Декабрь 19 лунӧ Сыктывкарса «Лузалес-Арена» культура да спорт шӧринын «Олӧм кытш» театрализуйтӧм яръюгыд петкӧдчӧмӧн сигӧртісны Ыджыд Вермӧмсянь 80 во тырӧм, Россияын Айму дорйысь да Комиын герой во. Кыпыд рыт дырйи торйӧн нимӧдісны СВО-ын тышкасьысьясӧс, налысь семьяяс, а сідзжӧ «ленточкасайса» боечьяслы отсалысь волонтёръясӧс.
«Асъя кыа» ансамбльса хорӧн Россияса да Коми Республикаса кып сьылӧм бӧрын видзӧ-дысьяслы петкӧдлісны «Олӧм кытш». Гаж-рытпук пуктысь-лӧсьӧдысьыс – режиссёр-постановщик Вера Зиновьева, Визин сиктса культура керкаысь балетмейстер, «Признание» премияа лауреат. Проектсӧ пасйӧма «Салют Победы» йӧзкостса творчестволы сиӧм ставроссияса фестивальын «Театрализуйтӧм петкӧдчӧм (тематическӧй концерт)» нимпасын III тшупӧда дипломӧн.
«Олӧм кытш» – тайӧ Коми му сӧвмӧм йылысь сьылана-йӧктана висьт: миф-легендаяссянь ӧнія кадӧдз.
Видзӧдысьяс медводдза здукъяссяньыс вӧйтчылісны важ кадӧ: сцена вылын петкӧдчылісны пармаса быдтасъяс – повтӧм вӧралысьяс да семья би видзысь аньяс, нэмӧвӧйся традиция пыдди пуктысь семья-котыръяс.
Шуда-лада олӧмсӧ торкис «Сьӧд лэбач» – вайис Айму вӧсна Ыджыд тыш пансьӧм йылысь весьӧпӧртана юӧр. 170 сюрсысь унджык морт мунісны Комиысь фронт вылӧ. Сцена вылын – «Вставай, страна огромная!» да «Алӧй лента» сьыланкывъяс улӧ тылын олӧм, удж-мырсьӧм; Москвасянь Берлинӧдз вир кисьтана тыш-кось. А сы бӧрын – Вермӧм да усьӧмаясӧс казьтылӧм.
Выль олӧм пансьӧмсӧ петкӧдлісны «Пывсян» пыр: война вылысь воӧм мужичӧйяс пывсисны-мыссисны, да став сьӧкыд-лёкыс пожъявсис-исковтіс.
Вера Булышевалӧн «Катшасинъяс» сьылӧмыс казьтыштіс дзоридзалан Коми му, а Болгария-ысь Грета Ганчева тӧдчӧдіс татчӧс войтырлысь повтӧмлунсӧ.
Та бӧрын петкӧдлісны войнабӧрся олӧм: Войвыв сӧвмӧм, заводъяс кыпӧдӧм да туйяс нюжӧдӧм.
Ӧти кывйӧн, артистъяс да видзӧдысьяс ӧтув олісны-вуджисны быдса эпоха.
Владимир Юрковскийлӧн да Ольга Сосновскаялӧн «Северная песня» сьылігӧн видеоӧн казьтыштісны регионнымӧс паськыда нимӧдӧм геройясӧс: Ухтаса НПЗ-ысь директор Анна Молийӧс, педагог Александр Католиковӧс, Комиын медводдза юралысь Юрий Спиридоновӧс да мукӧдӧс. «Баллада о спорте» тӧдчӧдіс, мый войвыв муным озыр енбиа спортсменъясӧн, на лыдын лыжникъяс Раиса Сметанина, Николай Бажуков, Василий Рочев, варччысь Аркадий Вятчанин да с.в.
А сэсся нимӧдісны СВО-ын тышкасьысьясӧс да налысь семья-котыръяс, чӧв ланьтлӧм здукӧн казьтыштісны тыш-косьын усьӧмаясӧс.
Чолӧмалісны и талун асланыс удж-зільӧмӧн республиканымӧс сӧвмӧдысь повтӧм войтырӧс, кодъяс зумыда восьлалӧны водзӧ да венӧны быдсикас мытшӧд-падмӧг. Сцена вылын муниципалитетӧн веськӧдлысьяс аттьӧалана гижӧдӧн пасйисны кар-районъясысь дас нёль мортӧс.
Сідз, Воркутаса «Звёздочка» детсадйысь кагульнича Светлана Мякушина водзмӧстчӧ СВО-салы гуманитарнӧй отсӧг чукӧртӧмын да велӧдӧ бур вӧчны мукӧдсӧ. Интаысь Ольга Осташова котыртӧма «Сети Победы» мастерскӧй, кӧні 500-ысь унджык морт велӧдчӧма кыны маскируйтчан тыв да вӧчавны фронтлы блиндажын вӧдитчан сись.
Княжпогост районысь волонтёр Виталий Бойко дзоньталӧ да мӧдӧдӧ спецоперация нуӧданінӧ машина-мотоцикл, а сідзжӧ ачыс новлӧдлӧ гуманитарнӧй груз.
