Комиын Сикт воӧ Госсӧветысь социальнӧй политика комитетлӧн водзмӧстчӧмӧн февраль 6 лунӧ Кулӧмдін районса Помӧсдін сиктӧ ветліс социальнӧй десант. Могыс – восьсӧн сёрнитны сиктса войтыркӧд да отсавны налы збыльмӧдны вӧзйӧмъяссӧ.
Комитетӧн веськӧдлысь Анастасия Михайловалӧн висьталӧм серти, десант уджтассӧ дасьтісны депутатъяс, власьт тэчасын да общественнӧй котыръясын зільысьяс. А Помӧсдінӧ мӧдӧдчӧмаӧсь сы вӧсна, мый сэтчӧс войтыр – зэв водзмӧстчысь йӧз.
–Помӧсдін – сикт, кӧні сӧвмӧдӧны литература, музыка, спорт, ӧд буретш тані чужис «Зумыд ош» ордйысьӧм. Ветлігкежлӧ дасьтысигӧн ми ставсӧ тайӧс босьтім тӧд вылӧ, а кор мӧдӧдчам десантнас и мукӧд сиктӧ – тшӧтш жӧ кутам подуласьны сэні олысьяслӧн вӧзйӧм-корӧмъяс вылӧ, – висьталіс Анастасия Михайлова.
Десант дырйи Сыктывкарысь воӧмаяс аддзысьлӧмъяссӧ котыртлісны детсадйын, школаын, том йӧз шӧринын, культура керкаын.
Велӧданног сӧвмӧдан институтын уджалысьяс нуӧдісны семинар-практикум, кӧні Кулӧмдін да Сыктывдін районъясса ясли-детсадйын зільысьяс юксисны челядьӧс чужан кывйӧ велӧдӧмын, этнокультура видзӧмын опытӧн, а Помӧсдінса зонпосни нимкодьӧдісны видзӧдысьясӧс сценка-ясын ворсӧмӧн.
«Войвыв кодзув» журнал таво пасйӧ 100 вося юбилей, и В.Т.Чисталёв нима школаын гырысь классъясын велӧдчысьяскӧд аддзысьлісны журналса главнӧй редактор Нина Обрезкова да гижысь Александр Шебырев. Найӧ, да и асьныс ныв-зон, лыддисны кывбуръяс, висьтъяс. Кык том мортлы, Данииллы да Таисиялы, козинӧн лоис юӧр, мый налы во чӧж кутас воны «Войвыв кодзув» журнал.
Коми семьяяслӧн «Шуда котыр» ӧтмунӧмысь Наталья Шахова котыртліс помӧсдінсакӧд чужан му туялӧм кузя квиз-ворсӧм, нуӧдіс набойкаӧн паськӧм мичмӧдан мастер-класс. Эжва йывсалы сьӧлӧм вылас воис аддзысьлӧмыс, да найӧ корисны «Шуда котырсаӧс» нӧшта волыны налӧн сиктӧ.
Велӧдчысьяскӧд аддзысьлісны и торъя военнӧй операцияын тышкасьысьяс – Госсӧветысь ветеранъяслӧн тӧжд-мог, йӧзлысь дзоньвидзалун видзан, физкультура да спорт комиссияӧн веськӧдлысь Евгений Напалков, депутат Степан Ульныров да «Пера. Путь героя» регионса программаӧ пырӧдчысьяс.
–Помӧсдінӧ миянкӧд ветлісны тактическӧй медицина кузя инструктор Геннадий Тучнолобов да «Достойное поколение» общественнӧй котырын зільысьяс. Найӧ петкӧдлісны ныв-зонлы, кыдзи колӧ сетны доймӧмалы медводдза отсӧг. Сиктсалы тайӧ зэв коланатор, – висьталіс Евгений Напалков.
Помӧсдінын сӧвмӧдӧны национальнӧй спорт сикас – «Зумыд ош» вермасьӧм. Школаса спортзалын спортса мастер, тренер Михаил Барт да «Ошпи» шӧринысь быдтасъяс юксисны сиктса томуловкӧд асланыс опытӧн.
–Татшӧм аддзысьлӧмъяссӧ ми и водзӧ кутам котыртлыны, медым национальнӧй спорт сикасъяс крепыда вужъясисны миян олӧмӧ, – пасйис депутат Юрий Широков.
Помӧсдінын десант нуӧдігӧн Госсӧветса социальнӧй комитетысь депутатъяс сёрнитісны и йӧзлы отсалӧм йылысь. Чукӧртчылӧм вылас тшӧтш волісны удж да йӧзӧс социальнӧя доръян, войтырлысь дзоньвидзалун видзан министерствоясын, «Айму дорйысьяс» фондысь филиалӧн веськӧдлысь Валентина Дитц, Кулӧмдін районса адмнистрацияӧн юрнуӧдысь Сергей Рубан.
Удж министерствоысь отделӧн веськӧдлысь Богдана Третьякова тӧдмӧдіс, кутшӧм социальнӧй отсӧг урчитӧма йӧзлы. Тайӧ и регионса семьялы капитал, и нӧбасьысь да морӧс йӧлӧн кагасӧ вердысь нывбабаяслы, торъя военнӧй операцияын тышкасьысьяслы да налӧн рӧдвужлы кокньӧдъяс. Валентина Дитц торйӧн пасйис, мый тавосянь СВО-ын тышкасьысьяслӧн эм позянлун кырымавны асшӧр удж лӧсьӧдӧм могысь социальнӧй контракт.
Госсӧветысь комитетлӧн чукӧртчылігӧн сиктса войтыр кыпӧдлісны и мобильнӧй связь бурмӧдӧм, сиктын ичӧт бизнес сӧвмӧдӧм, специалистъясӧс дасьтӧм йылысь да мукӧд юалӧм.
–Артмис збыльысь восьса сёрни. Ми эг сӧмын висьталӧй, кутшӧм социальнӧй отсӧг урчитӧма йӧзлы, но и кывзім сиктсалысь вӧзйӧмъяссӧ. Чайта да, депутатъяслӧн, власьт тэчасын уджалысьяслӧн йӧзкӧд аддзысьлӧмъясыс зэв коланаӧсь, – пасйис Госсӧветысь социальнӧй политика комитетӧн веськӧдлысь Анастасия Михайлова.
Помӧсдінын социальнӧй десантыс помасис Коми Республикаса юркарысь творческӧй котыръяслӧн, на пӧвстын и «Северная околица» ансамбльлӧн, концертӧн. Комиын Сикт воӧ татшӧм аддзысьлӧмъясыс лоасны и мукӧд районын.
<> Гижӧдсӧ дасьтіс Павел СИМПЕЛЕВ. Снимокъясыс ӧтуввезйысь.