Октябрь 24 лунӧ Сыктывкарын коймӧдысь нин котыртлісны батьяслы слёт, кытчӧ челядьыскӧд воліс регионса матӧ став кар-районсьыс 41 пап. Чукӧртчылӧмсӧ дасьтіс да нуӧдіс удж, занятосьт да социальнӧя доръян министерство республикаса батьяс сӧветкӧд ӧтув, и сійӧ лои семьяяслы збыль гаж-праздникӧн.
Слёт вылӧ воӧмаясӧс медводдзаӧн чолӧмаліс Комиын удж, занятосьт да социальнӧя дорйӧм кузя министрӧс вежысь Екатерина Калинина.
–Сьӧлӧмсянь чолӧмала тіянӧс Бать лунӧн. Тайӧ праздникыс – ӧнія кадлы лӧсялана да тӧдчана. Сиа ставныдлы терпенньӧ, вын-эбӧс, дзоньвидзалун, муслун, мед ныв-пиныд пыдди пуктасны да эскасны тіянлы. Ті водзмӧстчысьӧсь, енбиаӧсь да ыджыд сямаӧсь. Кута лача, сӧльнитчанныд республикаын бать ӧтмунӧмӧ да кутанныд петкӧдлыны бур пример регионса став мужичӧйыслы, – шуис Екатерина Калинина.
Комиын батьяс сӧветӧн веськӧдлысь, Госсӧветса депутат Степан Чураков пасйис, мый тайӧ аддзысьлӧмыс ӧтувтіс регионса медся водзмӧстчысь батьясӧс. Та дырйи тӧдчӧдіс ӧтка папъяслы отсӧг вичмӧдны коланлунсӧ.
–Татшӧмъясыслы ӧтка мамъяслы серти отсӧгыс вичмӧ этшаджык. Миян могным – вӧзйыны вынсьӧдны семья тӧдчанлун кыпӧдӧм кузя нырвизьяссӧ федеральнӧй тшупӧдын, – висьталіс Степан Чураков.
Слётӧ пырӧдчысьяслы вӧлі дасьтӧма уна сикас тренинг, челядьлы «Кванториум» технопаркын мастер-класс, эстафета-ордйысьӧм, а сідзжӧ Коми Республикаса типографияӧ экскурсия. Ставыс тайӧ сетіс позянлун чукӧртчӧмаяслы матысяньджык тӧдмасьны ӧта-мӧдыскӧд да юксьыны челядь быдтӧм-воспитайтӧмын опытӧн.
–Миян быдмӧ кык пи: ыджыдджыкыслы 11 арӧс, ичӧтыс куима. Ме серти, семьяын быдӧнлӧн аслас тӧжд-мог: батьлы нажӧвитны, кывкутны ортсы, мамлы – пытшкӧсса политика вӧсна. Челядьнымлӧн тшӧтш асланыс удж: ичӧтыс котралӧ детсадйӧ, ыджыдыс велӧдчӧ школаын, ветлӧ тренировкаяс вылӧ. Дзоляыскӧд радейтам гуляйтны понкӧд, а ыджыдыс ме моз жӧ уялӧ бассейнын да, зіля волыны сылӧн став орйысьӧм вылас, – висьталіс Сыктывкарысь Андрей Быков.
–Ми татшӧм чукӧртчылӧмас медводдзаысь на пырӧдчам, но петкӧдчылім уна форумын нин, – юӧртісны Емдін районса Зӧвсьӧртысь Вячеслав Ветошкин Маша нылыскӧд. – Водзмӧстчысь семьяяс пуктӧны пай республика сӧвмӧдӧмӧ. И ми став семьяӧн водзмӧстчам спортын.
–Асланым да тӧдсаяслӧн семьяяс серти верма шуны: батьяс лоины восьсаӧсьджык. Найӧ челядьыскӧд тшӧкыдджыка волывлӧны быдсикас чукӧртчылӧм вылӧ, пырӧдчӧны спорт да культура гаж-аддзысьлӧмъясӧ. Батьяс ӧні абу воддза моз нин «гож сайынӧсь». Войдӧр кӧ быдтасъясыскӧд векджык вӧліны мамъяс, ӧні пыр тшӧкыдджыка папъясӧс аддзылан. И таысь зэв нимкодь! Сідзкӧ, семья тӧдчанлуныс ёнмӧ. Тайӧ тшӧтш петкӧдлӧ, мый батьяс зільӧны оз сӧмын дорйыны семьясӧ, но и лоны сылы бур примерӧн. Челядьыд радейтӧны батьнысӧ, сы вӧсна мый папыс – семьяын медся тӧдчанаяс лыдын, – юксис видзӧдласнас Вуктылысь нёль челядя бать да самбо кузя тренер Григорий Лукьянченко.
Сыктывкарса Эжва районысь батьяс сӧветӧн юрнуӧдысь Василий Андреев серти, папъяс талун быдтасъясыслы абу сӧмын матысса йӧз да ёртъяс, но и наставникъяс. А ӧтмунӧмыс отсалӧ мужичӧйяслы таын.
Чукӧртчылӧмсӧ сигӧртігӧн батьяслы слёт котыртысьяс кывкӧрталісны, татшӧм гаж-аддзысьлӧмъясыс пӧ кыпӧдӧны семья тӧдчанлунсӧ, а сідзжӧ ёнмӧдӧны бать-мам да челядь костын йитӧдсӧ.
<> Алина Латышева. Снимокъясыс ӧтуввезйысь.