Август тӧлысся номер восьтӧ Василий Лодыгинлӧн «Олана да вылана таладорас олӧм…» кывбур чукӧр.
* * *
Зарни шондіӧй, шоныд тупыльӧй,
Пет нин, пет нин да вӧтлы жугыльӧс.
Лӧзов енэжӧй, паськыд отаӧй,
Бырӧд менсьым вай нярган модаӧс.
Кӧджа-вомына юӧй-визулӧй,
Сюйышт лябсьӧмӧс аслад из улӧ.
Джуджыд пармаӧй, гажӧн видзысьӧй,
Шогӧс пальӧд вай, шуд на виччыся,
Кыпыд лолӧн на кӧсъя олыштны,
Гижӧм-сьылӧмнам йӧзлы колыштны.
Кыдзи бергӧдас аслас шӧр геройяслысь олӧм-вылӧмнысӧ Аркадий Мишин, тӧдмаланныд романлӧн бӧръя юкӧнъясысь. Тайӧ тӧлысьӧ помасьӧ «Из вылӧ из» гижӧдлӧн сьӧлӧмтӧ вӧрзьӧдана историяыс.
Геннадий Александрович Фёдоровлы 110 во тыригкежлӧ Валентина Лимерова вӧзйӧ школаса велӧдысьяслы отсӧг вылӧ статья, кӧні видлавсьӧ, кыдзи урокъяс вылын бурджыка тӧдмӧдны велӧдчысьясӧс Геннадий Фёдоровлӧн «Эзысь сюра кӧр» повесьтӧн.
«Паметь юным тай паськыд да кузь» очеркын Надежда Павлова висьталӧ-тӧдмӧдӧ Семуковса ӧти семьялӧн историяӧн. Автор пырӧдчӧ важъя кадӧ, заводитӧ висьтасьӧмсӧ бать-мам да пӧль-пӧчьяссяньыс, кыдзи налӧн олӧмас топыда гартчӧмаӧсь омӧльыс да бурыс. Коръяскӧ и лёкыс быттьӧ ёна унджык овлӧ, но та вылӧ видзӧдтӧг олӧмыс муніс и мунӧ водзӧ…
Лоӧ мукӧдтор и та кындзи.
Вӧзъям лыддьыны август тӧлысся номерысь:
Василий ЛОДЫГИН. Олана да вылана таладорас олӧм… Кывбуръяс
Аркадий МИШИН. Из вылӧ из. Роман
Александр УЛЯШЕВ. Тан кокни менам ловлы. Кывбуръяс
Г.А. ФЁДОРОВЛЫ 110 ВО ТЫРИГКЕЖЛӦ
Валентина ЛИМЕРОВА. Г.А. Фёдоровлӧн «Эзысь сюра кӧр» повесьт: школаын велӧдан туйвизь
ВОЯС ДА ЙӦЗ
Надежда ПАВЛОВА. Паметь юным тай паськыд да кузь
Антонина ГОРДЕЕВА. Дженьыдик висьтъяс