Кыдз юӧртӧ Комиын велӧдан да наука министерство, сентябрь шӧрын нин вируса ёсь респираторнӧй инфекция (ОРВИ) понда Кӧрткерӧс, Кулӧмдін да Луздор районъясын пӧдлавлісны нёль школа. Тайӧ жӧ пӧрӧссьыс кар-районса 35 детсадйын да мукӧд велӧдчанінын карантин йӧзӧдлісны торъя группаясын либӧ дзоньнас учреждениеас.
Республикаса юралысьлӧн Общественнӧй приёмнӧйын неважӧн сёрниыс вӧлі буретш арся пӧрӧсъяс йылысь. Кыдзи видзчысьны насмукаысь, ковидысь да гриппысь?
Комиын Роспотребнадзор управлениеысь эпидемиология юкӧнӧн веськӧдлысь Марина Петухова:
–Мӧйму республикаын быд сё сюрс олысьысь прӧстудасӧ кӧвъяліс 46.795 морт. Россияса Федерация серти 2,2 пӧв унджык. Тайӧ абу повзьӧдана лыдпас, ӧд олам Войвылын.
ОРВИ-ӧн нёрпалысьысь 54,7 прӧчентыс – 14 арӧсысь ичӧтджык челядь, 45,3-ыс – верстьӧ. Эпидемия тшупӧдӧдз эг на воӧй 14,1%. Позьӧ шуны, висьысьыс абу на уна, бӧръя вежонӧ шы-ӧдчыліс 2.933 морт. Мӧйму та каднас нёрпалысьыс вӧлі тӧдчымӧн унджык.
Гриппысь да ОРВИ-ысь ӧтдор прӧстуда шымыртӧ и выль коронавируса инфекция да сідз шусяна внебольничнӧй пневмония.
Бӧръя вежонӧ ковид казялӧмаӧсь 99 мортлысь, вежонӧн водзджык – 72-лысь. Нёрпалысьыс содӧма 37,5%. Но тайӧ коронавирусыс ӧні ОРВИ сяма, висьӧдӧ кокньыда. Сьӧкыда нёрпалысьыс лыда.
Пневмония кӧвъялӧма 90 морт, воддза вежонас вӧлӧма 62, содӧма 45,2%. Мӧйму тайӧ пӧрӧснас медсясӧ висисны велӧдчысьяс.
Талун нёрпалысьяслысь казялӧмаӧсь аденовирус, метапневмовирус, риновирус да SARS-CoV-2 вирус.
Гриппысь да мукӧд пӧрӧсысь медся бура дорйӧ вакцина.
Главнӧй государственнӧй санитарнӧй врачлӧн индӧд серти урчитӧма уколавны республикаын 60 прӧчент олысьсӧ да таысь ӧтдор сідз шусяна риск котырысь 75 прӧчентсӧ. На лыдӧ пырӧны квайт тӧлысся кагасянь став челядьыс, школаын, колледж-лицейын, вузын велӧдчысьяс да велӧдысьяс, медицинаын, йӧзӧс социальнӧй да мукӧд услугаӧн могмӧдан, коммунальнӧй юкӧнын, транспортын зільысьяс, вахтаӧн уджалысьяс, муниципалитетса служащӧйяс, нӧбасьысь нывбабаяс, военнӧй служба вылӧ мунысь том йӧз, 60 арӧсысь олӧмаджыкъяс да хроническӧя висьысьяс. Индӧдас гарыштӧма и мӧс-порсь да гортса пӧтка вӧдитысьясӧс, зоопаркын уджалысьясӧс, ас овмӧс кутысьясӧс.
Мӧйму республикаын прививкасӧ вӧчис 58,18 прӧчент олысьыс. Та мындаыс некор на эз вӧвлы. Сідз, воддза воын уколасис 48 прӧчент. Риск котырысь прививкасӧ вӧчисны медсясӧ медицинаын, детсад-школаын зільысьяс да армияӧ мунысьяс.
