Во заводитчӧмсянь Комиын 820-ысь унджык олысьлы вичмис асланыс керкаӧ биару вайӧдігӧн государствосянь отсӧг.
Сьӧма отсӧгсӧ – сё сюрс шайтӧдз – сетӧны федеральнӧй да регионса программаяс весьтӧ.
Россияса президент Владимир Путинлӧн индӧд серти федеральнӧй отсӧгсӧ сетӧны уна челядя да судзсьытӧма олысь семьяяслы, торъя военнӧй операцияын служитысь-тышкасьысьяслы да налӧн семьяяслы, Айму вӧсна Ыджыд тышса, йӧзӧдлытӧм войнаса ветеранъяслы да инвалидъяслы, тайӧ тышъясас усьӧмалӧн семьяяслы, I группаа инвалидъяслы да вермытӧм челядьӧс быдтысьяслы.
2025 воӧ федеральнӧй сьӧма отсӧгӧн биару вайӧдісны гортӧдзыс Комиын олысь 13 морт.
Республикасянь татшӧм отсӧгыс вичмӧ тӧдчымӧн унджыклы. Удж, занятосьт да йӧзӧс социальнӧя доръян министрлысь удж вӧчысь Татьяна Майковалӧн кывъяс серти, отсӧгысла вермасны шыӧдчыны судзсьытӧма олысьяс, кык да унджык челядя, ӧтка мама либӧ ӧтка батя семьяяс (челядьыслы, найӧ кӧ очнӧя велӧдчӧны, мед эз на вӧв 23 арӧс), семьяяс, кӧні бать-мамыс- лы абу на 40 арӧс, сиктын олысь семьяяс, а сідзжӧ вермытӧм кага быдтысьяс.
Таысь кындзи гортас биару нюжӧдӧм могысь республикасянь отсӧг сетӧны ӧткӧн олысьяслы, налӧн кӧ нажӧткаыс овны судзсьымӧн урчитӧмысь ичӧтджык, ӧтка пенсионеръяс, Великӧй Отечественнӧй войнаса участникъяс, мукӧд тыш-косьын воюйтысьяс да инвалидъяс да налӧн семьяяс, сиктын уджалысь 35 арӧсысь томджык специалистъяс, став группаа вермытӧмаяс, торъя военнӧй операцияын служитысь-тышкасьысьяс да налӧн семьяяс.
Сьӧма отсӧгсӧ позьӧ босьтны керка дорӧдз биару труба нюжӧдӧм, оборудование ньӧбӧм да сувтӧдӧм вылӧ.
–Отсӧгсӧ сетӧны кык ног. Сідз, мортыс кӧ кырымаліс нин биару нюжӧдӧм йылысь сёрнитчӧмсӧ, но сьӧма отсӧгла шыӧдчан лунӧдз эз на мынтысь, сьӧмсӧ вуджӧдӧны такӧд йитӧдын уджсӧ вӧчысь организациялы либӧ предпринимательлы. И татшӧм ногӧн сёрнитчӧмын индӧм донсӧ лоӧ вештӧма. А мортыс кӧ отсӧгла шыӧдчан лунӧ мынтысьӧма нин став уджсьыс, сэки сьӧмсӧ вуджӧдӧны сылы аслыс, – висьталіс Татьяна Майкова. – Йӧзыслы тайӧ кивыв да, окотапырысь шыӧдчӧны республикасянь сьӧма отсӧгла: тавося дас тӧлысьӧн сійӧс босьтіс нин 809 морт.
Удж, занятосьт да йӧзӧс социальнӧя доръян министерствоысь юӧр серти, миян регионын оланінӧдз биару нюжӧдӧм вылӧ тавося дас тӧлысьӧн бюджетысь вӧлі торйӧдӧма 81,7 миллион гӧгӧр шайт.
<> Гижӧдсӧ дасьтіс Александра АРТЕЕВА. Снимокыс ӧтуввезйысь.