Нелямын вит навигацияӧн кузь да сьӧкыд уна рейс вӧчӧма 90 арӧса капитан Егор Александрович Беляев. Сійӧ юксис некымын ветлӧм йылысь казьтылӧмӧн.
Водзкыв пыдди
Кольӧмвося ноябрын «Трибуна» газетысь лыдди «Самый молодой капитан на Печоре» гижӧд. Сэні мужичӧйыс висьталӧ, мый 1968 воын сійӧс индӧмаӧсь «Якорницаса» капитанӧн, а 1969 вося апрельын сетӧмаӧсь армияӧ пӧвестка. Уджалӧма ӧти навигация Пӧдчеремын сплаврейдын да шуӧ, гӧрдитча пӧ, мый вӧлі медся том капитанӧн. Меным тайӧ парскис. Уджаліс кӧ 10, 20, 30 навигация, сэки позис эськӧ гӧрдитчыны.
Ва вылӧ ме медводдзаысь петі 1957 воын, а бӧръяысьсӧ – 2001-ӧдын. Первой навигация дырйиыс ветлі Лунвыв Джеболсянь муртса на лӧсьӧдан Комсомольск-на-Печорелань. Мӧд да коймӧд вонас катлі Куръялань. Буксируйті катерӧн 50 тоннаа понтон.
«Некор отсӧгсӧ оз кор»
1959 вося гожӧмын капитанъяс чукӧртчисны диспетчерскӧйын. Начальник пырис да матыстчис ме дорӧ, мунам пӧ мекӧд. Уджалан жыръяс пырим да, мыччис кабала, лыддьы пӧ: «Начальнику водного участка пути Цыбульскому. Обеспечьте завтра утром отправку опытного капитана вертолётом в Якшу для обязательной доставки в Игостав отопительного котла и оборудования. Управляющий трестом «Войвожнефтегазразведка» Голощёкин».
Сэсся шуӧ, ӧні жӧ пӧ котлопунктысь босьт сёян-юан да мун аэропортӧ. Юалі: «Мыйла ме?». А сійӧ – бӧрыннас пӧ висьтала.
Якшаын пилот пуксьӧдіс вертолётсӧ посёлоксьыс ёна ылын кушинӧ. Муні берег вылас, лэччи катер дорас. Командаыс вочаалӧ:
–Кысянь тэ?
–Перымысь купеч тракт кузя вои. Мунам Мылдінӧ?
–Огӧ, ми отсӧг виччысям.
–Кодсянькӧ? Ме лэби тіянлы отсӧг вылӧ.
Якшасянь Печорасӧ ме бура нин тӧді, кӧні кось, кӧні борган. Заведитім катернымӧс, йӧт-кыштчим да мӧдӧдчим кывтыд. Игӧставӧ воим мӧд лунас нин. Кывтім 160 километр, вайим 14 тонна сьӧкта пӧрт.
Начальниккӧд аддзысим да, гӧгӧрвоӧдіс, сӧвещание дырйи пӧ некыдзи эг вермӧй бӧрйыны, кодӧс ыстынысӧ. А асывнас пӧ пырис механик Михаил Степаныч да вӧзйис отсӧг вылӧ мӧдӧдны Беляевӧс. Сійӧ пӧ войдӧрлун ӧтнас локтіс Куръясянь и некор некутшӧм отсӧг оз кор.
«Разведчик» нинӧмысь оз пов
1960 воын нёльӧд навигация кежлӧ Печораысь босьті выль катер. Мылдінӧ воӧм мысьт трестӧн веськӧдлысь видзӧдаліс-донъяліс гӧгӧр да тшӧктіс «Разведчикын» лӧсьӧдны связь да мукӧд коланатор. Капитаннас индіс менӧ. Голощёкинкӧд кайим Куръяӧдз, сэсся Уньяӧдз да вылӧджык на. Сӧмын вежон мысти бергӧдчим Мылдінӧ.
1961 вося гожӧмын тшӧктісны Щельяюрӧдз кыскыны буритчан установкалы колана оборудованиеа да кык С-80 трактора пу баржа. Тайӧ ю кузя 900 километр. Та ылна рейсыс менам вӧлі медводдза на. А медся тӧдчанаыс – мунны Печора вомӧн кӧрт туй пос увті.
