(Заводитчӧмыс газетлӧн 36-ӧд номерын.)
Карелъяс асланыс му йывсьыс висьталігӧн шмонитӧны: «Воды – хоть упейся, камней – хоть убейся». Збыльысь, Карелия – миллиард восайся му кодь. Гирвас палеовулканын кынмӧм лава кузяыс позьӧ ветлӧдлыштны, малавны-видлавны кинад.
Ми мунам, а найӧ кольӧны…
Нёльысь исковтлӧма татчӧ гӧра выв йи-ледник, бӧръяыс – 12 сюрс во сайын. Тадзи и артмӧма став мылькйыс, ваыс да лыдтӧм-тшӧттӧм гырысь изйыс. 60 сюрс ты да 27 сюрс ю…
Ми волім кӧч сёртасӧ, кӧні ловъя кузь пеляыс абу. Челядьӧс таысь жугыль босьтӧ, верстьӧ радлӧны. Аслыспӧлӧс арт-объектсӧ республикалы козьналӧма ас вылас уджалысь. 2 миллиард вося изъя бужӧдӧ серпасалӧма вӧрса пемӧсъяссӧ. Мукӧдыс артмӧмаӧсь зэв интереснӧя. Том морт шуӧма коравны мусуксӧ – тадзи чужӧмаӧсь окасьысь кӧчьяс. Гӧтырыс босьтӧма вӧвлӧм верӧсыслысь водзӧс – артмӧма сюра кӧч. Окота кӧ, позьӧ и аслыд серпасавны кузь пелясӧ. Дерт, дон мынтӧмӧн. 1.000 местаысь кушиныс лыда нин кольӧма. Тэрмасьӧй! Предпринимательлысь юалӧмаӧсь, мыйла пӧ кӧчьяс? Воча кылӧмаӧсь: а мыйла пӧ абу?..
Марциальные воды – тайӧ ключьяс да санаторий. Сэні бурдӧдӧны шунгит-изйӧн, няйтӧн да, дерт, ваӧн. Лӧсьӧдӧмаӧсь сійӧс, медым Пётр I император вермис государственнӧй тӧжд-могысь эновтчывтӧг ёнмӧдыштны дзоньвидзалунсӧ. Ваыс тані уна сикас, бурдӧдӧ сьӧлӧм-сӧн, сюв-пытшкӧс висьӧмъясысь, содтӧ вирын железо да с.в. Ключлань мунігӧн миянлы шуисны, быть пӧ видлӧй васӧ: чӧскыдтӧм кӧ – сідзкӧ, дзоньвидзаӧсь, а чӧскыд кӧ, вир-яяд мыйкӧ оз тырмы. Ме тай чӧскыда юи-а. Э-э-эк!..
Сампо гӧраын ставыс казьтылӧ карел-финн эпос. Весиг пыранінас трансформатор будкаас серпасалӧма Випунен, Вяйнямейненлы паныд водзсасьысь. Шӧйтыштны ордымъясӧдыс, вочаавны «Калевалаысь» геройясӧс, ворсыштны кантелеӧн, лэччывны Похьялаӧ. Пӧттӧдз нимкодясьны шензьӧдана скалаясӧн, вӧрӧн да тыӧн. Да, дерт жӧ, Сампо гӧра йылын мӧвпыштны-казьтыштны медся гуся кӧсйӧмтӧ.
Кивач заповедникас ставсӧ лӧсьӧдӧма сідзи, быттьӧ вӧр-ваыс олӧ ас кежас, быттьӧ мортыс абу. Татчӧс быдмӧг-вотӧссӧ, пемӧссӧ, гут-гагсӧ, черисӧ некод оз вот, оз виав-кый, оз керав. А со мича борган-водопадыслы озджык мойви – став туристыс окотитӧны снимайтчыны гора-шума коськъяс да вӧрзьывлытӧм крежъяс дорын…
Татчӧ волігӧн пыр тшӧкыдджыка мӧвпыштчылан вӧр-ва вын-этш йывсьыс. Вежӧртан, мый муюгыдас медшӧрыс, тӧдчанаыс, вынйӧраыс – абу йӧз, а вӧр-ва. И ноксян олӧмным кольӧ налӧн видзӧдлас улын. Борганыс, изъя крежйыс, ключыс, тыыс чӧла кыйӧдӧны миян бӧрся, бурӧдӧны сьӧлӧм, лӧньӧдӧны лов.
