Мый сэтшӧмыс гульбищеыс? А овлӧ-ӧ «сакар юрлы» гильотина? И кысянь босьтчӧма капсула-гостиница? А нӧшта Кеша кань, пӧшти ӧдзӧслань вома пач, прӧшвиысь вӧчӧм чача-керка кодь 600 тонна сьӧкта вичко. Мый тайӧс ставсӧ ӧтувтӧ?
Кижи (ударениеыс воддза слогас), карел ногӧн – Киджи (нитш). Кижиыс уна сё во кежлӧ дзик ӧти, а сы йылысь висьталанторйыс тырыс…
Ме тіянлы со мый мойда-висьтала.
Кӧмтӧм кокӧн, вомнас ӧдзӧслань, Кеша кань…
Тӧрыт на Петрозаводскын кӧшысь моз кисьтіс-зэрис, и Онега ты вылын гыыс керка судта вӧлі, да Кижилань став рейссӧ киритісны, а талун шондіа, зэр тусь оз войтышт. Позьӧ ді кузяыс (витсёысь ӧти, но медся нималанаыс) кӧмтӧг ветлыны, мый ме и вӧчи. (Кӧть эськӧ экскурсовод Антон водзвыв ӧлӧдіс таысь, гадюкаыс пӧ уна). Вӧтаси, быттьӧ луд кузя кӧмтӧг восьлала зэв мича важ вичколань. Тадзи и артмис, кӧмӧй кокӧс зыртіс да…
Крестьянин керка, мича-вӧччӧм, пӧла-симметриятӧм. Озыр крестьянин Яковлевлӧн… Кык судтаа керкаас матӧ кызь морта семья-котырнас овлӧма воддза нэм помын. Судзӧдӧма газет, овмӧсас вӧдитчӧма сепараторӧн да сакар жуглан-посньӧдлан торъя пуртӧн.
А карел керкаын, вӧлӧм, пачыс пыранін дорас матын вомнас ӧдзӧсланьысмоз. Комиад татшӧмыс абу, он аддзыв и посводзас сод улысь крӧватьтӧ. Сэні ыркыдджык да, гожӧмнас войколавлӧмаӧсь-узьлӧмаӧсь. Аддзигмоз на ас кежысь мӧвпышті, мися, абу-ӧ сы серти капсула-гостиницатӧ думыштӧмаӧсь-лӧсьӧдӧмаӧсь?..
Крестьянин керкаын балкон йывсьыс тшӧтш аслыспӧлӧстор тӧдмалі. Вӧлӧмкӧ, шусьӧ гульбище. И тайӧ абу чукӧрӧн гуляйтан-бызганін: балкон кузяыс ветлӧдлӧмаӧсь тӧв кежлас ӧшинь ставнясӧ тупкавны. Со кыдзи! А мичлуны-ы-ыс! И татшӧмсӧ аддзылан сӧмын Заонежьеын…
Крестьяна паськӧма кык мужичӧй пукалӧны нэмӧн-джынйӧна керкаяс дорын. Кывсӧ песӧм-шмонитӧмӧн висьтавлӧны плӧтничайтан, сюмӧдысь вӧчасян удж йылысь. Сёрниӧ воим да, вӧлӧмкӧ, Комиысь мастеръястӧ тӧдӧны, чолӧм налы ыстісны. Ӧтиыс, Дмитрий Москин, висьталіс музейса Кеша кань йылысь. Вӧлӧмкӧ, кысукыс воӧма ді вылас кутшӧмкӧ катерӧн да и кольччӧма овны ӧти пӧчӧ ордын. Ни ӧти экскурсия сытӧг абу нуӧдлӧмаӧсь, Кешакӧд Кижиыс збыльысь ловзьӧма. Со татшӧм небыдик, шоныдик пу кань и ньӧби зарни киа мортлысь (а пу чачаыс сылӧн пызан вылас лыдтӧм-тшӧттӧм, ачыс ичӧтик черӧн да пилаӧн мастеритӧ). Регыд музейса Кеша кань йылысь висьтъяса небӧг на пӧ петас дай…
А меным тайӧ казьтыштіс Сыктывдінса Выльгортысь нималана Пас кысӧӧс. Кеша йывсьыс быть висьтала музейӧн веськӧдлысьыс Владимир Николаевич Муравьёвлы…
Керка пытшкас ӧдзӧсъясыс ляпкыдикӧсь — шоныдсӧ кутны да тшӧтш и пыригас мед быдӧн копыртчыліс керкаыслы. Тані ставыс ас местаын коланаинын. Тані кӧзяиныс мастер и плӧтник, вӧчысь-лӧсьӧдысь и ен, демиург — быд удж тӧдӧ да кужӧ. И керкаыс быдса космос кодь, ставсӧ лӧсьӧдӧма тӧдӧмӧн. Весиг балкон мичмӧданторйыс — аслыспӧлӧс видзӧг, гӧгӧртас серпас. Шонді чеччӧм да пуксьӧм, ен ув му мич да помтӧмлун серпас…
Крестьянин керкаса лӧсалӧм пӧвъясас инмӧдчылӧмӧн дзик пыр вежӧрӧ воӧ: олӧмыс — уджын. Сьӧлӧмсяньыд зільны, вӧчны-лӧсьӧдны коланасӧ, а водзӧсӧ… асьныд сэсся тӧданныд…
А меным шоныд нӧшта и сыысь, мый войвылын аслам эм жӧ татшӧм озырлуныс — прапӧльӧн на кыпӧдлӧм керка…
Кыпыд вичко, ӧзтытӧм сись, куим пельӧса ӧбраз…
–Кижиыд дача кодь, – шмонитіс экскурсовод Антон. – Тані абу ни школа, ни садик, а матысса лавкаыс ва кузя кызь вит верст сайын.