Квайтымын ӧтиӧдын жӧ арнас миянлы ковмис вӧчны медводдза рейс Вуктылӧдз. Кыским кык бульдозер да кык балок тыра понтон. Миянкӧд тшӧтш вӧліны кык тракторист да куим рабочӧй. Эг тӧдӧй, кытчӧ колӧ ректысьнысӧ да, кылӧдчим Вуктыл юӧдз. Берегсьыс чукӧртім керъяс да вӧчим сыысь тракторъяслы лэччанкаян пос.
Кузь да сьӧкыд рейсыс вӧлі уна, но гоз-мӧдӧс окота казьтыштны торйӧн.
1963 вося июль. «Домна Каликова» паракод катӧдіс ломтас тыра 1.000 тонна сьӧкта баржа Дутовӧдз да косіс Печораӧ ляпкыд ва вӧсна. Миянлы тшӧктісны кыскыны баржасӧ водзӧ Мылдінӧдз, а сэсся Ылыдз кузя Максимын бурӧвӧйӧдз. Ньӧжйӧник, сьӧкыда, но воим Кокыль ю вомӧдз, а коськӧдыс кыскыны эг вермӧй, баржаыс пуксис, став ломтасыс – 400 тонна – вӧлі бӧжладорас да. Веськыд-шуйгаладорӧ некымынысь нетшыштім, сэсся веськыдладорас ёнджыка артмис да, кутнысӧ эг удитӧй, визулыс бергӧдіс ю вомӧныс. Баржаыс 84 метр кузьта да, ӧтар-мӧдар помыс берегас мыджсисны пос моз. Катернымӧс домалім коз пуӧ да пукалам виччысям. Куим-ӧ-нёль час мысти баржаным вӧрзис, бергӧдчис кузьмӧс ног. Вӧлӧмкӧ, шкиперным восьтӧма кранъяссӧ, да ломтасыс баржа пасьталыс разалӧма, та вӧсна и рӧвняйтчис.
Босьтчим водзӧ буксируйтны, да коськӧдыс кыскыны бара на эз артмы. Выльысь домасим Кокыль-Ылыдз ӧтлаасянінын.
Бӧръя позянлун – тойлавны баржасӧ бӧжладорсяньыс. Йӧткалім, тойлалім, да сантиметрӧн-сантиметрӧн вуджим жӧ косьтӧ. Бурӧвӧйӧдзыс вит километрсӧ тадзи и мунім. Дутовсянь Мыл-дінӧдз 200 километрсӧ да Кокыль вомӧдз 100-сӧ венім кокньыдджыка Максимӧдзыс вит дорсьыс.
Места вылас ломтассӧ ректісны да, баржа нырыс бӧжладорсьыс куим пӧв вылынджык лои. Кузь буксирӧн домалім да зэв ньӧжйӧник мӧдім бӧр, пӧшти кылӧдчӧмӧн и воӧдчим медводз Мылдінӧ, а сэсся и Дутовӧ.
Сійӧ жӧ вося августын ёнакодь зэрӧм бӧрын Ылыдз туис, да миянӧс бара на ыстісны 150 тоннаа баржаӧн Еремейысь вывлань Саръюдінӧдз. Сэтчӧ кайим ӧдйӧ, а мусирсӧ ректігкості ваыс ямис. Муртса вӧрзим – пуксим. Видзӧдам да, мотора пыж мунӧ, шенасьны мӧдім да, том зонмыс кӧсйысис миянлы туйсӧ петкӧдлыны. Нуӧдіс Еремейӧдз, Приуральскӧйӧдз да горувджык на. 1963 восяньыс сымда кад нин колис, а ӧнӧдз бурӧн казьтыла Еремейысь Аркадий Собянинӧс. Сё пасибӧ бур мортлы!
Арнас менсьым «Разведчикӧс», буксируйтан нӧшта вит судно, «Нефтяник Печоры» да «Комсомольск-на-Печоре» самоходнӧй баржаяс ыстісны войвылӧ. Вуктылсянь Льӧмтыбӧжӧдз 18 километрсӧ лунтыр кайим. Колип нин кывтіс. Пемдіс. А ми баржа на кыскам. Пырим Льӧм-тыбӧжса куръяӧ да сэтчӧ и колим тӧвйыны.
А локтан вося тулысын менӧ вертолётӧн ыстісны Льӧмтыбӧжӧ катерла. Пилот Михайлов юасьӧ:
–Мый нӧ, бара на кодлыкӧ отсӧг вылӧ?
–Ог, аслам катерла.