Ми мунам, а найӧ кольӧны…
Гын сапӧга Ленин, донтӧм такси да тшак кӧра лымвый
Мыйӧн нӧшта колис вежӧрӧ Петрозаводск? Автобусӧн кар кузя мунӧмысь ковмас вештыны 50 шайт, и ӧтнадлы ветлігӧн тайӧ кивыв, а миян моз быдса араваӧн кӧ, бурджык такси корны – босьтасны 150 гӧгӧр шайт.
Войдӧр татчӧс олысьяс шулӧмаӧсь, карел кӧ пӧ разьӧм купайкаа, сідзкӧ, гожӧм воис. Та вӧсна найӧ тӧждысьӧмаӧсь Ильич (мед кӧть сійӧ памятник) вӧсна, и ӧні сійӧ валегиа да киас шоныд шапкаа.
Петрозаводскын олігӧн ньӧтчыд эг аддзылӧй велосипедӧн ветлысьясӧс, кӧть эськӧ налы лӧсьӧдӧма уна бур туй. Да и пода-машинаалы шыльыдӧсь жӧ.
Тані зэв бура тӧдчӧ, мый карыс национальнӧй – керка-балконсӧ мичмӧдӧма вужвойтыр серӧн, улича нимъяссӧ гижӧма карел кывйӧн, эмӧсь сувенирӧн да этнопаськӧмӧн вузасянінъяс. Торйӧн кӧ, нимкодьӧдісны Карелияса мороженӧйыс (эм весиг дона гоб кӧра лымвый) да лавка джаджъясын войвыв вотӧса соусъясыс. Но сэк жӧ шогӧ уськӧдіс, карел да вепс сёрнисӧ эг кывлӧй да…
Колӧ шуны, вужвойтыр сёянӧн чӧсмӧдланіныс карас тырмымӧн. Но миян «любовнӧй любовӧн» лои «Дежавю» кафе. Вердӧны столӧвӧй донӧн, а сёяныс ресторанын кодь. Воланныд кӧ Петрозаводскӧ, быть пыралӧй. Видлӧй ставсӧ – ставыс чӧскыд. И ӧчередсьыс эн полӧй – пызанъясыс ӧдйӧ прӧстмӧны.
Бур туйяснас, парк-садъяснас, пос-памятникъяснас, ю-изэрдъяснас карыс Питеркӧд ӧткодь (подувсӧ ӧд ӧти император ӧти воӧ жӧ пуктӧма). Но ичӧт карад уналаӧ позьӧ подӧн воӧдчыны. И йӧзыс восьсаджыкӧсь, сибыдӧсь. И пу стрӧйбаыс уна, эмӧсь зэв мичаяс.
Карелияса юркарын ошйысянторйыс – Онега ты да вадор-набережнӧйыс. Татшӧм «мореыдкӧд» орччӧн быд кар чайтсьӧ курортӧн, петрозаводсксаяслы та серти ёна мойвиӧма. Рытнас удж бӧрад позьӧ волыны пукыштны нэмӧвӧйся ты дорас, шойччыштны, юксьыны сыкӧд гусяторйӧн. Ставнысӧ сійӧ тӧдӧ, личӧдӧ ловсӧ.
Вадорын рытъяснас ворсӧны музыкантъяс, диджейяс, томулов лыддьӧны кывбуръяс… Ар дас квайта нывка миян дырйи гораа лыддис «В России расстаются навсегда», и сьӧлӧм вылын лои долыд – поэзияыс ловъя, йӧзыс лыддьысьӧны, кылӧны, ас пырыс нуӧдӧны…
Набережнӧйын арт-объектъяссӧ – кар-вокъяссянь козинъяссӧ – позьӧ помтӧг видзӧдавны да и асланым юркарын татшӧмсӧ тэчны.
Быдсикас из, утка, лабич, казьтылан пас, восьса енэж улын уна сё тренажёр (кӧть лунтыр асьтӧ пес), челядьлы качайяс.
Тайӧс ставсӧ кӧ эськӧ миянын тшӧтш лӧсьӧдны, сідз ӧд?
Петрозаводскын ме казялі: йӧзыс радейтӧны ассьыныс карсӧ, тӧждысьӧны сы понда, кӧсйӧны вӧчны мичаджыкӧн. А ми?..
Елена Хозяинова, Карелия – Коми.
<> Комиӧдіс Елена Плетцер. Снимокъясыс авторлӧн.