Нина Ивановна Канева олӧ Изьва районса Сизяб сиктын. Педагогика институт помалӧм бӧрын нэмсӧ уджалӧ Сизябса чужан школаас англия кыв велӧдысьӧн.
Кывбур гижӧм кындзи изьваса ань радейтӧ быдтыны дзоридзьяс, лыддьысьны, ветлыны мукӧд карӧ. Сылӧн нёль внук да ӧти внучка.
«Коми муын» йӧзӧдлім нин Нина Ивановналысь кывбуръяссӧ. Талун газет лыддьысьяскӧд нимкодьпырысь тӧдмасям сылӧн выль гижӧдъясӧн.
Нина КАНЕВА
Воис тӧв
Гӧн кодь небыд, еджыд лым
Вевттис мулысь эжсӧ.
Ӧшинь ув и ывлавыв
Ӧти лунӧн вежсис.
Гартiс видз, и вӧр, и ю
Тӧлыс эзысь шальӧн,
Медым некод налысь ун
Тулысӧдз оз пальӧд.
Сӧмын норасьны оз зiль
Ӧткодь пыр веж пожӧм.
Овны кӧсйӧмыд век выль.
Виччам шоныд гожӧм.
Кодзув
Пыдӧстӧм енэжын дзирдалӧ, югъялӧ кодзув –
Туйвывса мунысьлы пемыдын восьлалан ёрт.
Аслыс кӧть енэжас, гашкӧ, и гажтӧм, и кӧдзыд,
А мортыслы пемыдын содтӧ и вынйӧр, и борд.
Кодзувсӧ кодiкӧ козьналӧ меддона мортлы.
Ликтыны* пиыслы туй сыӧдз шыӧдчӧ мам.
Коркӧ и сы вылӧ, гашкӧ, и кодiкӧ броткӧ,
А сiйӧ оз водзсась – век югъялӧ, нюмъялӧ, рам.
Весьшӧрӧ енэжас кодзулыс войын оз петав.
Кодлыкӧ сiйӧ югдӧдӧ туй либӧ пальӧдӧ шог.
Кодлыкӧ лача бур вылӧ, шуд вылӧ сетӧ.
Ышӧдны аддзысьӧс татшӧми кодзувлӧн мог.
Йирым тӧлысь
Йирым тӧлысьлысь бурсӧ он виччысь,
Талун зэр ваяс, аски – лым.
Йирым тӧлысьын дзоридз оз мыччысь,
Кӧдзыд сынӧдыс, муыс кын.
Узьны водӧны бобув и ташка**.
Он тай чеччав, узь сӧмын, узь.
Ыркыд сынӧдыс налы вашкӧ:
–Дзебсьӧй пыдӧджык, тӧлыс кузь.
Коркӧ друг тӧвру кымӧръяс пуджлас,
Шондi югнитлас, быттьӧ и нюм
Арлӧн зумыштчӧм чужӧмын чужлас.
Ичӧт здук кежлӧ пальӧдлас ун.
Ӧшым тӧлысь
Ӧшым тӧлысьын луныс дженьыд.
Садьман – пемыд и водан – пемыд.
Пачсӧ асывсянь ломтан да ломтан.
Ӧшым тӧлысьлӧн козиныс помтӧм.
Чизыр тӧлӧн войбыдӧн пӧльтас.
Керка пытшкӧсыд асылӧдз кӧйдас.
Ваяс лым, сiйӧс туй вылӧ тэчас.
Мунны позьтӧм толаяс вӧчас.
Сӧмын челядьлӧн радлуныс петлӧ:
Кодкӧ ислалӧ, кодкӧ лыжиӧн ветлӧ.
Лӧсьыд лым пиын уялӧм-ворсӧм.
Ылӧдз кылӧ чирзӧм да горзӧм.
Восӧ эштӧдӧ ӧшым тӧлысь.
Локтӧ Кӧдзыд пӧль мешӧкӧн вӧрысь,
Лымныв сеталӧ кампет да чача…
Чужӧ быдӧнлӧн бур вылӧ лача.
Вӧльгым тӧлысь
Эзысь пальтоа вӧльгым тӧлысь
Лымъя мойдкывсӧ гижӧ вӧрлысь.
Еджыд номъяслы дзиръя восьтiс,
Кыдз пу чальяслысь синва косьтic.
Небыд эшкынӧн шебралiс мусӧ.
Узьны водтӧдiс вӧрсӧ и юсӧ.
Кӧнкӧ гажтӧма лэбач сьылӧ:
–Шоныд тулысыс ылын? Ылын.
Кывбур гижӧм йылысь
Мый йылысь кывбурсӧ гижны?
Гижӧмаӧсь ставсӧ нин важӧн.
Юксьӧмаӧсь меысь нин водзджык
Ас синмӧн аддзывлӧм гажӧн.
Кыдз пу кор чужӧм йылысь
Важӧн нин юӧртлiс гижысь.
Шондiлысь ловзьӧдан нюмсӧ
Дерт жӧ, нин кодiкӧ гижлiс.
Мувывса югыдсӧ, мичсӧ,
Лэбачлысь дзользьӧм да сьылӧм
Эз ӧмӧй кодiкӧ шулы
Сьӧлӧмтӧ вӧрзьӧдан кылӧн?
–Мый сэсся ныртӧ тэ сюян? –
Ас вылӧ ачым тадз бротка.
–Тэысь на бурджыка, водзджык
Ставсӧ нин шулӧма кодкӧ.
Сӧмын тай бара на гижа,
Гижа, кыдз верма да кужа.
Быдӧнлӧн ас ногыс мӧвпыс
Юрас да вежӧрас чужӧ.
Кывбурыд, быттьӧкӧ кага,
Кык ӧткодь некор оз лолы.
Гижыштан мыйкӧ ас кадӧ,
Кодкӧ и лыддьыштас, – овлӧ.
_________
*Ликтыны – индыны.
**Ташка – геб.
Снимокъясыс Павел Каневлӧн.