Коми Республикаысь 13,5 прӧчент мутассӧ (ылӧсас квайт миллион гектар) шуӧмаӧсь торйӧн доръянаӧн (рочӧн кӧ, особо охраняемая территория, дженьыда кӧ, ООПТ).
Рытыв-Войвыв регионъясысь Комиын ООПТ-ыс медся ыджыд. 239 заказник лӧсьӧдӧма республика тшупӧдын да нёль – федеральнӧй тӧдчанлуна. Тайӧ Печора-Ылыдзса биосфера заповедник, «Югыд ва», «Койгородскӧй» национальнӧй паркъяс да «Парась тыяс» заказник. Воркута дорын нӧшта кык заказник вӧсна кывкутӧ сэтчӧс муниципалитет.
Быдӧнлы-ӧ позьӧ волыны заказникас? Лэдзӧны-ӧ сэтчӧ кузов-падъянӧн, ружьеӧн, вугыр шатинӧн, мотора пыжӧн да машинаӧн?
Тайӧ да мукӧд юалӧм вылӧ вочавидзисны ООПТ шӧринысь специалистъяс.
ООПТ шӧринысь юкӧнӧн веськӧдлысь Борис Наконечный:
–Медым сӧвмӧдны регионса заказник, идӧра сыӧн вӧдитчыны да велӧдны йӧзсӧ дорйыны экология, Коми Республикаса му пытшкӧс озырлунӧн вӧдитчан да вӧр-ва видзан министерство котыртіс ООПТ шӧрин. Асланым уджын ми подуласям 637-ӧд номера постановление вылӧ, кодӧс 2021 вося декабрь 29 лунӧ вынсьӧдіс Коми правительство.
Быд заказниклӧн – аслас мог. Республикаса 239-ысь 190-ас рӧдмӧдӧны-видзӧны сӧмын звер-пӧтка, чери либӧ быдмӧг, тшӧтш и Гӧрд небӧгын пасйӧмаӧс. 73-ын видзӧны-дӧзьӧритӧны аслыспӧлӧс мича местаяс, мӧд ногӧн кӧ, вӧр-ва памятникъяс.
ООПТ-ыс воысь-во содӧ. Сідз, мӧйму котыртчис республика тшупӧда куим заказник: «Пожӧгдінса» (Сыктывдін район), «Дзервад» (Сосногорск) да «Кожваса» (Печора). Таво Ухта гӧгӧрын лӧсьӧдасны «Риф Седью», «Обнажение Доманик» да «Очьпарма».
2030 воӧдз Комиын содтӧд шуӧма лӧсьӧдны 392 сюрс гектар вылын 26 заказник. Сэки республикаын 14,1 прӧчент мутасыс лоас торйӧн видзан-дӧзьӧритан. И миян регион вӧчӧ ставсӧ, медым воӧдчыны войтыркостса лыдпасӧдз – 17 прӧчентӧдз.
–Борис Михайлович, мый оз позь вӧчны ООПТ-ын?
–Оз позь капитальнӧя стрӧитчыны, керасьны, нюжӧдны биару-мусир труба да электролиния, кызвынлаас чери кыйны, вӧравны, чукӧртны тшак-вотӧс, перйыны мупытшкӧсса озырлун, вӧчны ёг-шыблас видзанін, ветлыны сьӧкыд техникаӧн. Оз позь бипурасьны, жуглыны пӧтка поз да вӧрса пемӧслысь горс-гу, а сідзжӧ заказник дорвидзӧг пасъян сюръя, аншлаг, шлагбаум, стенд да юӧр сетан мукӧд пас.
–Кӧні позьӧ вӧравны?
–Заказник-заповедникын, кыдзи и республикаса мукӧд пельӧсын, позьӧ кыйны чери, вӧравны, чукӧртны тшак-вотӧс, некутшӧм индӧд кӧ та кузя абу. Дерт, вӧрын да вадорын та дырйи колӧ кутны тӧд вылын оланпас-правилӧ.
