Кӧрт туй вылын зільысьясӧс уджвывса праздникӧн чолӧмалігӧн Россияса президент Владимир Путин висьталіс, мый странаса войвыв регионъясын кутасны дзоньтавны да нюжӧдны выль маршрутъяс.
–Россияын кӧрт туй транспорт сӧвмӧ, босьтчим збыльмӧдны гырысь проектъяс. Сідз, выльмӧдам БАМ, Транссиб да мукӧд трасса, вӧчам саридзса, тшӧтш и Кола кӧджса да Ылі Асыввывса портъясӧ да терминалъясӧ маршрутъяс. Индӧма нюжӧдны туйяс и Арктикаын, Коми Республикаын, Ямалын да мукӧд регионын, – пасйис Владимир Путин.
Кольӧм вежонӧ Сыктывкарын восьтісны Войвыв кӧрт туйлысь выльмӧдӧм терминал. Сэні позьӧ ректыны, видзны, сӧвтны поездӧ да мӧдӧдны быдсикас груз.
–Тайӧ лоис регионын транспорт инфраструктура сӧвмӧдӧмын, экономика вынйӧр содтӧмын тӧдчана воськолӧн, – терминалсӧ восьтігӧн висьталіс регионса правительствоӧн веськӧдлысьӧс вежысь Лариса Максимова. – Комиын дасьтӧма татшӧм терминалъяс лӧсьӧдан программа, вӧр бизнесын уджалысьяс тшӧтш стрӧитӧны груз видзан комплексъяс, неважӧн на терминал вӧлі восьтӧма «Верхнеижемская» станцияын.
«Войвыв кӧрт туйяс» предприятиеӧн веськӧдлысь Рашид Сайбатовлӧн кывъяс серти, медым регионъяс вермисны сӧвмыны, на костын колӧ лӧсьӧдны бур транспорт йитӧд.
–Медся ӧдйӧ быдсикас прӧдукция позьӧ нуны-вайны контейнерӧн. Тавося январь-июльын поездӧн Комиысь вӧлі мӧдӧдӧма матӧ квайтсё сюрс тонна груз. Сыктывкарын выль терминал восьтӧмыс сетас позянлун содтыны тайӧ лыдпассӧ, – шуис сійӧ.
Август 20 лунӧ Сыктывкарсянь муніс экспорт груза 850-ӧд поезд. Китайӧ вӧлі мӧдӧдӧма тьӧс-плакаа 76 контейнер. 2017 восянь, кор Коми юркарсянь кутісны ветлыны татшӧм поездъяс, лои нуӧма ветымын сюрсысь унджык контейнер.
Водзті кӧ терминалас ӧтпырйӧ позис сӧвтны 28 вагон, выльмӧдӧм бӧрас – 57-ӧс нин.
<> Гижӧдсӧ дасьтіс Павел Симпелев. Снимокъясыс ӧтуввезйысь.