Кольӧм во регионса «Победа» фондӧ Комиын олысьяс, учреждение-предприятиеяс вуджӧдӧмаӧсь 3,7 миллион шайт. Тайӧ сьӧм вылас кар-районса ветеран сӧветъяслӧн водзмӧстчӧмӧн вӧлі дзоньталӧма памятникъяс, отсалӧма школаса музейяслы да олӧма войтырлы.
Изьва, Кулӧмдін, Сыктывдін, Кӧрткерӧс да Мылдін районъясса шойнаясын 1,8 миллион шайт дон сувтӧдӧмаӧсь Айму вӧсна Ыджыд тышса ветеранъяслӧн дӧзьӧртӧм гуяс вылӧ налӧн нимъяса 314 казьтылан пас. Таысь кындзи выльмӧдӧмаӧсь Великӧй Отечественнӧй войнаын тышкасьысьяслӧн гуяс вылын 232 пас да 63 гу вылын садитӧмаӧсь дзоридзьяс.
«Победа» фондысь вичмӧдӧмаӧсь сьӧм республикаса сикт-посёлокын дзоньтавны война вылын усьӧмаяслы 12 памятник.
Йӧзӧн чукӧртӧм сьӧмысь юкӧн вӧлі торйӧдӧма и школаса музейяслы, медым сэні зільысьяс и водзӧ корсисны-туялісны Айму вӧсна Ыджыд тышын, торъя военнӧй операцияын тышкасьысьяс, уджын водзмӧстчысьяс йылысь пасйӧдъяс.
2025 воын «Победа» фонд отсаліс судзсьытӧма олысь 93 пенсионерлы ньӧбны пес, а ветеранъяслӧн республикаса госпитальлы вуджӧдіс 150 сюрс шайт.
–Сьӧлӧмсянь аттьӧала быдӧнӧс, коді Ыджыд Вермӧмсянь 80 во тыран воӧ пырӧдчис «Победа» фондӧ сьӧм чукӧртан уджӧ. Тадзи ми бурӧн казьтылам найӧс, кодъяс сьӧкыд война воясӧ дорйисны странанымӧс, а сэсся став вынсӧ пуктісны сійӧс сӧвмӧдӧмӧ, – пасйис ветеранъяслӧн республикаса сӧветӧн веськӧдлысь Людмила Жукова.
<> Гижӧдсӧ дасьтіс Павел СИМПЕЛЕВ.