Кольӧм шойччан лунъясӧ регионса юркарын паськыда да кыпыда пасйисны Республика лун – Комилы 104 во тырӧм. Мыйсӧ сӧмын эз вӧзйыны сыктывкарсаяслы да гӧсьтъяслы!
Гажыс шыаліс некымынлаын. Сідз, Киров нима паркын лӧсьӧдісны артистъяслы сцена, пыдынджык челядь ворсісны шашкиӧн да «крестики-ноликиӧн» веськыда му вылын.
Торъя плошадкаын вӧзйисны тӧдмасьны коми йӧзкостса ворсанторъясӧн – торганӧн, сярганӧн, зиль-зёльӧн. Тані жӧ позис ас киӧн вӧчны сюмӧдысь пӧлян да ворсыштны сыӧн.
Паркын жӧ ярманга вылын вӧзйисны видлыны-ньӧбны вӧрса козинъяс да град выв пуктас. Сосногорсксаяс вӧлі вайӧмаӧсь сыр, а Кӧрткерӧс районсаяс – ма. Вӧлі и яя вӧлӧга: калбас, тшӧг, кӧр яй.
Нӧшта ӧти ярманга чуксасис Коммунистическӧй уличаын. Татысь позис ньӧбны быдсикас казьтыланпом-сувенир: чача, мичмӧдчантор, джодждӧра, сюмӧд дозмук, ичӧтик нинкӧм, юр кышӧд…
Лун шӧр бӧрас Степан изэрдын пансис йӧзкостса творчестволы сиӧм «Шондібан» гаж. Шӧр сцена вылын сьылӧм-йӧктӧмӧн петкӧдчисны 14 кар-районысь котыръяс. А концертӧдзыс яръюгыд мича паськӧмӧ вӧччӧм войтыр дӧрапас-флагъясӧн кыпыда восьлалісны-мунісны эрд кузя.
Сыктывкарын олысьясӧс да гӧсьтъясӧс Республика лунӧн медводдзаясӧн чолӧмалісны Россияса йӧзлысь дзоньвидзалун видзӧм кузя министр Михаил Мурашко да регионӧн веськӧдлысь Ростислав Гольдштейн.
–Сё нёль воыд – зэв на том арлыд. Ми вочасӧн сӧвмам на, восьлалам водзӧ. Нималана спортсменъяс, мусир перйысьяс – тайӧ ми. Ми торъялам ӧта-мӧдысь, но ӧтувтӧ ставнымӧс ӧтитор – республика дорӧ помтӧм муслун! – тӧдчӧдіс Ростислав Гольдштейн.
Регионса Госсӧветӧн веськӧдлысь Сергей Усачёв шуис Республика лунсӧ кӧленаяс, пӧль-пӧч костын йитӧдӧн, а Россияса Герой Станислав Кочев сиис, медым тайӧ праздникыс век вӧлі чужанін дорӧ муслун петкӧдлан да йӧзӧс ӧтувтан пасӧн.
Степан изэрдын гажыс нюжаліс рытӧдзыс, а медбӧрын чукӧртчӧмаясӧс мича сьылӧмнас нимкодьӧдіс Полина Гагарина.
* * *
Но Республика лун пасйӧмыс таӧн эз помась – август 23-24 лунъясӧ Сыктывкарын нуӧдісны «Вӧрса йӧз» («Люди Леса») этнофестиваль.
Сійӧс котыртлӧны регионса национальнӧй политика министерство да республикаса войтырлӧн Ёртасян керка отсӧгӧн.
Фестивальсӧ нуӧдӧны коми культура аслыспӧлӧслунӧн тӧдмӧдӧм да традиция-обычай нимӧдӧм могысь. Таво сэтчӧ пырӧдчис сё ветымын гӧгӧр котыр.
–Чолӧмала ставнытӧ миян дона республикалы сё нёль во тырӧмӧн да «Диалог культур: северное многоцветье» фестиваль пансьӧмӧн.
Талун ми тӧдмасям миян республикаын олысь став сикас войтырлӧн енби-сямӧн да кужанлунӧн, – пасйис сцена вывсянь регионысь национальнӧй политикаса министр Роман Носков.
Коми Республикаса войтырлӧн Ёртасян керкаӧн веськӧдлысь Григорий Хатанзейский сідзжӧ кыпыда чолӧмаліс праздникӧн, сиис водзмӧстчыны творчествоын да пасйис, тайӧ лунӧ пӧ торйӧн нин сьӧлӧмсянь аттьӧалам регионнымӧс кыпӧдысь-сӧвмӧдысьясӧс, да бурсиис томуловлы:
–Ті Россияса збыльысь алмазъяс. Тіян енби-водзмӧстчӧмныд да Айму дорӧ муслуныд – государство сӧвмӧдӧмлы подув.
Регионлы бур вӧчан уна вося уджысь Коми Республикаса почёт грамота сетісны «Союз казаков- воинов России и Зарубежья» регионса юкӧнысь атаман Евгений Макинлы, тайӧ жӧ котырсьыс штабӧн юрнуӧдысь Анатолий Антипенколы вичмис войтыръяс костын сӧглас-ӧтувъялун видзӧмысь морӧс выв пас.
Та бӧрын сцена вылӧ петалісны «Диалог культур» фестивальӧ пырӧдчысьяс, на пӧвстын Москваысь «Vetkafolk», Удмуртияысь «Post-dukes» да уна мукӧд.
Колӧ шуны, юркарын Степан изэрдсӧ «Вӧрса йӧз» («Люди Леса») этнофестиваль кежлӧ вӧлі мичмӧдӧмаӧсь турун тюкъясӧн, быдсикас мыгӧрӧн да ӧшалан чериӧн.
«Мастера Людей Леса» площадкаын окотитысьясӧс велӧдісны вӧчасьны пуысь, сёйысь, сюмӧдысь, «Художники Людей Лесаын» позис тӧдмасьны Коми Республикаса искусство колледжысь студентъяслӧн да Национальнӧй галереяысь серпас-уджъясӧн.
Уна площадка вӧлі сиӧма вӧр-ва видзӧм-дорйӧмлы. Шуам, ӧтилаын вӧзйисны тӧдмасьны республикаса заказник-заповедникъясӧн, мӧдлаын – босьтны карса либӧ ас йӧр мичмӧдны ичӧтик понӧль, коймӧдлаын видзӧдавны микроскоп улын рой сі ли змей кучиктор…
Позис и карнанӧн эстафета котӧртны, ньӧвйысь лыйсьыны, мечӧн шенасьны-тышкасьны.
Дерт, и ярмангаса мастеръяслысь кипом удж ньӧбны да чӧскыдторйӧн номсасьыштны.
<> Алина Латышева. Снимокъясыс ӧтуввезйысь.