Россияын талун бергалӧны нин A(H1N1), А(H3N2) да D-Viktoria штамма гриппъяс. Найӧ регыд воасны миянӧ. Таво эпидемиясӧ виччысям водзджык, октябрын нин. Миян эм на тӧлысь-мӧд, медым удитны уколасьны да ёнмӧдны вир-яй иммунитет.
Оз ков чайтны, мый уколасьӧм бӧрын он висьмы. Вирус-инфекциятӧ быдлаысь верман кӧвъявны. Но вакцинаыс кокньӧдӧ висьӧмсӧ.
Вакцинаыс поликлиникаясын тырмымӧн. Талун кежлӧ Комиын олысьясысь уколасьӧма 2,92 прӧчентыс. На вылӧ видзӧмаӧсь 16,6 прӧчент вакцинасӧ.
Кольӧм во ёна паськавліс внебольничнӧй пневмония. Йӧзыс висисны зэв сьӧкыда. Эпидемияыс заводитчис ноябрын, сэсся ыпнитліс мартын. Кӧкъямыс муниципалитетын пӧдлавлісны школа-детсад. Пневмонияысь мыжаӧсь пневмококк, гемофильнӧй да микоплазма бактерияяс. Кык воддза-сьыс кӧ позьӧ уколасьны, бӧръясьыс вакцинаыс абу. Сылы паныд позьӧ водзсасьны сӧмын лючки оласногӧн, ёнмӧдны дзоньвидзалунтӧ физкультураӧн да спортӧн, лючки сёйны да узьны. Учреждение-организацияын да гортын колӧ видзӧдны, медым жыръясын вӧлі лючки шоныд, некысянь эз пӧльт, кадысь кадӧ восьтывны ӧшинь да тӧлӧдны вежӧссӧ, вӧдитчыны дезинфекция сорасӧн да маскаӧн, тшӧкыдджыка гӧгӧр чышкавны ва ветьӧкӧн, мыськыны ки.
СПИД-лы да мукӧд кӧвъясян висьӧмлы паныд водзсасян да профилактика нуӧдан республикаса шӧринысь главнӧй врачӧс вежысь Нина Овчинникова:
–Регионын таво уколасьны босьтчим водзджык. Вакцинасӧ вайисны август 7 лунӧ нин, да пыр жӧ юким кар-районса поликлиника-больничаӧ. И тайӧ зэв бур, колӧ удитны грипп паськавтӧдз.
Поликлиникаысь ӧтдор прививка позьӧ вӧчны вузасян шӧрин, сиктса ФАП-яс дорын торъя фургонын, тшӧтш и шойччан лунъясӧ. Тайӧс позьӧ вӧчны и уджаланінын да весиг гортын. Тырмымӧн шыӧдчыны поликлиникаӧ, и тіян дорӧ локтасны врач, медсестра либӧ фельдшер. Уколалӧм водзын донъяласны дзоньвидзалунтӧ да, ставыс кӧ лючки, вӧчасны прививка. Сэсся час джын на видзӧдасны дзоньвидзалун бӧрсяыд.
Республикаӧ вайисны нёль сикас грипплы паныд Ультрикс Квадри, а сідзжӧ Совигрипп да Флю-М вакцинаяс. Воддзаыс воӧма квайт тӧлысся кагаӧс да 17 арӧсӧдз ныв-зонмӧс, 60 арӧсысь олӧмаджыкъясӧс уколалӧм могысь. Мукӧд кыкыс куим сикас грипплы паныд. Ставыс тайӧ зэв бур вакцина. Совигрипп да Флю-М вакцинаын эм A(H1N1), А(H3N2) да D-Viktoria штамма грипплӧн антигенъяс. Ультрикс Квадриын нӧшта эм В грипп штамма Ямагата антиген. Ультрикс Квадриыс торъялӧ и сыӧн, мый сэні абу некутшӧм консервант.
Уколасьӧмыс отсалӧ водзсасьны быдсикас эпидемиялы паныд. Специалистъяс таво ОРВИ-ысь да гриппысь ӧтдор виччысьӧны и ковид, пневмококка да гемофильнӧй инфекция.