Быдӧнлы ягӧ мӧдӧдчытӧдз да ю вылӧ петтӧдз колӧ тӧдмасьны республикаын вӧралан да чери кыян правилӧясӧн, медводз Россияса Минприродылӧн 2020 вося июль 24 лунӧ вынсьӧдӧм 477-ӧд номера индӧдӧн. Сэні пасйӧма, кутшӧм кабала-документ мед вӧлі сьӧрсьыд, кор позьӧ вӧравны, кыдзи вӧдитчыны ӧружиеӧн, нуны сійӧс пыжӧн, машинаӧн да с.в. Ӧтуввезйын «Геопортал Коми» лист бокысь позьӧ видзӧдлыны, кутшӧм ООПТ восьса, а кытчӧ туйыс пӧдса.
Быдлаын аслас сідз шусяна режим. 12 заказникын, торйӧн кӧ, Воркутаса «Енганэпаын», Ухтаса «Еджыд Кедваын», Сьӧдкыркӧтшса «Белӧй борын», Соколовкаса ю йылын, Кӧрткерӧс районса «Маджаын», Чилимдінса «Пижемскӧйын», Сыктывдінса «Юилын», Сосногорскса «Гажа ягын» да мукӧдын – оз позь вӧравны.
–А чери быдлаын позьӧ кыйны?
ООПТ шӧринысь юкӧнса главнӧй эксперт Максим Захаров:
–30-16-10 номера телефон пыр позьӧ звӧнитлыны и миян шӧринӧ. Специалистъяс гӧгӧрвоӧдасны, кор да кӧні позьӧ кыйсьыны. Шуам, некымын ю кузя, кӧні кульмӧ дона чери, август 15 лунсянь йи сувттӧдз оз позь журъявны мотора пыжӧн. Ӧткымын тыын июнь 10 лунӧдз позьӧ кыйсьыны и ботанӧн. Но сійӧс колӧ петкӧдлыны инспекторлы, син сертиыс шогмана кӧ, регистрируйтны да ӧшӧдны бирка, маркируйтны. Ӧти мортлы позьӧ вӧдитчыны куим ботанӧн, но вӧйтны сьӧрсьӧн-бӧрсьӧн, медым эз вӧв 50 метрысь кузьджык. Син сертиыс быд черилы ботаныс торъялӧ, но медся ичӧтыс – 30 миллиметр.
«Визинса» да «Пожӧгса» заказникъясын оз позь кыйны ком, «Кӧджорӧмсаын» – ёді, «Илыч-скӧйын» – кебӧс да чими. Нӧшта 11-ын, «Конецбор-Даниловскӧйын», «Шаръягскӧйын», «Усинскӧйын», «Абкӧджскӧйын», «Сынинскӧйын» да кӧнсюрӧ Печора ю вылын кыйсьыны позьӧ, но та дырйи мед эз вӧв торкалӧма Россияса Минсельхозлысь 2021 вося май 13 лунӧ вынсьӧдӧм 292-ӧд номера индӧд.
Сэні индӧма, мый оз позь кыйсьыны силиконысь, кӧртысь вӧчӧм самӧн, шуам, кыснанӧн, мушкаӧн, воблерӧн да с.в. А нидзув, лӧдз, номыр да мукӧд сикас гут-гаг позьӧ пысавны вугырад. Оз позь кыйны и урчитӧм ыдждаысь посньыдджык чери. Казьтышта, 28 сантиметрысь ичӧтджык ком, 25 да 30 сантиметрысь посньыдджык сын да сир бӧр колӧ лэдзны ваӧ. Эг ӧтчыд казявлы чери кыйысьясӧс, кодъяслӧн орччӧн куйлӧ линейка, а кодсюрӧ веськыда шатинас пасъялӧмаӧсь сантиметръяссӧ.
