Август 22 лунӧ Комиӧ воліс Россияын йӧзлысь дзоньвидзалун видзӧм кузя министр Михаил Мурашко. Сыкӧд тшӧтш вӧліны медицина нырвизя федеральнӧй научно-исследовательскӧй институтъясӧн кызь веськӧдлысь.
Та мында федеральнӧй экспертыс миян республикаӧ волісны медводдзаысь на. Сы могысь, медым быд боксянь донъявны регионын медицина тэчас, туявны тайӧ юкӧнас мытшӧд-падмӧг-тырмытӧмторсӧ да ӧтув мӧвпыштны, кыдзи бырӧдны найӧс, бурмӧдны республикаын олысьясӧс медуслугаясӧн могмӧдӧм.
Михаил Мурашко да Ростислав Гольдштейн волісны Сыктыв районса Визин сиктын выль бурдӧдчан корпусӧ, видзӧдлісны, кыдзи Кунибын стрӧитӧны выль ФАП, мый вӧчсьӧ Эжваын карса больничаын модуля приёмнӧй отделение кыпӧдӧм могысь, а сідзжӧ донъялісны юркарын выль перинатальнӧй шӧрин лэптыны урчитӧмин. Россияса президент Владимир Путин шуис государстволы медтӧдчана могъясысь ӧтиӧн – дорйыны нывбаба-мамӧс да челядьӧс, а сідзкӧ, кыдз тӧдчӧдіс Михаил Мурашко, Комиын перинатальнӧй шӧринсӧ быть восьтасны.
Россияса минздравысь специалистъяс пыдісянь тӧдмасисны республикаса медучреждениеясын уджӧн.
Та бӧрын вӧлі регионса правительствокӧд ӧтувъя совещание.
Михаил Мурашко юӧртіс, мый бӧръя воясӧ Коми Республикаса медицина юкӧн сӧвмӧдӧм вылӧ федеральнӧй бюджетысь вуджӧдӧма кӧкъямыс миллиардысь унджык шайт, кызвынсӧ – таво. И таысь водзӧсыс эм.
Ньӧбӧма квайт сюрсысь унджык медоборудование, тэрыб отсӧг сетан 270 сайӧ машина, дзоньталӧма ФАП-яс да кыпӧдӧма выль бурдӧдчанінъяс.
Федеральнӧй министр вылӧ донъяліс медицина юкӧнын пӧрадок лӧсьӧдӧм кузя Ростислав Гольдштейнлысь уджсӧ. Сідз, республикаӧн веськӧдлысьлӧн индӧд серти став тӧдчана проект збыльмӧдӧмсьыс кывкутӧ торъя морт, и босьтӧма син улӧ выльӧн кыпӧдан став стрӧйбасӧ, кӧні колана уджсӧ оз вӧлӧм вӧчны урчитӧм кадӧ. Торйӧн кӧ, татшӧм тырмытӧмторсӧ эрдӧдӧмаӧсь Изьва районса Щельяюрын участкӧвӧй больнича, Кулӧмдінын поликлиника да юркарын челядь больничалы содтӧд корпус стрӧитанінын. Ас кадӧ абу помалӧмаӧсь и вуджан висьӧмысь бурдӧдчан республикаса больнича. Кор сьӧмыс эм, став уджсӧ колӧ вӧчны урчитӧм кадӧ, – пасйис Михаил Мурашко.
Сэк жӧ сійӧ пасйис, мый йӧзӧс медуслугаясӧн бура могмӧдӧмыс абу сӧмын административнӧй мераяс сайын. Зэв тӧдчана медицинаын уджалысьяслӧн тӧдӧмлун-сямыс. И буретш юксьыны регионысь уджъёртъясыскӧд асланыс бур опытӧн и воисны та пӧрйӧ Москваысь да Санкт-Петербургысь нималана специалистъяс.
Коми Республикаса юралысьлысь удж вӧчысь Ростислав Гольдштейн аттьӧаліс Михаил Мурашкоӧс миян республикалы ыджыд отсӧг вичмӧдӧмысь.
–Сӧмын таво Комилы федеральнӧй шӧринысь вуджӧдӧма 4,7 миллиард шайт, – висьталіс сійӧ. – И тӧдчана, медым быд урысь вӧлі водзӧс, медым йӧзыс аддзисны медицинаын бурланьӧ вежсьӧмъяссӧ.
Ростислав Гольдштейн эскӧмӧн пасйис, мый Россияса минздравысь специалистъяс отсаласны миян регионса медикъяслы пырӧдчыны федеральнӧй тшупӧдын вӧдитчан технологияясӧ, юксясны уна сикас, тшӧтш и медся сьӧкыд висьӧмъясысь бурдӧдӧм кузя асланыс тӧдӧмлун-сямӧн. Та дырйи регионын олысьясӧс, ковмас кӧ, век дасьӧсь примитны федеральнӧй клиникаяс.
Ставыс тайӧ сетӧ позянлун бурмӧдны регионын йӧзлысь олӧмсӧ, ёнмӧдӧ налысь лача, мый миян медикъяс ас кадӧ да колана ногӧн сетасны отсӧг. Медся тӧдчанаыс – медым миян республикаын олысьяслӧн дзоньвидзалуныс вӧлі бур, а врачьяс гӧрдитчисны асланыс профессияӧн.
<> Гижӧдсӧ дасьтіс Александра АРТЕЕВА. Снимокъясыс ӧтуввезйысь.