Сы пыдди эм кыпыд, кокньыдик, дивӧ кодь пу вичко – Преображенньӧ Господне нима! Кызь кык юрсӧ вевттьӧма пипу черепицаӧн. Быттьӧ оз ёна сӧстӧм пуӧн лыддьыссьы, а со тай зарни киа мастеръясыдлӧн вичколы кутшӧм мич артмӧма. Нӧшта на и шонді югӧр улас быд здукӧ да кадӧ рӧмыс вежласьӧ. Дивӧ!
Вичкоыс нэмсӧ тані вӧлӧма. Орччӧн – гымньӧв-чард вештӧд-кутӧдъяс, а вичко пытшкас сисьсӧ пукталӧны, но оз ӧзтавны.
Асьныд гӧгӧрвоанныд, мый та помысь вермас лоны. Некымын во сайын ӧти морт вӧсна бырӧма искусствоса ӧти памятник. Ӧти здукӧн тшынйыв кайӧма мичасьыс-мича пу вичко, и бӧр сійӧ оз нин кыпав. Воддза кодь мастеръясыс абуӧсь…
А тайӧ вичкосӧ реставрируйтӧмаӧсь-выльмӧдӧмаӧсь 41 во чӧж. Война бӧрас 40 метр судта стрӧйбаыс нёровтчӧма 1,5 метр.
Гырысь изйысь подулыс жугласьӧма… 1980-ӧд воясӧ вичкосӧ разьӧмаӧсь, сэсся лӧсьӧдӧмаӧсь кӧрт ыв-каркассӧ, а разьлӧм-выльмӧдӧм керъяссӧ тэчнысӧ дыр абу сяммӧмаӧсь. Вӧлӧмкӧ, лыда морт тайӧс кужӧ вӧчны…
Вичкосьыс казявлім куим пельӧса ӧбразъяс. Да кывзім шензьӧдана мича сьылӧм. Певчӧйясыс миянлы, туристъяслы, торйӧн сьылісны. Висьтавнысӧ он куж, кутшӧма тайӧ мӧрччӧ сьӧлӧмад!
…Коркӧ зэв интереснӧй небӧгысь лыдди, кыдзи батьыс олӧмнас пудъясьӧмӧн нулӧма ичӧт пиянсӧ петкӧдлыны Буддалысь ыджыдсьыс-ыджыд статуяяс. Вӧлӧма тайӧ Афганистанын 1990-ӧд вояс помын. А помнитанныд, мый сэсся лои тайӧ статуяяснас? 2001 воын власьт бердӧ воӧм «йӧз» взорвитісны тайӧ дивӧяссӧ. Тадзи лои бырӧдӧма 1.500 вося история памятникъяс. Кыдзи сӧмын киныс кыптіс найӧс жуглыны-пасьйынысӧ?!.
Мыйла ме та йылысь висьтала? Да сы ради, мый миянӧс кытшалӧ ки помысь вӧчӧм да вӧр-ваӧн лӧсьӧдӧм уна памятник-пас, дивӧ. И найӧс колӧ аддзывны ас синмӧн. Лолыд тасасьлӧ, сьӧлӧмыд чеччӧ, горш діныд гӧрддзасьлӧ, да синваыд тюрӧ-доршасьӧ. Нимкодьсьыс. Мойвиис миянлы. Зэв ёна. Аслыным аддзывны шемӧсмӧданаторсӧ и челядьлы тшӧтш петкӧдлыны. Мед налӧн сьӧлӧмын нимкодьыс тшӧтш поздысяс-олас…
Кижиын стрӧитчӧм-зодчество памятниксӧ выльмӧдӧм бӧрас восьтӧмаӧсь 2021 воын. А ӧні шуӧма мӧд вичкосӧ, тӧвсясӧ, пӧдлавны ремонт вылӧ. Шойччыны сійӧ кутас. И код тӧдас, дыр-ӧ нюжалас дзоньтасян-выльмӧдан уджыс… И лоӧ-ӧ тайӧ дивӧыс во комын-нелямын мысти…
Миян быдӧнлӧн ас муын эмӧсь жӧ ки помысь вӧчӧм да вӧр-ваӧн лӧсьӧдӧм аслыспӧлӧс памятникъясыс. Мукӧддырйиыс весиг ылӧ муннысӧ оз и ков. Нимкодясьӧй наӧн асьныд, петкӧдлӧй челядьыдлы, восьтӧй сьӧлӧм-ловтӧ, инмӧдчылӧй историяас да мичлунас и ті…
Водзӧ лоӧ на.
Елена Хозяинова, Карелия – Коми.
<> Комиӧдіс Елена Плетцер. Снимокъясыс авторлӧн.