Культураын уджалысьяскӧд аддзысьлігӧн регионӧн веськӧдлысь Ростислав Гольдштейн аттьӧаліс найӧс Республика лунлы сиӧм праздник дасьтӧмысь.
–Ставсӧ вӧлі вӧчӧма зэв бура. Телевидениеса Первой каналын петкӧдлісны «Люди леса» фестиваль йылысь сюжет. И талун на телеканалын зільысьяс шыӧдчисны ме дорӧ, тшӧкыдджыка пӧ юӧртӧй миянлы татшӧм водзмӧстчӧмъяс йывсьыс, и ми тӧдмӧдам наӧн видзӧдысьясӧс, – висьталіс Ростислав Гольдштейн.
Сійӧ сідзжӧ пасйис, мый Комиын енбиа йӧзыс да творческӧй котырыс уна, и колӧ, мед найӧс бура тӧдісны республикаын олысьяс. А та могысь пӧ локтан восянь кутам котыртлыны налы районъясӧ гастрольяс.
В.Т.Чисталёв нима культура колледж помалысь Мария Казакова воис сыкӧд ӧти кывйӧ, сиктъясын пӧ енбиа йӧзыс збыльысь уна. И велӧдчигӧн пӧ ми ёртъяскӧд концертъясӧн ветлывлім районъясӧ, да миян петкӧдчӧм бӧрын том йӧз пӧвстысь эз эшаӧн кӧсйыны йитны ассьыныс олӧмсӧ культуракӧд.
Неважӧн Мария Казакова лоӧма «Земский работник культуры» конкурсын вермысьӧн да босьтчӧма уджавны хореографӧн Айкатылаын. Конкурсын вермӧмысь вичмӧдӧм сьӧмыс пӧ ышӧдӧ том специалистъясӧс.
–Колледж помалысьлы кӧ сетӧны 1 миллион шайт, тайӧ ёна отсалӧ уджад босьтчигӧн, – висьталіс сійӧ.
Комиын искусство колледж помалӧм бӧрын Лукас Сухарев ӧні водзӧ велӧдчӧ Москваын П.И.Чайковский нима консерваторияын. Лукас вӧзйис котыртны Сыктывкарын том йӧзлысь симфоническӧй оркестр. Сійӧ пӧ паськыда нимӧдас юркарнымӧс 250 вося юбилей пасйигӧн.
–Зэв бур мӧвп, Лукас, – аттьӧаліс том композиторӧс Ростислав Гольдштейн да тшӧктіс культура министерствоӧн веськӧдлысь Марина Бурмистровалы думыштны, кыдзи збыльмӧдны тайӧ мӧвпсӧ.
Сыктывкарлы 250 во тыригкежлӧ режиссёр Артемий Барсуков вӧзйис Коми юркарын вӧчны креативнӧй кластер. Татшӧмъясыс пӧ эмӧсь нин Москваын, Санкт-Петербургын, и найӧ пӧ мичмӧдӧны карсӧ, сэтчӧ окотапырысь волывлӧны йӧзыс.
Артемий казьтыштіс, мый водзмӧстчысь войтыр лӧсьӧдӧмаӧсь нин Сыктывкарын «Платформа №9» творческӧй проект, а уджтаснас юрнуӧдысь Кирилл Оботуров висьталіс, мый кык воӧн найӧ восьтӧмаӧсь нин кӧкъямыс мастерскӧй, а водзӧ вылӧ кӧсйӧны вӧчны торъя площадка, мед петкӧдлыны сэні концертъяс, котыртлыны выставкаяс.
Регионӧн веськӧдлысь вылӧ донъяліс уджтассӧ да шуис, шайт бӧрся шайт пӧ та могысь видлам чукӧртны, и таво кӧ оз артмы, 2026-2027 воясӧ быть отсалам збыльмӧдны проектсӧ.
–Зэв бур, мый отсаланныд йӧзыслы сӧвмӧдны творчествосӧ. Тіян эмӧсь гырнич вӧчалысь мастеръяс. Гашкӧ, позяс котыртлыны и сёйысь вӧчасян искусство фестиваль? – вӧзйис Ростислав Гольдштейн да содтіс: – Сыктывкарлы 250 во тыригкежлӧ вӧчам карнымӧс странаса Рытыв-Войвыв кытшын медся мичаӧн. Мед эз ӧтлааститны сійӧс Москвакӧд либӧ Петербургкӧд, а казялісны сылысь аслыспӧлӧслунсӧ.
Аддзысьлӧм вылӧ чукӧртчӧмаяс шуисны, мый республикаса юркарлӧн юбилей кежлӧ колӧ лӧсьӧдны этнокультура бренд. Сыӧн пӧ вермас лоны Шыпича – Усть-Сысольсклы подув пуктысь. Тавося июньын Сыктывкарын нуӧдісны киподтуя войтырлысь фестиваль, и нимсӧ сылы сетіс буретш Шыпичалӧн сера вӧньыс.
Ростислав Гольдштейн ошкис и Россияса заслуженнӧй артистка Галина Миковалысь мӧвпсӧ – восьтыны Сыктывкарын акань театр.
Аддзысьлӧмлы кывкӧртӧд вӧчигӧн республикаӧн веськӧдлысь шуис, Комиын пӧ колӧ котыртны мир пасьталаын нималана 5-6 фестиваль. Та могысь пӧ миян ставыс эм: мифология, традицияяс да весиг асланым классическӧй композитор.
–Регыд миян республикаӧ волас режиссёр Дмитрий Астрахан да кино ловзьӧдӧм могысь кутас уджавны енбиа том йӧзкӧд. Восьтам тані и Мариинскӧй театрлысь филиал, – висьталіс Ростислав Гольдштейн. – Ӧні миян культура юкӧн чусыд бриллиант кодь на, а кутас дзирдавны-югъявны. Ті юксьӧй асланыд мӧвпъясӧн, а ми отсалам тіянлы збыльмӧдны найӧс.
<> Гижӧдсӧ дасьтіс Павел СИМПЕЛЕВ. Снимокыс ӧтуввезйысь.