Во помӧдзыс Луздор районын шуӧма кыпӧдны куим выль медицина учреждение.
Вуктым посёлокын воссяс бурдӧдчан амбулатория. Сэні лунся стационарын, процедура вӧчан да физиотерапия кабинетъясын кутасны уджавны врач, фельдшер да кык медсестра.
Выль ФАП-яс воссясны Слудкаын, Сернӧсын да Лопъювомын.
Регионса юралысьлысь удж вӧчысь Ростислав Гольдштейнлӧн индӧд серти республикаса правительствоӧн веськӧдлысьӧс вежысь Екатерина Грибкова неважӧн ветліс видзӧдлыны, кыдзи мунӧ сэні такӧд йитӧдын уджыс.
Сернӧс сиктса ФАП-ӧн веськӧдлысь Марина Костылева висьталіс, бур пӧ, мый выль медучреждение кыпӧдны местасӧ бӧрйӧмаӧсь сикт шӧрас.
Сернӧс нюжалӧма куим километр, и сэн ӧтарладорас и мӧдарладорас олысьяслы кивыв лоӧ волывлыны бурдӧдчанінас.
Марина Костылева водзӧ висьталіс, мый налӧн сиктын ФАП-сӧ, кӧні ӧні уджалӧны, кыпӧдлӧмаӧсь 1992 воын.
Велалӧмаӧсь нин да, оз элясьны. Но, дерт, ӧнія выль бурдӧдчаніныд пӧ колӧ кыдз сикт-грездын олысьяслы, сідз и сэні уджалысь медикъяслы.
Луздор районса шӧр больничаысь главврач Станислав Жуйков казьтыштіс, кутшӧм услугаясӧн кутасны могмӧдны сиктса йӧзӧс выль медучреждениеясас.
Торйӧн кӧ, ФАП-ясын нёрпалысьясӧс примитӧмысь ӧтдор кутасны уна сикас процедура вӧчны, анализ босьтны, лоас и акушер-гинекологлӧн смотрӧвӧй кабинет.
Бурдӧдчан амбулаторияын врачысь ӧтдор мӧдас уджавны фельдшер. Сиктсалы позяс волывлыны физиотерапия кабинетӧ, а сідзжӧ шыӧдчывны отсӧгла стоматолог дорӧ.
Казьтыштам, нёльнан выль медучреждениесӧ шуӧма кыпӧдны «Продолжительная и активная жизнь» нацпроект весьтӧ. Такӧд йитӧдын став уджсӧ помавны урчитӧма тавося ноябрӧдз.
–Уджыс уна, но пӧдрадчик эскӧдӧ, мый ставсӧ вӧчасны ас кадӧ да помаласны ноябрӧдз.
Дерт, падмӧгыс вермас лоны, та понда ми нёльнан стрӧйбасӧ босьтім син улӧ, кутам йитӧд кыдз пӧдрадчиккӧд, сідз и медработникъяскӧд, – тӧдчӧдіс республикаса правительствоӧн веськӧдлысьӧс вежысь Екатерина Грибкова.
<> Гижӧдсӧ дасьтіс Александра АРТЕЕВА. Снимокъясыс ӧтуввезйысь.