэсся сёрнитам, кутшӧмджык шылад лӧсялас, кутшӧм шыяс пыртны, мый пасйӧма пьесаас. Акустика боксянь мед ставыс лӧсяліс ворсанногыслы.
—Вензьыланныд режиссёркӧд: сійӧ ӧтитор кылӧ, а ті мӧдтор? Либӧ оз ков вензьыны?
—Иерархия серти кӧ видзӧдны, режиссёр вылынджык звукорежиссёрысь, и спектакль — тайӧ сылӧн видзӧдлас. Колӧ сы бӧрся мунны. Но ме, дерт, верма мыйкӧ вӧзйыны выльтор, спектакльыс кӧ дудӧ шылад боксяньыс, оз кӧ кут ладмыны. Но режиссёркӧд уджын менам ыджыд зык эз на кыптыв.
Ставыс заводитчӧ мойдсянь
—Спектакль дасьтігӧн дась шылад либӧ шы босьтанныд али асьныд гижанныд жӧ?
—Кыдз композитор, ме уджала жӧ театркӧд. Позьӧ шуны спектакльын ӧти джынйыс дась, а мӧдыс — гижӧм. Кык спектакльын — «Клочки по закоулочкам» да «Кот в сапогах» — менам шылад. Ӧні коймӧд вылын уджала.
—Мойдлы бурджыка гижсьӧ али тешлы, драмалы?
—Кыдзи и пыр, ставыс заводитчӧ мойдсянь. И менам тшӧтш. Эн думайтӧй, мый мойд — тайӧ сідз-тадз. Збыльвылас кӧ, мойдыд сэтшӧм жӧ спектакль, сӧмын челядьлы. Дерт, окота и верстьӧлы спектакльлы гижны шыладсӧ. Ставыс на водзын, думайта да.
—Кыдзи чужӧ сідз шусяна шы алхимия театрын, мед эськӧ сійӧ вӧлі лов вӧрзьӧдана, видзӧдысьӧс шымыртіс да нуӧдіс кытчӧкӧ? Вот, шуам, сійӧ кунис синсӧ и шылад отсӧгӧн аддзис геройяслысь сьӧлӧмкылӧмсӧ, майшасьӧмсӧ, радлӧмсӧ?
—Ӧти-кӧ, тайӧ мед лӧсяліс стилистика боксянь. Кӧть эськӧ вермас лоны и эклектика, тадзи кӧ мӧвпыштӧма сійӧ либӧ мӧд спектакльын. Мӧд-кӧ, техника боксянь ми вӧдитчам унаторйӧн, мед эз вӧв некутшӧм диссонанс. Шуам, жыннян шы, пон увтӧм да сідз водзӧ. Став шыыс, мый пырта постановкаӧ, вуджӧдӧ видзӧдысьӧс сэтчӧ, кӧні вӧчсьӧ действиеыс. И, дерт, шылад. Артмӧ, кывкӧртавны кӧ: фон, пространство да шылад. Нӧшта содта, мый шылад оз вермы лоны артистлӧн ворсӧмысь торйӧн и оз вермы лоны сыысь тӧдчанаджык. Збыль, овлӧ, сюрас кутшӧмкӧ зэв мича шылад, а спектакльын ворсӧмкӧд оз сӧльнитчы, асланьыс кыскӧ видзӧдысьсӧ, и артистыс быттьӧ вошӧ сэтчӧ. И татшӧмсӧ, дерт, киритам постановкасьыс.
Петiс кӧ йӧзӧ, лэдз
—А «ловъя» шылад юргӧ спектакльын?
—Ми гежӧда уджалам «ловъя» шыӧн, казьтыштны кӧ сӧмын «Сильва», сэні миян театрса директор ворсӧ фортепианоӧн, а сідз кызвыныс фонограмма. Сьылӧмсӧ артистъяслысь тшӧтш гижам, а сэсся включитам ылі колонкаяс, и видзӧдысьлы кажитчӧ, мый найӧ асьныс сьылӧны. Но эн думайтӧй, мый сэки артистъяс сӧмын вомсӧ восьталӧны. Оз. Найӧ тшӧтш сьылӧны. Но татшӧм ылі подзвучкаясыс быть колӧны спектакльын, мед юрганногыс вӧлі аслыспӧлӧс.
—Глеб, а вӧлі-ӧ сідз уджаныд, мый кор шыыс «ловзис», гӧгӧрвоинныд, мый звукорежиссура — тайӧ збыльысь тіян призвание?
—Кор медаси Воркутаса театрӧ (медводз звукооператоралі, а сэсся нин звукорежиссёрӧн индісны), сэки эг тӧд уджаланногсӧ. Стӧчджыка кӧ шуны, гӧгӧрвои, мый колӧ вӧчны техника боксянь, но мед сэсся аслыд кыдзкӧ сӧльнитчыны постановка дасьтӧмӧ, творчествоӧ, тайӧ воис меным вочасӧн. Кымын унджык ме тӧдмалі тайӧ профессия йывсьыс, сымын ёнджыка сійӧ воис сьӧлӧм вылӧ, интереснӧйӧн кажитчис. И ӧні гӧгӧрвоа, мый ме ас местаын, мӧдлаысь ачымӧс ог аддзы. Но, гашкӧ, нӧшта шылад ворсны-гижны.
