Комиын 120-ысь унджык морт босьтчис велӧдчыны республикаын колана уджсикасӧ. «Кадры» нацпроект серти тайӧс позьӧ вӧчны дон вештытӧг.
Выль профессия-специальносьтьӧ тадзи велӧдӧны пенсия вылӧ петан арлыдӧ воысьясӧс, куим арӧсӧдз кага видзӧм могысь отпускӧ петысьясӧс, уджтӧмалысь нывбабаясӧс, кодъяслӧн эмӧсь сизим арӧсӧдз челядь, вермытӧм йӧзӧс, торъя военнӧй операцияын служитысьясӧс да СВО-ын пӧгибнитӧмалысь матысса рӧдвужсӧ, Донецк да Луганск Народнӧй Республикаясын 2014 вося май 11 лунсянь тышкасьысьясӧс, а сідзжӧ уджтӧмалысь войтырӧс.
«Кадры» нацпроект серти дон босьттӧг велӧдӧны и том йӧзӧс, кодъяс армияын служитӧм либӧ велӧдчӧм йылысь аттестат босьтӧм бӧрын нёль тӧлысь нин оз вермыны аддзыны удж.
–Ӧні «Работа России» порталын Комиын олысьяс вермасны бӧрйыны нелямын велӧдан программаысь налы лӧсяланасӧ, мед лоны слесар-сантехникӧн, сварщикӧн, бульдозеристӧн, регионса экономикалы медся ёна колана мукӧд специалистӧн.
Во заводитчӧмсянь выль профессияӧ велӧдчыны заводитіс 124 морт, нӧшта 50-ӧн босьтчасны таӧ матысса кадӧ.
Ставсӧ жӧ таво «Кадры» нацпроект серти Комиын шуӧма велӧдны 213 мортӧс, – висьталіс удж, занятосьт да йӧзӧс социальнӧя доръян министерствоӧн веськӧдлысьлысь удж вӧчысь Татьяна Майкова. – Татшӧм велӧдчӧмыс колӧ и йӧзлы, кодъяс кӧсйӧны вежны уджсӧ, и предприятиеяслы, кӧні оз тырмы бур тӧдӧмлун-сяма специалистыс.
Быдӧн, коді кӧсйӧ велӧдчыны «Кадры» нацпроект серти, вермас бӧрйыны сылы колана программа да шыӧдчыны «Работа России» порталӧ либӧ йӧзӧс уджӧн могмӧдан регионса шӧринлӧн кар-районса филиалӧ.
<> Гижӧдсӧ дасьтіс Павел симпелев.