Кӧрткерӧс районса Каляты овмӧдчӧминӧн веськӧдлысь Софья Богадевич збыльмӧдӧма нин йӧзкостса 15 проект, а таво та весьтӧ восьтӧмаӧсь «Сирень Победы» воинскӧй слава аллея.
Сосногорскын «Движение Первых» ӧтмунӧмын водзмӧстчысь Никита Камынинӧс пасйисны тшӧтшъяяссӧ инженер творчествоӧ да патриотизмӧ ышӧдӧмысь. Сылӧн зільӧмӧн школаас восьтӧмаӧсь авиа- да танкостроительнӧй моделирование кружокъяс, а ачыс петалӧма вермысьӧн регионса конкурсъясын.
Сыктывдін районса библиотека тэчасысь главнӧй библиограф Людмила Михайлова дасьтӧ герой-землякъяс кузя электроннӧй юӧр-ресурс да волонтёралӧ «Девчата и Ко» котырын.
Луздорысь Занулье овмӧдчӧминса юралысь Иван Старцевлӧн водзмӧстчӧмӧн сиктас дзоньталӧма туйяс, восьтӧма тренажёра зал, ФАП да спортплощадка.
Сыктывкарысь том спортсмен Илья Пахомов вермӧма президентлӧн спорт ордйысьӧмын, а Ухтаса школаын велӧдчысь Иван Смородов отсалӧ вӧчавны СВО-ын тышкасьысьяслы дронъяс да дзоньталӧ уна челядя семьяясысь зонпоснилы электроннӧй чачаяс.
Сыктыв районысь режиссёр-постановщик Вера Зиновьеваӧс шуисны республикаса культураын медбур уджалысьӧн.
Мылдін районысь Надежда Савинок семьяын 2010-2025 воясӧ быдтӧмаӧсь 30 челядь. Талун Надежда Николаевналӧн шоныд борд улын 9 босьтӧм посниулов.
Удора районысь ас вылӧ уджалысь Даниил Размыслов кывкутӧ Мозын ю вомӧн паром лючки уджӧдӧмысь, тӧвся кадӧ весалӧ лымйысь туйяс да могмӧдӧ сиктсаясӧс пескӧн.
Емдін районысь Людмила Бойколӧн водзмӧстчӧмӧн лӧсьӧдӧм волонтёр котыр куим воӧн чу-кӧртӧма да ыстӧма фронтвывсалы 10 миллионысь унджык шайт дон техника.
Кулӧмдінса школаын 7 классын велӧдчысь Анатолий Нестеровӧс пасйисны повтӧмлунысь: арся рытӧ туй кузя гуляйтігӧн сійӧ аддзӧма, кыдзи пемыд паськӧма ань усьӧма, да дзик пыр усь-кӧдчӧма отсӧг вылӧ – сувтӧдӧма туй кузя мунысь транспорт.
Чукӧртчӧмаяс дорӧ шыӧдчигӧн Сыктывкарса да Коми-Зыряна митрополит Филипп пасйис, геройясыс пӧ медвойдӧр – тыш-косьын Айму дорйысьяс. Но, дерт, и уджалысь войтырӧс позьӧ татшӧмнас шуны: шахтёрӧс, бурдӧдысьӧс, стрӧительӧс, спортсменӧс да мукӧдӧс.
А юралысь Ростислав Гольдштейн тӧдчӧдіс, Коми пӧ – геройяса республика, медбур йӧза му.
«Талун ми кывкӧрталам Россияын Айму дорйысь да Комиын герой во. Таво жӧ пасйим Ыджыд Вермӧмсянь 80 во.
Бӧрӧ колян 2025 воыс ясыда петкӧдліс, мый миян республикаын уна збыль геройыс, и миян эм кодлысь велӧдчыны бурас. А дзик нин регыд выль 2026 во. Россияса президент йӧзӧдіс сійӧс Войтырӧс ӧтувтан воӧн, а миян республикаын тайӧ лоӧ Сикт-грезд во.
Ми велӧдчим пыдди пуктыны чужан муса геройясӧс, гӧрдитчыны наӧн. Мед тайӧ традицияыс и водзӧ кутас ӧтувтны-ышӧдны миянӧс.
Сиа ставнымлы сӧгласа олӧм, страна да Коми му сӧвмӧдӧм-дзоридзалӧмын выль вермӧм-шедӧ-дӧмторъяс», – пасйис регионӧн веськӧдлысь.
Кыпыд чукӧртчылӧм-гажсӧ «Тулыслӧн кӧр» сьыланкывйӧн сигӧртісны «Северная околица» да «Пламя 21» ансамбльяс. Айму вӧсна Ыджыд тышлы да Вермӧмсянь юбилейлы сиӧм тайӧ сьыланыс нӧшта ӧтчыдысь петкӧдліс оравлытӧм олӧм кытшсӧ да кӧленаяс костын зумыд йитӧдсӧ.
<> Алина Латышева. Снимокъясыс ӧтуввезйысь.