«Рубин» кӧртымын
1964 воын Печораысь босьті «Рубин» выль катер. Пасйысим, босьтім судно вылӧ свидетельство, да сетісны сейсмопартиялы кӧртымӧ. Дыр чукӧртчӧм бӧрын лэччим Новый Борлань. Тӧлысь уджыштӧм бӧрын воис мӧд катер, а миянлы тшӧктісны ӧдйӧ воӧдчыны Мылдінӧ. Куим суткиӧн венім 1.250 километр – Москва ылнаӧдз.
Мылдінын тшӧктісны катны 200 километр Куръяӧ 50 тоннаа понтонӧн. Вӧлӧмкӧ, сэні миянӧс виччысьӧ ыджыд пур – 50 куба нёль, 25 куба дас да 10 куба дас дозъяс. Быдса 24 пельса! Кывтім бӧрсӧ куим сутки, сэсся – Куръяӧ понтонла. Ваыс усьӧма нин вӧлі да, юрсиктӧ бӧрсӧ ӧдва воим.
Ӧти гожӧм «Рубинӧн» уджалім Пашняын, ӧнія Нефтепечорскын. Катлім ю кузя неыджыд пуръяс Шӧрдінлань лежнёвка-туй вӧчанінӧ.
Вӧйӧм «Урал»
Игӧставын уна во сулаліс гӧгыля паракод сяма «Урал» судно. И шуисны сійӧс выльмӧдны: вундісны кӧлесаяссӧ, пуктісны суднолы лӧсялана двигатель да мукӧдтор вӧчисны. Но капитанъясысь некод эз кӧсйы татшӧмнас уджавны. Ме эськӧ эг жӧ. Но менам вӧлі «КПСС» шыпасъяса ичӧтик книга, та вӧсна мырдӧналісны: «Тэныд быть!».
1965 воын тайӧ «Уралнас» плавъялан кран буксируйтӧмӧн лэччим Вуктыл – Чилимдін – Лёждуг – бурӧвӧй – Новый Бор ва туйӧд. Пӧпуттьӧ бурӧвӧйясын краныс ректіс сюрс тоннаа баржаясысь сёй. Шапкина ю кузя катім 100-ысь унджык километр. Сэні 1.000 тоннаа нёль баржа нин сулаліс, и крансӧ сэтчӧ колим. Печораӧ бергӧдчим 48 лун мысти.
Тшӧкыда ветлывлім Печора – Усинск – Колва 200 километра ва туйӧд. Гожӧмнас Колваын ваыс вӧлі ляпкыд да, судно корпаыс вочасӧн гирсйыссис-вӧсняліс. И ӧти войӧ Печораын миян «Уралным» вӧйис. Асьным муртса эг пӧдӧй. Садьмим да, каютаын ва. Тамбур ӧдзӧсӧдыс петнысӧ эг нин вермӧй. Бур, палубаас светӧвӧй люкӧдыс письтім да ловйӧн колим. Вӧлі зэв джуджыд да, коскӧдз ваын ЧАС чӧж палуба вылас сулалім! Медбӧрын горзӧмнымӧс стӧрӧжыс кыліс да котӧртіс котельнӧйӧ. Сэсянь кык мужичӧй котӧрӧн лэччисны да пыжӧн вуджӧдісны миянӧс берегӧ. Котельнӧяс сэсся шонтысим да косьтысим.
Став котырнаным корим рӧштшӧт, но менӧ Мылдінӧ эз лэдзны. Выль судно пӧ воас, да тэныд сетам. А «Уралтӧ» кӧрт вылӧ лэдзисны.
Отпуск да отгулъяс гуляйтӧм бӧрын бара на вӧзйыси Мылдінӧ. И бара эз кӧсйысьны, вермам пӧ сӧмын рӧштшӧттӧ сетны. А тадзсӧ уна вося уджалӧмысь джын нажӧткасӧ эськӧ вошті. Март помын выльысь Печораӧ ветлі, нуи кабала, мый менӧ босьтӧны Мылдінӧ удж вылӧ вуджӧдӧмӧн. Дӧзмӧдісны-нюжӧдчисны вежон кымын на. Сэсся гӧгӧрвоисны, мый ог кольччы, да вӧчисны ме ног. Тадзи и зіли Мылдінын 1966-ӧдсянь 2001 воӧдз.
Гижӧдсӧ дасьтіс Ирина Шаманова. <> Комиӧдіс Елена Плетцер.
Снимокъясыс Ирина ШамановалӦн да «Заря Припечорья» газет редакцияысь.