Декабрь 20 лунӧ Сыктывкарса Лесопаркӧвӧй уличаын воссис лызьӧн котралан выль база. И нимсӧ сетісны мичаӧс – «Йиркап». Коркӧ пӧ зэв важӧн коми пармаын вӧлӧма татшӧм вӧралысь, коді котралӧма мойдын кодь лызьӧн.
2022 вося гожӧмын козъя вӧрын стрӧитчанінас вӧчисны ректас. Во мысти босьтчисны кыпӧдны базасӧ. Уджсӧ кӧсйылісны сигӧртны 2024 воын, но урчитӧм мында федеральнӧй сьӧмыс эз вичмы. 2025 воын стрӧйбасӧ эштӧдӧм могысь республикаса бюджетысь торйӧдісны 244,2 миллион шайт. Ставсӧ база кыпӧдӧм могысь видзӧмаӧсь 363,1 миллион.
«Йиркапыс» зэв ёна колӧ челядьлӧн да томъяслӧн спортшколалы. Таӧдз сійӧ меститчыліс 1980 воын кыпӧдлӧм пу стрӧйбаын.
–Важ пу керкаас ставыс вӧлі нин пӧлыньтчӧма, кӧдзыд. Кӧть миян ныв-зонмӧс да тренеръясӧс он повзьӧд, нинӧм вылӧ видзӧдтӧг найӧ дасьӧсь шедӧдны гырысь вермӧмъяс. Талун спортшколаас гӧгӧр дзим-дзурк да шоныд. Тані мӧдасны дасьтысьны 490 ныв-зон: лызьӧн ордйысьысьяс, биатлонистъяс да компас серти лызьӧн котралысьяс. Ӧні, майбыр, вежсьыны-пасьтасьны позьӧ кӧкъямыс торъя блокын. Быдын нӧшта кык жыр – нывъяслы да зонъяслы, юр сюянін эм и тренерлы. Нӧшта ӧти жырйын ордйысьӧм кежлӧ позьӧ бура дасьтыны лызь. Лесопаркӧвӧй уличаӧдыс ӧтарӧ-мӧдарӧ журъялӧ уна машина. Водзті лызясьны колӧ вӧлі туйсӧ вуджӧм бӧрын. Талун лызь вылӧ позьӧ сувтны веськыда базаас, кысянь нюжӧдӧма бур трасса, – висьталіс Комиын физкультураса да спортса министр Светлана Суворкина.
Кыдз пасйис Олимпиада кежлӧ спортсменъясӧс дасьтан «Фаворит» спортшколаӧн веськӧдлысь Константин Собянин, челядьлы ньӧбӧмаӧсь Россияын вӧчӧм спорт эмбур да мукӧд коланатор.
«Фаворитысь» ӧтдор тані мӧдасны тренируйтчыны и «Северная Олимпия» спортшколаысь да мукӧд котырысь быдтасъяс.
«Йиркапын» сідзжӧ эм ветымын морт вылӧ артыштӧм конференц-зал, тренажёра зал, буфет, медицина блок, саунаа шойччанін, тренеръяслы да администрациялы жыръяс. Быдлаӧ письтасны и коляскаа вермытӧмаяс.
Спортсменъясысь ӧтдор татчӧ вермасны волывлыны да босьтлыны лызь-бедь да кӧмкот карын олысьяс.
Олимпиадаса куимысь чемпионка Юлия Чепалова зэв вылӧ донъяліс базасӧ. Унаӧн пӧ мӧдасны завидьтыны сыктывкарсалы, ӧд унджык регионас кыпӧдӧны оз капитальнӧй керка, а юр сюянін.
Сыктывкарса администрацияӧн веськӧдлысьӧс вежысь Ольга Бригида казьтыштіс, мый Россияын сӧмын миян карын эм лызьӧн котралан зэв кузь, югзьӧдӧм да спецтехникаӧн шыльӧдӧм трассаыс.
Кутам пӧ лача, мый татшӧмсяма база кыптас и «Орбита» микрорайонын.
Базасӧ кыпыда восьтӧм бӧрын лызь вылӧ медводдзаысь сувтысьяслы петкӧдлісны мастер-класс, а бӧрас верстьӧ и челядь ордйысисны.
Локтан вося февральын «Йиркапын» нуӧдасны Россияын Шӧр да Рытыв-Войвыв регионъясса каръяс пӧвстын спартакиада, а мартын Россияса чемпионатын ордйысясны компас серти лызьӧн котралысьяс.
<> Дасьтіс Николай РАЗМЫСЛОВ. Снимокъясыс ӧтуввезйысь.