Кольӧм пекничаӧ юркарын бара на юргис «Койташ» республикаса IX фестиваль-конкурс. «Сыктывкар» концертасян залын чукӧртчисны том сьылысьяс да коми сьыланкыв радейтысьяс. Гажсӧ котыртісны Коми Республикаса национальнӧй политика министерство, юркарса администрация, Сыктывкарса администрацияын культураӧн веськӧдланін, «Коми войтыр» регионкостса ӧтмунӧм да Сыктывкарса коми культура шӧрин.
Тавося «Койташӧ» пырӧдчысьяс ордйысисны нёль нимпасын: «Медбур выльмӧдӧм коми йӧз-костса сьыланкыв», «Медбур коми бард сьыланкыв», «Медбур коми кавер», «Медбур коми эстрада сьыланкыв».
Конкурсын петкӧдчысьясӧс донъяліс вит морта жюри: творчествоа асшӧрлуннысӧ – режиссёр-постановщик Михаил Коковкин, сьылӧмсӧ – Коми Республикаса академическӧй филармонияысь солист Николь Соколова, сцена вылын асьнысӧ кутӧмсӧ – вужвойтырлӧн шылада-драмаа театрын ворсысь Ангелина Смирнова, шыладсӧ – звукорежиссёр Тимофей Боровков, текстсӧ – коми гижысь Алёна Ельцова.
Жюрилӧн кывкӧртӧд бӧрын юӧртісны вермысьясӧс. Иван Биричевскийлӧн «Уна нывъяс» лоис «Медбур выльмӧдӧм коми йӧзкостса сьыланкывйӧн». «Медбур эстрада сьыланкывйӧн» шуисны Николай Родионовлысь «Быдӧн йӧктыны дась». «Кадыс помасьлытӧм» сьыланкывйӧн «Медбур каверын» вермысьӧн лоис «FOLK сёстры» дуэт, а «Медбур коми бард сьыланкыв» нимпасын – «Тайӧ ставыс тэныд» сьыланӧн Дмитрий Филиппов.
Торъя козин да диплом вичмис Андрей Тимушевлы, Алексей Тимушевлы, Ляна Ануфриевалы, Александр Мишаринлы да Коми Республикаса искусство колледжысь ансамбльлы. Медбур шылад гижысьӧн шуисны Николай Родионовӧс, а кывъяс медбур лӧсьӧдысьӧн Евгения Удаловаӧс.
Гажыс муніс кыпыда, сьӧлӧм вӧрзьӧдана, ӧд сцена вывсянь юргисны ӧнія коми сьыланкывъяс. Юасим фестиваль котыртысьяслысь, донъялысьяслысь, видзӧдысьяслысь да артистъяслысь, мыйӧн налы коли вежӧрас тавося «Койташ». Юксям на видзӧдласӧн.
Наталья Шахова, гаж котыртысь:
–Ӧкмысӧд «Койташ» коли зэв гажаа да кыпыда. Пырӧдчисны 18-сянь 40 арӧсӧдз енбиа коми сьылысьяс да сьыланкыв гижысьяс. На лыдын «Койташлӧн» уна вося ёртъяс Евгения Удалова да Николай Родионов, а сідзжӧ выль нимъяс восьтім, шуам, Ляна Ануфриева да Татьяна Черткова, Андрей да Алексей Тимушевъяс, «Рандеву» котыр.
Ме чайта, сьыланкывъясыс кӧ видзӧдысьяслы сьӧлӧмас йиджисны, сідзкӧ, ми, гаж котыртысьяс, эг весь мырсьӧй. Аслам юрын век на быттьӧ юргӧ «Олӧм оз тырмы тэнӧ радейтны…», кодӧс сьыліс Ляна. Казьтышта да, йирмӧг босьтӧ – сэтшӧм сьӧлӧм вӧрзьӧдана сьыланкыв артмӧма Ляналӧн да Николай Родионовлӧн.
Юрын тшӧтш и «Тэ юртӧ енэжлань лэпты – кымӧръяс лэбӧны». Сьылісны Наталья Галенко да Артур Гарнов.
Став артистсӧ да сьыланкыв гижысьсӧ аттьӧала и ас нимсянь, и коми культура шӧринын став уджалысь нимсянь.
Зэв бур, мый водзынджык коми томуловлӧн «Ми» котыркӧд артмис дасьтыны выль коми сьыланкывъяса кык альбом. Чайта, и водзӧ колӧ нуӧдны тайӧ уджсӧ.
Алёна Ельцова, гаж донъялысь:
–«Койташ» фестиваль-конкурсса жюриын ме вӧлі медводдзаысь. Нимкодь, мый коми том йӧз оз ӧтдортчыны ас кывйӧн сьылӧмысь: конкурс дырйи юргисны и талунъя сьыланкывъяс, и важ, йӧзкостса сьыланкывъяс выль ногӧн нин.
Ме чайта, вывтiджык уна вӧлi сiдз шусяна каверыс, кор босьтӧны ставныслы тӧдса, тшӧкыда роч, сьыланкыв да комиӧдӧны сiйӧс, сэсся сьылӧны. Вӧлi эськӧ бурджык, гижисны кӧ дзик выль коми сьыланкывъяс. Мӧд кывъя гижӧдтӧ стӧча комиӧдны вель сьӧкыд, ме ачым татшӧмсяма уджсӧ вӧчла литератураын, да тӧда, кытчӧ верман сконъясьны-крукасьны. Вуджӧдӧмыд тшӧкыдджыка выльысь гижӧм артмӧ. А сьыланкывтӧ вуджӧдны нӧшта на сьӧкыдджык: сэнi комиӧдӧм кывъясыс мед эськӧ и шыладыскӧд на лӧсялісны. Казялi: кор ладмӧдчӧны дась юргӧмыскӧд, сэки сьыланкывйыс озджык артмы, сьӧкыд татшӧмсӧ кывзыны.