Челядьлы да риск котырысь верстьӧлы гриппысь да коронавирусысь, а сідзжӧ гриппысь да пневмококка-гемофильнӧй пневмонияысь прививкасӧ позьӧ вӧчны ӧтпырйӧ: сӧмын ӧтисӧ уколаласны, шуам, веськыд сояд, а мӧдсӧ – шуйгаад.
Комиын таво урчитӧма гриппысь уколавны 432.360 мортӧс, на лыдын 102.200-ыс – челядь да 16 сюрсыс – 60 арӧсысь олӧмаджыкъяс.
Сыктывкарын челядьлы коймӧд номера поликлиникаысь юкӧнӧн веськӧдлысь Владимир Лебедев:
–Выль велӧдчан во заводитчӧмӧн тшӧтш содіс поликлиникаӧ шыӧдчысьыс. Тайӧ и гӧгӧрвоана, гожся каникул бӧрын челядь локтісны школаӧ. Бур, гриппыс талунӧдз ёнасӧ эз на паськав.
Арсяньыс нин нуӧдам профилактика удж, поликлиника-ФАП-ын бать-мамӧс гӧгӧрвоӧдам, мый став сикас пӧрӧссьыс медся бура дорйӧ вакцина. Вӧчны сійӧс колӧ арнас, кор висьысьыс абу на уна. Сэсся и вир-яйыс тайӧ каднас тырвыйӧ дасьтысяс быдсикас инфекция-вирус паськалігкежлӧ.
Инфекциялы паныд водзсасьӧм могысь вӧзъям уколавны челядьӧс квайт тӧлыссянь дас кӧкъямыс арӧсӧдз.
Гӧгӧрвоана, бать-мамлысь юасьтӧг кагалы прививкасӧ некод оз вӧч. Дзолюклӧн, ныв-зонлӧн дзоньвидзалун вӧсна кывкутӧны медводз найӧ.
Быд во колӧ уколасьны сы понда, мый вирус штаммыс воысь-во вежласьӧ. Аденовирус, риновирус, ротавирус, коронавирус да нӧшта кыксё сайӧ сикас вирус бергалӧ миян гӧгӧр.
Уколасьӧм бӧрас вир-яяд 9-12 лун мысти артмӧм антителӧяс во гӧгӧр сэсся доръясны тіянӧс быдсикас вируссьыс. Да, лун-мӧд мысти овлӧ неыджыд температура, неуна висьыштӧ юр да уколсӧ вӧчӧминыс.
Оз ков вунӧдны и дзоньвидза оласног йылысь. Сёйны унджык град выв пуктас, фрукты, бур яй да чери, йӧла вӧлӧга, песны асьтӧ физкультураӧн да спортӧн. Иммунитеттӧ арнас позьӧ ёнмӧдны и вотӧсӧн. Турипув, пув, сэтӧр-ӧмидз – кутшӧм сӧмын витаминӧн миянӧс оз козьнав вӧр-ваыс!
Бать-мамлы колӧ видзӧдны, медым кагукныс лючки узис этша вылӧ кӧкъямыс час, та дырйи водіс да чеччис ӧти и сійӧ жӧ кадӧ.
Кагалы оз позь лун и вой ывлаӧ петавлытӧг зунясьӧмӧн дзоргыны айфон-телефонӧ. Ывлаысь пырӧм бӧрын ныртӧ колӧ пожъявны ваӧн, кызь секунда мыськыны китӧ майтӧгӧн либӧ кучик небзьӧдан гельӧн, ныр-вомтӧ тупкыны салфеткаӧн, ныр чышкӧдӧн либӧ несйыны ки кусыняд. Быд лун антисептикӧн чышкавны гаджет-телефонтӧ. Нёрпалігад кӧ колӧ кытчӧкӧ ветлыны, маскаасьӧй.
<> Николай РАЗМЫСЛОВ. Снимокъясыс авторлӧн да ӧтуввезйысь.