Кольӧм вежонӧ Сытывдін районса Ыбын финн-йӧгра этно-паркын чукӧртчылісны регионын олӧм бурмӧдны зільысь том йӧз, кодъяс кӧсйӧны петкӧдлыны ассьыныс сям-кужӧмсӧ веськӧдлан котырын.
Куимсё гӧгӧр том мортлы татшӧм позянлуныс воссис «Коми – территория действий» велӧдан программа збыльмӧдігӧн.
Ыбса этнопаркын республикаса быд кар-районысь власьт тэчасын, бизнесын уджалысьяскӧд, вуз помалысьяскӧд тӧдӧмлуннас юксис РФ-са президент бердын госслужба академияса проректор Андрей Полосин.
–Андрей Владимировичкӧд ми важысянь тӧдсаӧсь, ӧтлаын уджалім 2002-2004 воясӧ, кор Коми Республика вӧлі водзмӧстчысьяс лыдын и Рытыв-Войвыв кытшын, и страна пасьталаын. Тані чужӧм мӧвпъяс сэки веськавлісны федеральнӧй правительстволӧн индӧдъясӧ, – томуловӧс Андрей Полосинкӧд тӧдмӧдіс республикаӧн веськӧдлысь Ростислав Гольдштейн. – Сэки ми гӧрдитчим республикаӧн, и миянлы бӧр колӧ кыпӧдчыны сійӧ жӧ тшупӧдӧдзыс.
Андрей Полосин жӧ донъяліс «Коми – территория действий» программасӧ ӧнія кадӧ зэв коланаӧн.
–Миянлы колӧ дасьтыны том специалистъясӧс, кодъяс босьтасны ас выланыс регион вӧсна кывкутӧмсӧ, – шуис сійӧ. – Веськӧдлан уджыд зэв сьӧкыд, медым вӧчны сійӧс, колӧ бур тӧдӧмлун, ыджыд опыт. Россияын омӧля на уджалӧны власьт тэчасын зільысь том специалистъяскӧд, и Коми Республикалӧн опытыс, гашкӧ, лоас медводдзаяс лыдын.
Комиӧ волігас Андрей Полосин аддзысьліс и регионса юралысьлысь удж вӧчысь Ростислав Гольдштейнкӧд.
–Ті дасьтанныд бур специалистъясӧс, но миянлы колӧ, мед эн орӧдӧй накӧд йитӧдсӧ и уджӧ босьтчӧм бӧрас, – пасйис академияса проректоркӧд сёрниын Ростислав Гольдштейн. – Веськӧдлыны сяммысьтӧ ӧд корсьны колӧ, сэсся велӧдны, а та бӧрын и уджас медводдза вось-ковъяс вӧчигас отсавны сылы. Россияса госслужба академияын эм та могысь став позянлуныс, и чайта, проектыс миян артмас.
Ростислав Гольдштейн содтіс, мый регионын велӧдчӧмсӧ колӧ котыртны Коми госслужба академияын.
–Ми вермам дасьтыны тіянлы велӧдан программа да корсьны преподавательясӧс, кодъяс мӧдасны уджавны том веськӧдлысьяскӧд. Ми зэв радӧсь, мый проектсӧ кутам ӧтув збыльмӧдны, – шуис Андрей Полосин.
«Коми – территория действий» проектӧ пырӧдчӧны 21-35 арӧса том войтыр. Найӧ велӧдчӧны уджавны ӧтувъя командаӧн, дасьтыны уджтасъяс, сёрнитны йӧз водзын да тӧдмӧдны найӧс экономика да социальнӧй юкӧн сӧвмӧдӧм кузя асланыс мӧвпъясӧн.
<> Гижӧдсӧ дасьтіс Александра Артеева. Снимокыс ӧтуввезйысь.