А сiдз, сиа конкурсӧ пырӧдчысьяслы и водзӧ вылӧ на бур сьыланкывъяс да кыпыд ру.
Евгения Удалова, сьылысь:
–Ме сьылі Ирина Чувьюровалысь «Лым», кывъяссӧ комиӧді ачым. Конкурсысь ӧтдор пет-кӧдчи и «Мунан кӧ тэ» сьыланкывйӧн. Луныс колис зэв гажаа да бур руӧн, тӧдмаси выль йӧзкӧд. А «Медбур коми сьыланкыв гижысь» дипломыс быттьӧ сигӧртіс менсьым став ӧкмыс «койташасьӧмӧс».
Ольга Рогожникова, видзӧдысь:
–Том коми сьылысьяслӧн конкурс юргис зэв гораа, яра, гажаа. Зэв уна выль ним, выль кывбур да шылад гижысьӧс, выль сьылысьӧс восьтіс юркарлы тайӧ вермасьӧмыс. Концертыс артмис зэв уна бана: и гитараӧн ворсісны, и йӧзкостса сьыланкывъяс ливкйӧдлісны, и эстрада, и бард, и йӧктан шылад, и балет весиг вӧлі.
Торйӧн нин сьӧлӧм вылӧ воисны Евгения Удаловалӧн «Лым» да Алексей Тимушевлӧн «Юсьяс» сьыланкывъяс.
Долыд, мый сцена вылын вӧліны землякъяс, Кулӧмдінын чужлӧм либӧ ӧні сэн олысьяс: Дмитрий Филиппов, Татьяна Черткова, Андрей Тимушев, Алексей Тимушев, Альбина Золотарёва, Артур Гарнов да Наталья Галенко.
Казялі, бӧръя воясӧ «Койташ» конкурсыс ёна паськаліс, ёнмис, бурмис. Эм мый видзӧдны, кодӧс кывзыны, мыйӧн нимкодясьны.
Дина Рочева, видзӧдысь:
–Ми нывьёртъяскӧд воим сійӧ кадӧдз, кор оз ков ветлыны удж вылӧ, и эм нин кад ветлыны концерт да спектакль вылӧ.
Тӧлысьнас нёль-ӧ-витысь аддзысьлам, медым бура коллявны рытсӧ. Радпырысь волім и «Койташ» фестиваль вылӧ кывзыны коми сьыланкывъяс. Енбиа том йӧз петкӧдлісны ассьыныс сямлунсӧ эз сӧмын сьылӧмын, но и сьыланкыв лӧсьӧдӧмын, кывъяс да шылад гижӧмын. Концерт помас залын эз коль ни ӧти гажтӧм видзӧдысь!
Фестиваль помасьӧм бӧрын менам сьӧлӧмын коли эз сӧмын радлун, но и шог. Шог сыысь, мый сы мында бур, важ да выль, мича коми сьыланкыв оз кывны Комиын став олысь йӧз.
Важӧн вӧлі телевизор пыр петкӧдлӧны коми спектакльяс, миян радейтана коми сьылысьясӧс вӧлі тӧдӧны и челядь, и верстьӧ.
А ӧні? Быттьӧкӧ коми кывсӧ кӧсйӧны ӧдйӧджык вунӧдны. Ме ёна радейта чужан кывйӧс, со и ветла быд коми спектакль, коми концерт вылӧ, сы вӧсна мый таысь кындзи коми кывсӧ некытысь ог кыв. Интернетын коркӧ-мыйкӧ петкӧдчылас мича сьылӧмыс. Бур кӧть сідз!
А «Койташ» фестиваль зэв воис сьӧлӧм вылӧ. Ыджыд аттьӧ и том петкӧдчысьяслы, и гаж котыртысьяслы.
Ангелина Смирнова, гаж донъялысь:
–Нимкодь, мый выль нимъяс. Нимкодь, мый вына гӧлӧсъяс. Нимкодь, мый конкурсыс сӧвмӧ водзӧ. Бара жӧ нимкодь, мый повтӧг петӧны, а мукӧдыс асланыс харизманас ставнас залсӧ шымыртӧны. Менам мог вӧлi буретш донъявны актёрскӧй мастерство. Медводдзаысь вӧлi кыдзи жюри.
Окота, мед «Койташлӧн» вӧлi кып, гашкӧ, дасӧд гажӧдз гижасны. Енбиаӧсь, томӧсь. Рытыс, ме серти, коли зэв шоныда да гажаа.
Мария Попова, сьылысь:
–«Койташ» вылын дуэтӧн петкӧдчим медводдзаысь на. Кык во сайын ме сьылі тайӧ фестиваль вылас «Зарни туис» котырын. Таво пырӧдчыны конкурсӧ чуйдіс Виктория Агаркова, кодi тшӧтш уджалӧ Полинакӧд. Миян дуэтлӧн эм «Время» авторскӧй сьыланкыв, сiйӧс комиӧдіс Андрей Терентьев. Тадз артмис «Кадыс помасьлытӧм» сьыланкыв, кодӧс петкӧдлім конкурсын. Дуэтӧн Полинакӧд сьылам кык во нин, зэв ёна сьӧлӧм вылӧ воӧны фольклор сьыланкывъяс. Сiдзжӧ гижам ассьыным сьыланкывъяс йӧзкостса ногӧн.
<> Алёна Нестерова. Снимокъясыс Дмитрий Напалковлӧн.