Коми Республикаса вужвойтырлӧн шылада-драмаа театр дасьтӧ «Зарни юртаса сир» теш, кӧні геройясӧн лоасны аснога вӧравны да гырысь чери кыйны радейтысьяс.
Колӧ пасйыны, мый тайӧ постановкаыс казьтыштас тӧдса нин геройясӧс, но петкӧдлас накӧд выль лоӧмтор.
2011 воын вужвойтырлӧн шылада-драмаа театр петкӧдліс Александр Суворовлӧн пьеса серти «Сексот, или Особенности национальной охоты в Коми» теш. Выль пуктасыс – тайӧ мӧд юкӧн, рочӧн сідзи и шусьӧ – «Царь-щука, или Особенности национальной рыбалки в Коми».
Александр Суворовлысь пьесасӧ комиӧдіс Анжелика Елфимова, режиссёралӧ Россияса искусствоясын заслуженнӧй деятель Светлана Горчакова.
Унаӧн, гашкӧ, помнитӧны геройяссӧ: Сергей Лоб (Андрей Засухин), Богдан Вернигуб (Андрей Епанешников), Павел Гусеев (Александр Ветошкин), Григорий Кочев (ворслісны Александр Кузнецов, Сергей Туркин, ӧні кутас ворсны Никита Дербин) да Лёха (ворсліс Владимир Уляшев, выль спектакльын ворсас Антон Куратов).
«Сексотын» найӧс ылӧдліс да збыльсӧ восьтан зелляӧн юктӧдліс Кикимера, а ӧні Лӧкань ты бокын миян тӧдса геройяс оз жӧ лоны ас кежаныс, выль приключение налы дасьтасны выль персонажъяс.
«Зарни юртаса сир» тешын сюрӧсыс гартчӧ зэв ыджыд сир гӧгӧр. И тайӧ абу мойд. Кывсьыліс, татшӧм сиръясыс збыльысь коркӧ уявлӧмаӧсь Коми муын – Синдор, Кадам, Дон тыясын. Шуам, Кулӧмдін районса олысьяс висьтавлісны, мый Кадам тыас вӧлӧма юр вылас кутш новлӧдлысь ыджыд сир, коді вермис и мортӧс кыскыны ва пыдӧсӧ. Кадам тыын йӧзыс повлісны эз сӧмын варччыны, но и чери кыйны. Дыр тайӧ сирыс найӧс повзьӧдліс. Но сюрисны повтӧмъяс, кодъяс кыйисны сійӧс. Вӧлӧма вывті ыджыд, а юрас збыльысь сатшкысьлӧма кутш да сідзи и вӧйлӧма, и кольӧма куш лыыс нин.
А кутшӧм сир кутасны кыйны «Зарни юртаса сир» тешын, ті тӧдмаланныд премьера дырйи!
* * *
Петкӧдчӧмъясыс лоасны декабрь 25 лунӧ 18 часын да январь 5 лунӧ 16 часын.
<> Евгения Савина.
Снимокъясыс Коми Республикаса вужвойтырлӧн шылада-драмаа театрысь.