Выль во водзын республикаса больничаясӧ воис тэрыб отсӧг сетан сёысь унджык машина.
–Тайӧ збыльысь лоис миян регионлы выльвося козинӧн, ӧд тэрыб отсӧн сетан машинаяс автопарксӧ коліс нин выльмӧдны. Ыджыд аттьӧ колӧ висьтавны Россияса правительстволы, мый миянлысь корӧмнымӧс пыдди пуктісны да вичмӧдісны сьӧм ньӧбны 102 автомашина, – пасйис республикаса правительствоӧн веськӧдлысь Дмитрий Братыненко.
Техникасӧ лои ньӧбӧма кык госпрограмма серти: Арктикаса регионъяслы вичмӧдӧм субсидия вылӧ Воркутаӧ, Интаӧ, Усинскӧ да Чилимдін районӧ воас 40 УАЗ, а Россияса промышленносьт да вузасян министерство отсӧгӧн Комиӧс могмӧдісны нӧшта 62 УАЗ-ӧн да «Газельӧн».
Машинаяс ньӧбӧм вылӧ федеральнӧй бюджетысь вӧлі торйӧдӧма 450 миллион гӧгӧр шайт, республикаса сьӧмкудйысь – 175 миллион.
Тайӧ техникасӧ вӧчӧма войвывса кӧдзыд поводдя тӧд вылӧ босьтӧмӧн, «УАЗ-профи» автомобильясӧ сувтӧдӧма став колана оборудованиесӧ, «Газельясын» жӧ эм позянлун юӧртны больничаӧ, кутшӧм отсӧг виччысьӧ висьмӧм мортыс, медым бурдӧдчанінас водзвыв дасьтысясны отсӧгсӧ сетны.
<> Гижӧдсӧ дасьтіс павел СИМПЕЛЕВ. Снимокъясыс ӧтуввезйысь.