Ты-ю вылын оз позь горшасьны. Гортад позьӧ нуны кык лунся кыйдӧс. Шуам, суткинас позьӧ кыйны 15 килограмм сир либӧ 10 кило ком. Сідзкӧ, гортсаыдлы позьӧ нуны 30 да 20 кило сир либӧ ком.
ООПТ-ын горшасьысьӧс кӧ кутасны киӧдыс, Россияса КоАП-ысь 8.39 статья серти кыскасны административнӧй кывкутӧмӧ. Пу пӧрӧдӧмысь ковмас вештыны 5 сюрс шайт, звер-пӧтка лыйӧмысь – 40 сюрс, а дона чери кыйӧмысь – 100 сюрсӧдз. Таысь ӧтдор мырддясны ружье-патронсӧ, ботан-зібсӧ, мотора пыжсӧ да снегоходсӧ. Вӧр-валы кӧ вӧчис зэв ыджыд ускӧттьӧ, Россияса УК-ысь 262 статья серти кыскасны уголовнӧй кывкутӧмӧ.
Мӧйму заказникын вӧралан да чери кыян правилӧ торкалӧмысь инспекторъяс кутісны 49 мортӧс, таво – 31-ӧс.
–Мӧйму Паль сиктсаяс, Ивадор, Гаждор грездсаяс, Студенеч посёлоксаяс тшӧкыда норасьлісны, ог пӧ вермӧй судзӧдны Чернамӧ путёвка…
–2021 воын на «Белый» заказникӧ шулісны лэдзны йӧзсӧ июнь 15 лунсянь сентябрь 15 лунӧдз 100 шайта пропуск серти. Но сэсся шуисны сетавны пропусксӧ дон босьттӧг. Быд лун вичмӧдлісны 310-ӧс.
Талун видлалӧны на, кыдзи позяс веськавны заказникас матігӧгӧр сикт-грездсалы. Найӧс шуӧма лэдзны пропусктӧг, но сьӧрсьыныд мед вӧлі паспорт. Наысь ӧтдор, кыдзи и водзті, тшакла вермас волыны 310 морт.
Вӧр туялысь учёнӧйяс мӧдасны видзӧдны, кыдзи тайӧ мӧрччас парма-ягыслы. Серпасыс кӧ омӧльтчас, бара мӧдасны вичмӧдны сӧмын урчитӧм мында путёвка.
Тайӧ заказниксӧ лӧсьӧдӧмаӧсь татчӧс яла-нитш видзӧм, а абу нажӧвитчӧм могысь. Мӧйму тшак примитысьяс вескиа машинаӧн виччысьӧмаӧсь вотчысьясӧс веськыда заказник КПП дорас. Йӧзыс вит-квайтысь косавлӧмаӧсь тшакла…
Заказникас зільысьяслы, ӧти-кӧ, нимкодь, мый пыр унджыкӧн волӧны ягӧ. Но, мӧдарсянь кӧ, сэтчӧс уджалысьясӧс да инспекторъясӧс майшӧдлӧ экология дорӧ йӧзлӧн веськодьлуныс. Дона гоб корсигӧн кодсюрӧ став яласӧ бергӧдӧны. Быдлаын туплясьӧ пластик сулея, целлофан пакет, ӧтчыдысь вӧдитчан тасьті-пань да мукӧдтор. Машинаӧн ветлӧны веськыда яла нитш кузяыс.
Вӧрса оланпас да регламент серти быд тшак-вотӧс чукӧртӧм могысь урчитӧма кад. Чӧдла позьӧ ветлыны июль-августын, мырпомла – июльын, турипувла – сентябрь-ноябрын. Но унаӧн горшасьӧны да вотӧссӧ кыннас на чукӧртӧны. Пакула позьӧ чукӧртны во чӧж, зарава – апрель-майын, а бурдӧдчан турун – июль-августын.
Оланпасас гижӧма, мый оз позь путкылявны нитшсӧ. Важ, сісь тшаксӧ оз жӧ ков чужъявны.
<> Николай РАЗМЫСЛОВ. Снимокъясыс авторлӧн да ӧтуввезйысь.