—А, гашкӧ, вӧлі кутшӧмкӧ постановка, кодӧс дасьтігӧн ті восьтінныд асьнытӧ профессияын выль боксянь? Гашкӧ, кутшӧмкӧ уджӧн гӧрдитчанныд, мый пуктінныд сэтчӧ ассьыныд пай?
—Вермас лоны, сійӧ жӧ «Сильваыс», сы вӧсна мый сэні выль могъяс ковмис пӧртны олӧмӧ.
Колӧ пасйыны, мый бӧртиджык ме тшӧтш мӧвпалі, мый позис вӧчны мӧд ногджык. И ог шу, мый збыльысь гӧрдитча тайӧ уджнас, мый сійӧ менам кутшӧмкӧ выліджык тшупӧд. А кӧть эськӧ и выль тшупӧд.
Быд творческӧй мортын олӧ критик, коді йирӧ, мый коліс эськӧ бурджыка вӧчны. Но сідзжӧ быд творческӧй удж, кодӧс эштӧдін, да петіс йӧзӧ, колӧ лэдзны. Ӧд тадзи позьӧ быд удж дасысь вежлавны, и помыс оз тыдовтчы. Колӧ ас кадӧ лэдзны, мездысьны вӧчӧмторсьыс и
уджавны выльтор вылын, збыльмӧдны сэні ассьыд кӧсйӧмъястӧ. А спектакльыс уналы кажитчӧ, сідзкӧ, збыльысь бур удж, эз ӧд весьшӧрӧ пасйыны сійӧс «Золотая маскаӧн». Да и мукӧд постановкаыс, код вылын уджалі, меным тшӧтш тӧдчанаӧсь, мойдъяссӧ шуа.
Пельыд кӧ чош, он шӧйӧвош
—Театр ловъя, и спектакль ворсігӧн быдторйыс вермӧ лоны. Артистъяс висьтавлӧны сор-сьӧмъяс йылысь, серамбанаторъяс. А звукорежиссёрлӧн татшӧм кудйыс эм жӧ? Мый колӧ вӧчны, мед техникаыс эз сконъяв?
—Дерт, быдторйыс вермас лоны. Техникаыд техника и эм, вермас би кусны, мыйкӧ торксьыны, кӧть эськӧ унатор мый лӧсьӧдам спектакль кежлӧ, мед ставыс лючки артмис. Но мыйкӧ кӧ жугалас, дерт, оз ков шӧйӧвошны. Спектакль дырйи медтшӧкыда овлӧ, мый ылалан да артистлысь шуӧмсӧ он кыв, а сідзкӧ, он ас кадӧ шысӧ сет. Но тайӧ абу техникалӧн, а мортлӧн нин сорсьӧм. А быд спектакль, кӧть тэ сійӧс сёысь нин ворслін, быд пӧрйӧ выльысь чужӧ сцена вылын, и быдсикас сорсьылӧм вермас лоны. И бара жӧ пасъя, мый оз ков шӧйӧвошны, ылалін кӧ, пельыд мед вӧлі чош.
А техника боксянь кӧ торксьӧмсӧ казьтыштны, вӧвлі ӧтчыд сэтшӧмыс. Микшер пульт, сэсянь юргӧ став шылад-шыыс, йитӧма вӧлі ӧти проводӧн ӧтуввезкӧд, сысянь роутерыс включайтчӧ. Вӧлі мыйкӧ дзоньтасьӧны, кабель нюжӧдӧны. И вот статистическӧй электричествоӧн воис ток, да сотчис пультсьыс кутшӧмкӧ деталь. А миян рытнас спектакль. Бур, тайӧ вӧлі луннас, а эз спектакль дырйи. И микшер пультсӧ аслам жырйысь нуи сцена вылӧ, галёркаӧ. Сэтчӧ йитчим да, ме эг нин аслам жырсянь звукорежиссёрав, а сценасянь прожекторъяс пӧвстын.
Юрын шылада куд
—Глеб, кутшӧм шылад радейтанныд кывзыны?
—Медся ёна радейта джаз. А сідзсӧ уна сикасӧс кывза, а сідзжӧ кинолы, спектакльлы гижӧмсӧ.
—Тіян юрын, позьӧ шуны, шылада куд нин?
—Да, воясӧн юрын чукӧрмис быдса картотека: авторъяс, жанръяс, кытысь позьӧ мыйкӧ да мыйкӧ колана кадӧ перйыны.
—Ті асьныд гижанныд шылад. Окота абу гижны сьылысьяслы шылад, али сӧмын театрлы?
—Окота видлыны. Но, гашкӧ, абу дзик быд жанрын-а. Шуам, рок, джаз, мыйкӧ шӧрас. Ачым ме ог сьыв (татшӧм сямыс менам абу), инструментальнӧй шылад гижа, ворса гитараӧн, бас-гитараӧн. А театрын меным ёна кажитчӧ, сы вӧсна мый пукта ассьым пай спектакль дасьтӧмӧ, мичмӧда-бурмӧда сійӧс.
—Глеб, ті сӧмын Воркутаса театрлы гижанныд шыладсӧ али уджаланныд и мукӧдкӧд?
—Миян театрын «Кот в сапогах» дасьтім Москваса режиссёркӧд, коді меным вӧзйис уджыштны сыкӧд. Сійӧ неыджыд асшӧр «Каникулы» клоун театрысь.
<> Сёрнитіс Екатерина МАКАРОВА.
Снимокыс Воркутаса Б.А.Мордвинов нима театрысь.